កីឡាករល្បុក្កតោ ពេជ្រ ពន្លឺ ដណ្តើមបានមេដាយសំរឹទ្ធក្នុងការប្រកួតក្បាច់គុនអន្តរជាតិ International Martial Art Contest ប្រចាំឆ្នាំ២០១៩ នៅសាធារណរដ្ឋកូរ៉េ។ មេដាយនេះ ពន្លឺ ដណ្តើមបានលើវិញ្ញាសា Bare Hand Single ដែលមានកីឡាករមកពី២៣ប្រទេសចូលរួម។ នេះបើតាមការបញ្ជាក់របស់លោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា ដែលកំពុងមានវត្តមាននៅប្រទេសកូរ៉េ។
ក្រោយដណ្តើមបានមេដាយមាសក្នុងការប្រកួត Pre-SEA Games លើវិញ្ញាសាដំបងខ្លី Arnis ដែលជាក្បាច់គុនវប្បធម៌របស់ហ្វីលីពីន អ្នកលេងគុនល្បុក្កតោ ពេជ្រ ពន្លឺ បានធ្វើឲ្យទង់ជាតិកម្ពុជា ត្រូវបានបង្ហូតឡើងនៅមុខប្រតិភូកីឡាមកពីប្រទេសផ្សេងៗជាច្រើន ក្នុងព្រឹត្តិការណ៍ប្រកួតក្បាច់គុនអន្តរជាតិ The 2019 International Martial Art Contest នៅសាធារណរដ្ឋកូរ៉េ។
ការបង្ហូតទង់ជាតិនេះ ធ្វើឡើងក្រោយកីឡាករ ពេជ្រ ពន្លឺ ដណ្តើមបានមេដាយសំរឹទ្ធ លើវិញ្ញាសាសម្តែងឯកត្តជន Bare Hand Single ដែលមានកីឡាករមកពី២៣ប្រទេសចូលរួម ខណៈកីឡាករម្ចាស់ផ្ទះកូរ៉េទទួលបានចំណាត់ថ្នាក់លេខ១ និងកីឡាករចិនបានលេខ២។ ក្រៅពីមេដាយ កីឡាករ ពេជ្រ ពន្លឺ ទទួលបានថវិកាលើកទឹកចិត្តចំនួន៣០ម៉ឺនវ៉ុន(ជាង២៥០ដុល្លារ)។
ព្រឹត្តិការណ៍ប្រកួតកីឡាយុទ្ធសិល្ប៍ចម្រុះអន្តរជាតិនេះ រៀបចំដោយសហភាពកីឡាយុទ្ធសិល្ប៍ចម្រុះពិភពលោក World Martial Art Union។ ការប្រកួតនេះ ប្រព្រឹត្តទៅពីថ្ងៃទី៣០ សីហា ដល់ថ្ងៃទី៦ កញ្ញា ដែលមានប្រទេសជាង២០ជាសមាជិកចូលរួម ខណៈកម្ពុជាបានបញ្ជូនកីឡាករ៦រូបឲ្យចូលរួម៕