ជាតិ
បាក់ឌុប
សង្គមជាតិ
រដ្ឋមន្ត្រីអប់រំ ៖ការប្រឡងពុំមែនជាការកំណត់វាសនារបស់បេក្ខជនទេ ប៉ុន្តែជាការវាស់ស្ទង់សមត្ថភាព
×![]()
ភ្នំពេញ៖ ជាថ្មីម្ដងទៀត រដ្ឋមន្ត្រីក្រសួងអប់រំ យុវជន និងកីឡា នៅតែអះអាងថា លទ្ធផលប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៩នេះ កើតចេញពីការខិតខំប្រឹងប្រែងរៀនសូត្ររបស់សិស្ស ហើយក៏គ្មានការបន្ធូរបន្ថយវិញ្ញាសាប្រឡងដែរ។ សម្រាប់រដ្ឋមន្ត្រីអប់រំ ការប្រឡងពុំមែនជាការកំណត់វាសនារបស់បេក្ខជនទេ ប៉ុន្តែជាការវាស់ស្ទង់សមត្ថភាព និងជំរុញឱ្យពួកគេខិតខំប្រឹងប្រែងទៅមុខ។
ការចេញវិញ្ញាសាប្រឡង ពុំមានពាក្យថា «វិញ្ញាសាស្រួល ឬវិញ្ញាសាលំបាក» ឡើយ។ នេះជាអះអាងរបស់រដ្ឋមន្ត្រីអប់រំលោក ហង់ ជួន ណារ៉ុន ដែលបានបន្ថែមថា ការចេញវិញ្ញាសាប្រឡង គឺអនុលោមទៅតាមការវាស់ស្ទង់សមត្ថភាពសិស្ស ក្នុងអំឡុងពេលនៃការសិក្សា ដោយវិធីសាស្ត្រ «Bloom Taxonomy» និងការពិចារណា និងពិភាក្សាដោយយកចិត្តទុកដាក់ ពីសំណាក់សាស្ត្រាចារ្យ និងមន្ត្រីអប់រំជាន់ខ្ពស់។ បើតាមរដ្ឋមន្ត្រីអប់រំ វិញ្ញាសាប្រឡងកន្លងមក ត្រូវបានជ្រើសរើសដោយប្រុងប្រយ័ត្ន ពីក្នុងមេរៀននៃកម្មវិធីសិក្សាគោលរបស់ក្រសួង។
សារលិខិតរបស់លោក ហង់ ជួន ណារ៉ុន ក្រោយចេញលទ្ធផលប្រឡង ផ្ញើជូនបេក្ខជនប្រឡងបាក់ឌុប នៅថ្ងៃទី១០ កញ្ញានេះ បានសរសេរដូច្នេះថា៖«សូមបេក្ខជនទាំងអស់ចងចាំថា លទ្ធផលនៃការប្រឡងនេះ ឆ្លុះបញ្ចាំងនូវសារៈសំខាន់បីយ៉ាងគឺទី១ អ្នកចេះគឺជាប់ ,ទី២ ការប្រឡងប្រព្រឹត្តទៅដោយយុត្តិធម៌ តម្លាភាព គោលការណ៍ច្បាប់ និងលទ្ធផលទទួលយកបាន និងទី៣ លទ្ធផលនៃការប្រឡងពុំមែនជាការកំណត់វាសនារបស់បេក្ខជនទេ។ ប៉ុន្តែគឺជាការវាស់ស្ទង់សមត្ថភាព និងជំរុញឱ្យមានការខិតខំប្រឹងប្រែងបន្តទៅមុខទៀត»។
បើតាមរដ្ឋមន្ត្រីអប់រំ ដំណើរការប្រឡងជាការអនុលោកកម្ម ទៅតាមនីតិវិធីបច្ចេកទេស គោលការណ៍ច្បាប់ រចនាសម្ព័ន្ធការងារ និងការរក្សាការសម្ងាត់។ «ជោគជ័យនៃការប្រឡងសញ្ញាបត្រមធ្យមសិក្សាទុតិយភូមិនៅក្នុងឆ្នាំនេះ ក៏ដូចជាឆ្នាំកន្លងមក ពិតជាបានធ្វើឱ្យសិស្សានុសិស្ស កាន់តែខិតខំប្រឹងប្រែងរៀនសូត្រ និងសិក្សាស្រាវជ្រាវ»។ នេះជាការលើកឡើងរបស់លោក ជួន ណារ៉ុន ដែលលើកទឹកចិត្តឱ្យសិស្សប្រឡងធ្លាក់ឆ្នាំនេះ បន្តការសិក្សា និងខិតខំរៀនសូត្រនៅឆ្នាំក្រោយទៀត។
លទ្ធផលប្រឡងបាក់ឌុបឆ្នាំ២០១៩នេះ បានបង្ហាញថា សិស្សដែលប្រឡងជាប់មានចំនួន ៧៩ ០៥២នាក់ ត្រូវជា ៦៨.៦២ភាគរយ ក្នុងចំណោមបេក្ខជនប្រឡង១១៧ ០២៤នាក់ (ស្រី៦០ ៤២១នាក់)។ក្នុងនោះបេក្ខជនប្រឡងជាប់និទ្ទេស A មានចំនួន ៤៤៣នាក់ និទ្ទេស B មានចំនួន ២ ៤៣០នាក់ និទ្ទេស C មានចំនួន ៥ ៨៤៧នាក់។ ចំណែកឯនិទ្ទេស D មានចំនួន ១៤ ១០០នាក់ និងនិទ្ទេស E មានចំនួន ៥៦ ២៣២ នាក់។
គួរបញ្ជាក់ថា អ្នកជាប់បាក់ឌុបឆ្នាំ២០១៨ មាន ៧៦ ០៣៤នាក់ ត្រូវជា ៦៧.០៧ភាគរយ ក្នុងនោះ និទ្ទេស A មានចំនួន៤០៨នាក់ និទ្ទេស B ចំនួន ២ ២២២នាក់ និទ្ទេស C ចំនួន ៦ ០៤១នាក់ និទ្ទេស D ចំនួន១៥ ១៨០នាក់ និងនិទ្ទេស E ចំនួន ៥២ ១៨៣នាក់។ លទ្ធផលបាក់ឌុបឆ្នាំ២០១៨នេះ ត្រូវបានប្រកាសរហូតដល់ទៅពីរលើក ដោយសារមានការតវ៉ាពីក្រុមសិស្សក្នុងរាជធានីភ្នំពេញ និងខេត្តកំពតដែលច្បាស់លាស់នឹងសំណេររបស់ខ្លួន។ ក្រោយការតវ៉ា គណៈកម្មការជំនាញ បានរកឃើញថា ដំណើរការបូកស្រង់ពិន្ទុ តាមប្រព័ន្ធកុំព្យូទ័រ មានបញ្ហាបច្ចេកទេសទាក់ទងនឹងពិន្ទុមុខវិជ្ជាគណិតវិទ្យាថ្នាក់វិទ្យាសាស្ត្រ៕
Tag:
ហង់ ជួន ណារ៉ុន
អប់រំ
បាក់ឌុប២០១៩
© រក្សាសិទ្ធិដោយ thmeythmey.com
