អន្តរជាតិ
ការតវ៉ានៅកាស្មៀរកើនឡើង ទោះឥណ្ឌាប្រឹងទប់ស្កាត់
×
ដោយ៖ ឈួន ឈីវអ៊ីង
ប្រជាជនតំបន់កាស្មៀរបានតវ៉ាជាមធ្យមជិត ២០ ដងក្នុងមួយថ្ងៃ ប្រឆាំងនឹងការគ្រប់គ្រងរបស់ឥណ្ឌាក្នុងរយៈពេល ៦សប្តាហ៍ចុងក្រោយនេះ។ ការតវ៉ាកើនឡើង ទោះបីជាកម្លាំងសន្តិសុខឥណ្ឌាបានទប់ស្កាត់ការជួបជុំដើម្បីបង្ក្រាបភាពវឹកវរក៏ដោយ។ នេះបើតាមប្រភពរបស់រដ្ឋាភិបាលជាន់ខ្ពស់ឥណ្ឌាប្រាប់ទីភ្នាក់ងារព័ត៌មាន AFP នៅចុងសប្ដាហ៍មុន។
បើទោះបីជាមានបម្រាមគោចរ ការរារាំងចលនាបះបោរ និងការកាត់ផ្តាច់សេវាទូរស័ព្ទដៃក៏ដោយ សកម្មភាពប្រឆាំងនឹងឥណ្ឌា នៅតែបន្តមាន ហើយភាគច្រើនកើតឡឡើងនៅក្នុងទីក្រុងធំជាងគេ Srinagar នៃតំបន់កាស្មៀកាន់កាប់ដោយឥណ្ឌា។ បើតាមទីភ្នាក់ងារព័ត៌មាន AFP ប្រភពរដ្ឋាភិបាលក្រុងញូវដែលីបញ្ជាក់ថា ការតវ៉ាមានចំនួន៧២២ ដងគិតចាប់តាំងពីថ្ងៃទី៥ ខែសីហា ដោយមានស្រុក Baramulla នៅភាគពាយព្យនិង Pulwama នៅភាគខាងត្បូងជាចំណុចដែលមានការតវ៉ាច្រើនបំផុតបន្ទាប់ពីតំបន់ Srinagar ។
ចាប់តាំងពីថ្ងៃនោះមក ជនស៊ីវិលជិត ២០០នាក់និ ងសមាជិកសន្តិសុខ ៤១៥នាក់បានរងរបួស។ នៅពីរសប្ដាហ៍ចុងក្រោយ មានអ្នកស្លាប់ ៥នាក់ ហើយមានជនស៊ីវិល ៩៥នាក់បានរងរបួស។ មកដល់ពេលនេះ មានមនុស្ស ៤១០០នាក់ ដែលក្នុងនោះមានអ្នកដឹកនាំនយោបាយក្នុងស្រុកចំនួន១៧០នាក់ផង ត្រូវបានឃុំខ្លួន។ ក្នុងរយៈពេល២សប្តាហ៍នេះទៀតសោត អាជ្ញាធរបានដោះលែងមនុស្ស ៣០០០នាក់ហើយ ប៉ុន្តែគេមិនទាន់ដឹងថា មានអ្នកនយោបាយរូបតំបន់ឬយ៉ាងណាឡើយ។
កាលពីខែសីហាកន្លងទៅ ឥណ្ឌាបានពង្រាយទ័ពជាច្រើន បន្ថែមពីលើទាហាន ៥០ម៉ឺននាក់ដែលមានឈរជើងរួចមកហើយនៅតាមតំបន់ដែលមានកម្លាំងយោធាច្រើនបំផុតមមួយរបស់ពិភពលោក។ ទំនាស់កាស្មៀរចុងក្រោយនេះ កើតឡើងក្រោយឥណ្ឌាប្រកាសដកឋានៈស្វ័យភាពរបស់តំបន់កាស្មៀរសែខ្លួនកាន់កាប់ ដែលធ្វើឲ្យប៉ាគីស្ថាន ខឹងសម្បារយ៉ាងខ្លាំង។
គួររំលឹកថា ប្រទេសជិតខាងដែលមានអាវុធនុយក្លេអ៊ែរគឺឥណ្ឌា និងប៉ាគីស្ថាននេះបានធ្វើសង្គាមពីរលើកហើយលើបញ្ហាទឹកដីកាស្មៀរ ដែលបែងចែករវាងប្រទេសទាំងពីរកាលពីឆ្នាំ ១៩៤៧៕
© រក្សាសិទ្ធិដោយ thmeythmey.com