អន្តរជាតិ
ការទូតដុល្លារ? ប៉េកាំងប្រាប់តៃវ៉ាន់ថា លុយមិនមែនអាចទិញអ្វីគ្រប់យ៉ាងបានឡើយ អ្នកស្រី Hua Chunying អ្នកនាំពាក្យក្រសួងការបរទេសចិន។ រូបភាពពីក្រសួងការបរទេសចិន
× ទីក្រុងប៉េកាំង ពិតជាពេញចិត្តពេញថ្លើមនឹងការសម្រេចចិត្តរបស់ប្រជុំកោះសូលូម៉ុនក្នុងការផ្ដាច់ទំនាក់ទំនងការទូតជាមួយតៃវ៉ាន់ និងត្រៀមខ្លួនភ្ជាប់ចំណងការទូតផ្លូវការជាមួយគ្នាឲ្យបានលឿន។ រឿងនេះ ធ្វើឲ្យតៃវ៉ាន់ក្ដៅស្លឹកត្រចៀកខ្លាំង និងចោទចិនចំៗថា ប្រើលុយដើម្បីទាក់ទាញសណ្ដានចិត្តប្រទេសផ្សេង។ តបការចោទប្រកាន់នេះ អ្នកនាំពាក្យក្រសួងការបរទេសចិនឆ្លើយវិញថា លុយមិនមែនសុទ្ធតែអាចទិញដូរអ្វីបានឡើយ។
លុយរបស់ចិន ជាមូលហេតុនាំឲ្យប្រជុំកោះសូលូម៉ុនផ្ដាច់ទំនាក់ទំនងជាតៃវ៉ាន់។ នេះជាការលើកឡើងរបស់មេដឹកនាំកំពូលៗរបស់តៃវ៉ាន់រួមទាំងប្រធានាធិបតី Tsai Ing-wen និងរដ្ឋមន្ត្រីការបរទេស Joseph Wu ផងដែរ។ ការសម្រេចចិត្តរបស់កោះតំបន់ប៉ាស៊ីហ្វិកមួយនេះ ធ្វើឲ្យមិត្តភក្តិតៃវ៉ាន់នៅលើពិភពលោកនៅសល់តែ១៦ប្រទេសទៀតប៉ុណ្ណោះ ហើយគ្រាន់ក្នុងអាណត្តិលោកស្រី Tsai ចិនទទួលបានមិត្តថ្មីបួនប្រាំប្រទេសទៅហើយ។
លុយជាធ្នាក់របស់ចិនទាក់ចិត្តប្រជុំកោះសូលូម៉ុន? មិនមែនទេ! នេះជាចម្លើយរបស់អ្នកស្រី Hua Chunying អ្នកនាំពាក្យក្រសួងការបរទេសចិនទៅនឹងការចោទប្រកាន់របស់តៃវ៉ាន់។ តាងនាមរដ្ឋាភិបាលចិន អ្នកស្រី Hua បង្ហាញក្ដីរីករាយដែលសូលូម៉ុន ផ្ដាច់ចំណងការទូតជាមួយតៃវ៉ាន់ ទទួលស្គាល់នយោបាយចិនតែមួយ និងចាត់ទុកប៉េកាំងជាតំណាងស្របច្បាប់តែមួយគត់របស់ចិនទាំងអស់ដូចប្រទេសចំនួន១៧៨ផ្សេងទៀត។
ក្នុងសន្និសីទសារព័ត៌មានថ្ងៃទី១៧ ខែកញ្ញា អ្នកនាំពាក្យដដែល បានវាយបកតៃវ៉ាន់រឿងការប្រើប្រាស់ពាក្យការទូតដុល្លារ។ ពាក្យនេះ ត្រូវបានតៃវ៉ាន់ប្រើសំដៅការយកលុយដើម្បីអូសទាញប្រទេសដទៃទៀតពីសំណាក់ចិនដីគោក។ មន្ត្រីក្រសួងការបរទេសចិនបញ្ជាក់ថា ដោយសារការទូតដុល្លារនេះ តៃវ៉ាន់មើលប្រទេសផ្សេងតាមចិត្តនឹកឃើញរបស់ខ្លួន ហើយមិនយល់ពីគោលការណ៍ខ្លះដែលមិនអាចទិញដោយលុយបានឡើយ សូម្បីតែការទុកចិត្តក៏ដោយ។
ឆ្លៀតពេលនេះ អ្នកស្រី Hua ក៏បានបកស្រាយការចោទប្រកាន់របស់តៃវ៉ាន់ពាក់ព័ន្ធការផ្ដល់ជំនួយដោយគ្មានចីរភាពនៅតំបន់ប៉ាស៊ីហ្វិកនេះ។ បើតាមអ្នកនាំពាក្យរូបនេះ ជំនួបដែលផ្ដល់ដោយចិន គឺធ្វើឡើងដោយម៉ត់ចត់តាំងពីដើមដល់ដំណាក់កាលចុងក្រោយ បន្ទាប់ពីសិក្សាលើហានិភ័យទាំងអស់ ហើយជំនួយផ្ដល់ឲ្យតែវិស័យចាំបាច់។ អ្នកនាំពាក្យរូបនេះអះអាងថា មកទល់ពេលនេះ ក៏មិនទាន់ប្រទេសណាធ្លាក់ចូលអន្ទាក់បំណុលអ្វីនោះដែរ។
ឯរឿងជាមួយកោះសូលូម៉ុនវិញ អ្នកស្រី Hua រំពឹងថា នឹងមានការភ្ជាប់ទំនាក់ទំនងការទូតផ្លូវការនៅពេលឆាប់ៗខាងមុខ។ ដោយអះអាងពីសក្ដានុពលនៃការបង្កើតទំនាក់ទំនងការទូតជាមួយចិនដែលមានប្រជាជន១,៤ពាន់លាននាក់នោះ មន្ត្រីនាំពាក្យដដែលបញ្ជាក់ថា ប្រជុំកោះសូលូម៉ុន នឹងទទួលបានប្រយោជន៍ និងឱកាសមិនធ្លាប់មានដើម្បីការអភិវឌ្ឍរបស់ខ្លួន ហើយចិនត្រៀមខ្លួនជាស្រេចដើម្បីបើកទំព័រទំនាក់ទំនងថ្មីជាមួយសូលូម៉ុន៕
Tag:
ចិន
តៃវ៉ាន់
សូលូម៉ុន
© រក្សាសិទ្ធិដោយ thmeythmey.com