ជាតិ
សង្គមជាតិ
តំបន់ពាមក្រសោបខេត្តកោះកុង ត្រូវបានបង្កើតជាតំបន់គ្រប់គ្រងដែនជម្រកសុវត្ថិភាពត្រីកាម៉ុង
× ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានបង្កើតតំបន់គ្រប់គ្រងដែនជម្រកសុវត្ថិភាពត្រីកាម៉ុងនៅពាមក្រសោប ខេត្តកោះកុង ដើម្បីរក្សានិងប្រើប្រាស់ត្រីកាម៉ុងប្រកបដោយនិរន្តរភាពស្របតាមគោលនយោបាយវិស័យជលផលជាតិ។ នេះតាមសេចក្ដីប្រកាសរបស់ក្រសួងកសិកម្ម កាលពីថ្ងៃទី១៦កញ្ញា ឆ្នាំ២០១៩។
ក្រសួងកសិកម្ម បាននិយាយថា គោលដៅនៃការបង្កើតតំបន់ត្រីកាម៉ុងនេះ គឺធានាឲ្យបាននូវប្រព័ន្ធអេកូឡូស៊ី នៃដែនជម្រកសុវត្ថិភាពត្រីកាម៉ុង និងការគ្របគ្រងផលស្កុកត្រីកាម៉ុងឲ្យបាននិរន្តរភាព។ ក្រៅពីនេះ គឺរួមចំណែកលើកកម្ពស់ជីវភាពរស់នៅប្រជាពលរដ្ឋនិងសហគមន៍មូលដ្ឋាន។
តំបន់ពាមក្រសោបនៃដែនគ្រប់គ្រងជម្រកត្រីកាម៉ុងមានទំហំ១២៨៣ហិកតា ស្ថិតនៅឃុំពាមក្រសោប ស្រុកមណ្ឌលសីមា ខេត្តកោះកុង។ តំបន់នេះ ត្រូវហាមឃាត់ការធ្វើនេសាទត្រីកាម៉ុង ចាប់ពីថ្ងៃទី១ ធ្នូ ដល់៣១ មីនា ជារៀងរាល់ឆ្នាំ លើកលែងមានតែការអនុញ្ញាតពីរដ្ឋមន្រី្តក្រសួងកសិកម្ម ក្នុងសកម្មភាពធ្វើការពិសោធិ៍ស្រាវជ្រាវបច្ចេកទេសវិទ្យាសាស្ត្រជលផល។ នេះបើតាមក្រសួងកសិកម្ម។
សេចក្តីប្រកាសរបស់ក្រសួងកសិកម្ម បានបញ្ជាក់ថា ៖«រដ្ឋបាលជលផលនិងរដ្ឋបាលខេត្តកោះកុង ដោយសហការជាមួយសមត្ថកិច្ចពាក់ព័ន្ធ មានភារកិច្ចរៀបចំយន្តការគ្រប់គ្រង អនុវត្តផែនការគ្រប់គ្រង ក្រុមល្បាតនិងបំពាក់បរិក្ខារល្បាត។ លើសពីនេះ គឹជាអ្នកបោះបង្គោលព្រំប្រទល់ សិក្សាស្រាវជ្រាវបច្ចេកទេស តាមដានលក្ខណៈជីវសាស្ត្រ និងផលស្តុកត្រីកាម៉ុងក្នុងធម្មជាតិ»។
បន្ថែមពីនេះរដ្ឋបាលជលផល រដ្ឋបាលខេត្តកោះកុង និងអង្គភាពពាក់ព័ន្ធ ត្រូវអប់រំនិងផ្សព្វផ្សាយដល់ប្រជានេសាទ និងអ្នកពាក់ព័ន្ធផ្សេងៗអំពីសារប្រយោជន៍នៃដែនជម្រកសុវត្ថិភាពត្រីកាម៉ុង។ ជាពិសេស ត្រូវស្វែងរកជំនួយនិងកិច្ចសហការពីដៃគូងភិវឌ្ឍន៍ អង្គការជាតិ អង្គការអន្តរជាតិ និងសប្បុរសជននានា ដើម្បីគាំទ្រផ្ដល់មូលនិធិទ្រទ្រង់សកម្មភាពគ្រប់គ្រងក្នុងតំបន់គ្រប់គ្រងដែនសុវត្ថិភាពត្រីកាម៉ុង។ នេះបើតាមក្រសួងកសិកម្ម៕
Tag:
ខេត្តកោះកុង
ជម្រកត្រី
ត្រីកាម៉ុង
© រក្សាសិទ្ធិដោយ thmeythmey.com