ពីនេះ ពីនោះ
ព័ត៍មានសុខភាព
សញ្ញា(›) និងសញ្ញា(‹) សម្រាប់ប្រើខុសគ្នាដូចម្តេច?
× សិស្ស និស្សិតដែលសិក្សាផ្នែកអក្សរសាស្ត្រ និងគណិតវិទ្យា ប្រាកដជាដឹងច្បាស់ពីរបៀបប្រើប្រាស់សញ្ញាទាំងពីរនេះហើយ។ ប៉ុន្តែ ក៏នៅមានពលរដ្ឋមួយចំនួនមានភាពស្រពេចស្រពិលក្នុងការប្រើប្រាស់ សញ្ញាទៅជា ឬធំជាង(›) និងសញ្ញាមកពី ឬតូចជាង(‹) នេះនៅឡើយទេ។
ក្រុមប្រឹក្សាជាតិភាសាខ្មែរ បានបញ្ជាក់ពីរបៀបប្រើប្រាស់សញ្ញាទាំងពីរនេះសម្រាប់ប្រើនៅក្នុងអក្សរសាស្ត្រខ្មែរ និងគណិតវិទ្យា។ សញ្ញា(›)សម្រាប់ប្រើនៅក្នុងអក្សរសាស្ត្រខ្មែរ ជាសញ្ញាសម្គាល់ថា «ទៅជា គឺក្លាយទៅជា ឬប្រែទៅជា»។ ឧទាហរណ៍៖ ដេក+ {ប៉-}› ផ្តេក (ដេក ក្លាយទៅជា ផ្តេក)។ រុក{-ន}›រនុក។ ម្យ៉ាងទៀត គេក៏អាចប្រើជាសញ្ញាព្រួញ (→) ជួសសញ្ញា(›)ទៅជា ក៏បានដែរ។ ឧទាហរណ៍៖ ដេក+{ប៉-}→ ផ្តេក។
សញ្ញា(›) សម្រាប់ប្រើនៅក្នុងគណិតវិទ្យាវិញ ជាសញ្ញាសម្គាល់ថា«ធំជាង» មានន័យថា ចំនួន ឬលទ្ធផលគណនាចំនួននៅខាងឆ្វេងធំជាង ចំនួន ឬលទ្ធផលគណនាចំនួន ដែលនៅខាងស្តាំសញ្ញា។ ឧទាហរណ៍៖ ៥+៧ ›១០។
សម្រាប់សញ្ញា (‹) សម្រាប់ប្រើនៅក្នុងអក្សរសាស្ត្រខ្មែរ មានន័យថា«មកពី»គឺពាក្យ ឬកន្សោមពាក្យ ឬល្បះនៅខាងឆ្វេងសញ្ញានេះមកពីពាក្យ ឬកន្សោមពាក្យ ឬល្បះដែលនៅខាងស្តាំសញ្ញានេះ។ ឧទាហរណ៍៖ វប្បធម៌‹ វប្ប+ធម៌(ពាក្យ វប្បធម៌ ផ្សំពីពាក្យ វប្ប និងធម៌)។ ក្នុងត្រង់ចំណុចនេះ គេក៏អាចប្រើជាសញ្ញា (←) ក៏បាន។ ឧទាហរណ៍៖ វប្បធម៌←វប្ប+ធម៌។
បើគេប្រើសញ្ញា(‹)នេះនៅក្នុងគណិតវិទ្យាវិញ សម្រាប់សម្គាល់លើ «ចំនួន ឬលទ្ធផលគណនាចំនួននៅខាងឆ្វេងតូចជាងចំនួន ឬលទ្ធផលគណនាចំនួននៅខាងស្តាំ»។ ឧទាហរណ៍៖ ៥+៧ ‹១៥។ នេះបើតាមការបញ្ជាក់ពីក្រុមប្រឹក្សាជាតិភាសាខ្មែរដដែល៕
© រក្សាសិទ្ធិដោយ thmeythmey.com