អន្តរជាតិ
យុវតី Greta Thunberg ប្រាប់មេដឹកនាំពិភពលោកនៅ UN៖ «យើងកំពុងតាមដានអ្នក» សកម្មជនបរិស្ថាន Greta Gunberg ថ្លែងសន្ទុរកថា នៅកិច្ចប្រជុំកំពូលស្តីពីអាកាសធាតុ UN ថ្ងៃ ២៣ កញ្ញា ២០១៩
× សកម្មជនបរិស្ថាន Greta Thunberg បានបង្កើតសុន្ទរកថាដ៏មានឥទ្ធិពលមួយទៅបណ្តាមេដឹកនាំពិភពលោក ដែលមានវត្តមាននៅទីស្នាក់ការកណ្តាលអង្គការសហប្រជាជាតិ នៅថ្ងៃចន្ទ ទី ២៣ កញ្ញា ដោយចោទប្រកាន់ពួកគេថា បរាជ័យចាត់វិធានការលើបញ្ហាបម្រែបម្រួលអាកាសធាតុ។ Thunberg ចោទសួរចំៗថា៖«ហេតុដូចម្ដេចអ្នកហ៊ានបែបនេះ?»។
នៅចំពោះមុខមេដឹកនាំប្រមាណ៦០ នាក់ មកពីជុំវិញពិភពលោក យុវតីជនជាតិស៊ុយអែត វ័យ ១៦ ឆ្នាំ Greta Thunberg និយាយទាំងក្តុកក្តួលថា៖«នេះគឺខុសទាំងស្រុង។ ខ្ញុំពុំគួរអង្គុយនៅទីនេះឡើយ។ ខ្ញុំគួរត្រលប់ទៅសាលារៀននៅជ្រុងម្ខាងនៃមហាសមុទ្រ ប៉ុន្តែអ្នកទាំងអស់គ្នាមករកពួកយើងជាមនុស្សវ័យក្មេងសម្រាប់ក្តីសង្ឃឹមទៅវិញ។ ហេតុដូចម្តេចអ្នកហ៊ានបែបនេះ?»។
«អ្នកបានលួចក្តីសុបិន និងកុមារភាពខ្ញុំ ជាមួយពាក្យមិនបានការរបស់អ្នក»។ Thunberg និយាយបែបនេះ ដោយបានទទូចឲ្យមេដឹកនាំទាំងនេះដាក់ចេញវិធានការជាបន្ទាន់ដើម្បីប្រយុទ្ធប្រឆាំងបញ្ហាប្រែបម្រួលអាកាសធាតុ។ ត្រង់នេះ យុវតីក្លាហានរូបនេះ សង្កត់ធ្ងន់ថា៖«យើងកំពុងតាមដានអ្នក»។
«យើងកំពុងស្ថិតនៅត្រង់ចំណុចផ្តើមនៃការផុតពូជ [មនុស្សជាតិ] ហើយរឿងដែលអ្នកអាចនិយាយបាន គឺ លុយនិងកំណើនសេដ្ឋកិច្ច»។ យុវតី Thunberg លើកឡើងបែបនេះ ដោយស្រែកថា៖«ហេតុដូចម្តេចអ្នកហ៊ានធ្វើបែបនេះ!»។
Thunberg បានក្លាយបុគ្គលដ៏លេខធ្លោលើឆាកអន្តរជាតិ ចំពោះមុខកំណើននៃចលនាយុវជនប្រឆាំងភាពអសកម្មរបស់ពិភពលោកចំពោះបញ្ហាបម្រែបម្រួលអាកាសធាតុ។ កាលពីថ្ងៃសុក្រសប្តាហ៍មុន មនុស្សរាប់លាននាក់ បានចូលរួមតវ៉ានៅទូទាំងពិភពលោកសម្រាប់បុព្វហេតុនេះ។
តាមការចុះផ្សាយរបស់ទីភ្នាក់ងារព័ត៌មាន AFP អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គុយតេរ៉េស (António Guterres) ដែលជាអ្នករៀបចំជំនួបកំពូលស្តីពីអាកាសធាតុឆ្នាំ២០១៩នេះ បាននិយាយថា ពិភពលោក ស្ថិតក្នុងរណ្ដៅអាកាសធាតុដ៏ជ្រៅមួយ ហេតុដូច្នេះ សកម្មភាពបន្ទាន់ ត្រូវការដាក់ចេញជាចាំបាច់។ ត្រង់នេះ លោក គូសបញ្ជាក់ថា៖«ពេលវេលាជិតអស់ហើយ ប៉ុន្តែវាមិនទាន់យឺតពេលឡើយ»។
អធិបការបតីអាល្លឺម៉ង់ អែនជែឡា មឺហ្គែល (Angela Markel) និយាយថា ប្រទេសលោកស្រី នឹងបង្កើនលុយទ្វេដង ដល់ ៤,៤ពាន់លានដុល្លារ ក្នុងការតាំងចិត្តផ្នែកហិរញ្ញវត្ថុដើម្បីប្រយុទ្ធបញ្ហាការឡើងកម្តៅផែនដី។ ចំណែក ប្រធានាធិបតីបារាំង អេម៉ានុយអែល ម៉ាក្រុង លើកឡើងថា អង្គការអន្តរជាតិ ដូចជា ធនាគារពិភពលោក ជាដើម បានសន្យាផ្តល់ជំនួយ ៥០០លានដុល្លារទៀត ដើម្បីការពារព្រៃត្រូពិក។
មេដឹកនាំប្រេស៊ីល និងអូស្ត្រាលី អវត្តមានក្នុងជំនួបកំពូលនេះ។ ចំណែកចិនបានឲ្យរដ្ឋមន្ត្រីការបរទេសមកជំនួស។ ប្រធានាធិបតីអាមេរិក ដូណាល់ ត្រាំ ដែលគេរំពឹងថា មិនចូលរួមស្តាប់កិច្ចប្រជុំកំពូលនេះទាំងស្រុងនោះ បានបង្ហាញខ្លួនដោយយ៉ាងភ្ញាក់ផ្អើល តែរយៈពេលខ្លីប៉ុណ្ណោះ៕
Tag:
Greta Thunberg
UN
បម្រែបម្រួលអាកាសធាតុ
© រក្សាសិទ្ធិដោយ thmeythmey.com