ក្រសួងពាណិជ្ជកម្មថៃរៀបចំពិព៍រណ៌អន្តរជាតិ «STYLE BANGKOK» ក្នុងខែតុលានេះ

អត្ថបទពាណិជ្ជកម្ម

ក្រសួងពាណិជ្ជកម្មថៃរៀបចំពិព៍រណ៌អន្តរជាតិ «STYLE BANGKOK» ក្នុងខែតុលានេះ

26, Sep 2019 , 9:13 am

រូបភាព

ដោយ: ថ្មីៗ

ពិព័រណ៍ពាណិជ្ជកម្មអន្តរជាតិ «Style Bangkok October 2019» នឹងត្រូវប្រព្រឹត្តទៅពីថ្ងៃទី១៧ ដល់ថ្ងៃទី២១ខែតុលាឆ្នាំ២០១៩ នៅឯមជ្ឈមណ្ឌលសន្និសីទ និងពាណិជ្ជកម្មអន្តរជាតិតំបន់Bangna នាទីក្រុងបាងកកប្រទេសថៃ។ គឺជាព្រឹត្តិការណ៍ពិព័រណ៍ដែលនឹងបង្ហាញអំពីផលិតផលទំនើប និងដែលមាន ការ ច្នៃម៉ូតប្លែកៗ ដែលជួយបង្កើនភាពស្រស់ស្អាតនៃការរស់នៅរបស់មនុស្ស ដូចជា សម្លៀកបំពាក់ គ្រឿងសង្ហារឹម ការតុបតែងក្នុងគេហដ្ឋានជាដើម។

នាយកដ្ឋានជំរុញពាណិជ្ជកម្មអន្តរជាតិនៃក្រសួងពាណិជ្ជកម្មថៃដែលជាអ្នករៀបចំពិព័រណ៍ដែលមាន១៨០០ស្តង់នេះបានរំពឹងថា វានឹងមានអ្នកចូលរួមចំនួន៥ម៉ឺននាក់មកពី៧០ប្រទេសលើពិភពលោក ដើម្បីទិញដូរទំនិញដែលនឹងត្រូវបានដាក់តាំងបង្ហាញទាំងនោះ។ ការតាំងពិព័រណ៍ពាណិជ្ជកម្មនេះមានគោលដៅទីមួយ គឺពង្រីកមុខមាត់ប្រទេសថៃជាគោលដៅទំនិញបែបអន្តរជាតិ (international lifestyle products) ទីពីរពង្រឹងស្ថិរភាពសេដ្ឋកិច្ច និងចុងក្រោយគឺបង្កើនតម្លៃនៃការនាំចេញសរុបមិនឱ្យតិចជាង៣ភាគរយ។

លោកស្រី Banjongjitt Angsusingh អគ្គនាយិកានៃនាយកដ្ឋានជំរុញពាណិជ្ជកម្មអន្តរជាតិនៃក្រសួងពាណិជ្ជកម្មថៃបានថ្លែងនៅក្នុងសន្និសីទកន្លងមកថា នាយកដ្ឋានរបស់លោកស្រីបានដើរតួនាទីសំខាន់ក្នុងការទ្រទ្រង់សេដ្ឋកិច្ចរបស់ប្រទេសថៃតាមរយៈការជំរុញការនាំចេញ និងការនាំផលិតផលថៃចូលក្នុងទីផ្សារអន្តរជាតិ។ លោកស្រីបានបញ្ជាក់ផងដែរថា នៅក្នុងឆ្នាំ២០១៨កន្លងទៅ ការនាំចេញផលិតផល lifestyleរបស់ប្រទេសថៃមានទំហំជាង១២ពាន់លានដុល្លារ ដែលស្មើនឹងជិត៥ភាគរយនៃការនាំចេញសរុប។

លោកស្រីអគ្គនាយិការបានមានប្រសាសន៍ឱ្យដឹងផងដែរថា៖«ការតាំងពិព័រណ៍ពាណិជ្ជកម្មផ្នែក Lifestyle បានក្លាយជាឱកាសនៃការជំរុញការនាំចេញ និងកំណើនសេដ្ឋកិច្ច។ កាលពីខែមេសាកន្លងទៅនេះ ការតាំងពិព័រណ៍ពាណិជ្ជកម្ម Style Bangkok ប្រកបដោយជោគជ័យសម្រាប់សហគ្រិន សិប្បករ អ្នកនាំចេញ នាំចូល អ្នកច្នៃម៉ូត ទាំងជនជាតិថៃ និងបរទេស ដោយបានទាក់ទាញអ្នកចូលរួមជាង៤៥០០០នាក់ ហើយមានការទិញដូររហូតដល់ជាង២ពាន់លានបាតទៀតផង។»។

Style Bangkok October 2019 នឹងប្រព្រឹត្តទៅពីថ្ងៃទី១៧ដល់ថ្ងៃទី២១ខែតុលានៅមជ្ឈមណ្ឌលសន្និសីទនិងពាណិជ្ជកម្មអន្តរជាតិបាងកក។ ក្នុងរយៈពេល៣ថ្ងៃដំបូង គឺពីថ្ងៃទី១៧ដល់ទី១៩ តុលា នឹងត្រូវត្រៀមសម្រាប់ការក្រុមធុរជន ចំណែកឯថ្ងៃ២០ដល់ថ្ងៃ២១តុលា នឹងត្រូវបើកសម្រាប់សាធារណជនទស្សនា។