អន្តរជាតិ
មហាសេដ្ឋី លី កាស៊ីង នឹងបរិច្ចាគប្រាក់១២៨លានដុល្លារជួយសហគ្រាសក្នុងក្រុងហុងកុង លោក លី កាស៊ីង, រូបភាព (Bloomberg)
× លោក លី កាស៊ីង (Li Ka-shing) បុរសមានជាងគេប្រចាំហុងកុង នឹងបរិច្ចាគទឹកប្រាក់ ១ពាន់លានដុល្លារហុងកុង ឬប្រមាណជា ១២៨ លានដុល្លារអាមេរិក ដើម្បីជួយជំរុញជំនួញខ្នាតតូច និងមធ្យម បន្ទាប់ពីសេដ្ឋកិច្ចក្នុងទីក្រុងកំពុងជួបវិបត្តិ ដោយសារតែការតវ៉ារបស់ក្រុមបាតុករ។ នេះបើតាមការអះអាងរបស់មូលនិធិរបស់លោកលី នៅថ្ងៃទី៤ ខែតុលា។
បន្ទាប់ពីវិបត្តិនយោបាយនៅក្នុងទីក្រុងហុងកុង ធ្លាក់កាន់តែជ្រៅ ភាពដុនដាបខាងសេដ្ឋកិច្ចក៏កាន់តែយ៉ាប់យ៉ឺន ជាពិសេសគឺសហគ្រាសខ្នាតតូច និងមធ្យមកំពុងជួបបញ្ហា ដោយសារតែបាតុកម្មបានអូសបន្លាយជាច្រើនខែ។
ដើម្បីជួយសង្គ្រោះនូវជំនួញខ្នាតតូច និងមធ្យមពីវិបត្តិ ដែលមិនធ្លាប់មានពីមុនមកនេះ មូលនិធិរបស់លោកលី កាស៊ីង នឹងបរិច្ចាគទឹកប្រាក់ មួយពាន់លានដុល្លារហុងកុង ដើម្បីដោះស្រាយបញ្ហាទាំងឡាយ ដែលកំពុងប្រឈមក្នុងទីក្រុង។ នេះបើផ្អែកទៅតាមការចុះផ្សាយរបស់ទីភ្នាក់ងារសារព័ត៌មាន Reuters។
ជាការពិត រដ្ឋាភិបាលទីក្រុងប៉េកាំង បានដាក់សម្ពាធកាន់តែធ្ងន់ឡើងៗមកលើមហាសេដ្ឋី និងអ្នកអភិវឌ្ឍអចលនវត្ថុ លោក លី កាស៊ីង បន្ទាប់ពីបុរសរូបនេះ មិនអាចជួយបន្ធូរបន្ថយបញ្ហាបាននៅក្នុងទីក្រុងហុងកុង។ ជាក់ស្តែង កាលពីខែសីហា គណៈកម្មាការកណ្តាលកិច្ចការច្បាប់ និងនយោបាយរបស់ចិន បានចាត់ទុកលោកលី ថាជា «ជម្រកបទឧក្រិដ្ឋ» បន្ទាប់ពីលោកទទូចឲ្យរដ្ឋាភិបាលមានការប្រោសប្រណីចំពោះក្រុមយុវជនដែលធ្វើសកម្មភាពតវ៉ា។
ប៉ុន្តែលោកក៏មានការស្តាយក្រោយផងដែរ នូវអ្វីដែលលោកបាននិយាយសំដៅទៅក្រុមបាតុករ ថាជាការបកស្រាយខុស ហើយលោកបាននិយាយម្តងទៀតថា សកម្មភាពទាំងឡាយណា ដែលប្រឆាំងនឹងអធិបតេយ្យភាព គឺមិនអាចអត់ឱនបានឡើយ។
សូមបញ្ជាក់ថា ការបរិច្ចាគ ក្នុងគោលបំណងជួយសហគ្រាសខ្នាតតូច និងមធ្យមនេះ គឺធ្វើឡើង បន្ទាប់ពីក្រុមហ៊ុនអចលនវត្ថុ New World Development និយាយថា ខ្លួននឹងផ្តល់ដីកសិដ្ឋានបម្រុងជាង ៩១ម៉ឺនម៉ែត្រការ៉េសម្រាប់សង្គមកិច្ចផងដែរ៕
© រក្សាសិទ្ធិដោយ thmeythmey.com