ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
បទយកការណ៍ / បទសម្ភាសន៍
អ្នកស្រី ស្រ៊ាត មុំសុភា តស៊ូពីបុគ្គលិកធម្មតារហូតក្លាយជាសហគ្រិនឆ្នើមនៅកម្ពុជា
06, Oct 2019 ,
5:29 pm
រូបភាព
×
ដោយ:
ភ្នំពេញ៖ អ្នកស្រី ស្រ៊ាត មុំសុភា ដើមឡើយគ្រាន់តែជាបុគ្គលិកធម្មតាម្នាក់ ប៉ុន្តែបច្ចុប្បន្ន អ្នកស្រីបានក្លាយជាអ្នកជំនួញលេចធ្លោម្នាក់ ដែលបានក្តោបក្តាប់ក្រុមហ៊ុនទេសចរណ៍ដ៏ធំមួយ និងហាងស្ប៉ា៣សាខានៅភ្នំពេញ។ បើតាមស្ត្រីអ្នកខេត្តត្បូងឃ្មុំរូបនេះ ទម្រាំទទួលបានជោគជ័យមកដល់បច្ចុប្បន្ន អ្នកស្រីបានហែលឆ្លងរឿងរ៉ាវលំបាកជាច្រើន។ ប៉ុន្តែឱកាសធ្វើការជានារីអាកាសចរណ៍អស់រយៈពេលឆ្នាំ២ បានធ្វើឲ្យអ្នកស្រីអាចសន្សំទុន និងស្វែងយល់ពីវិស័យទេសចរណ៍បានយ៉ាងទូលំទូលាយ រហូតមានលទ្ធភាពបើកក្រុមហ៊ុនទេសចរណ៍ដែលបានពង្រីកខ្លួនជាបន្តបន្ទាប់រហូតមកដល់សព្វថ្ងៃ។
ជាបន្តសូមអញ្ជើញស្តាប់ជីវព័ត៌មានដែលរៀបចំដោយ លោក រ៉ឹម ភារី នៃសារព័ត៌មានអេឡិចត្រូនិកថ្មីៗដូចតទៅ៖
អ្នកស្រី ស្រ៊ាត មុំសុភា ត្រូវបានមជ្ឈដ្ឋានអ្នកជំនួញចាត់ទុកថា ជាសហគ្រិនជើងខ្លាំងមួយរូបដែលបានចាប់ផ្តើមបើកក្រុមហ៊ុនត្រឹមដើមទុន២ពាន់ដុល្លារ និងមានបុគ្គលិកតែ៣នាក់ រហូតមានបុគ្គលិកលើស៥០នាក់ និងអាចឈរជើងក្នុងផ្សារយ៉ាងរឹងមាំអស់រយៈពេលជាង១ទសវត្ស៍។ អ្នកស្រីជាប្រធានក្រុមហ៊ុន SOPHIYA Travel & Tour ដែលមានការិយាល័យសហការនៅប្រទេសជាច្រើនជុំវិញពិភពលោក និងជាស្ថាបនិកហាងស្ប៉ាយីហោ U & ME ដែលមានសាខាចំនួន៣នៅភ្នំពេញ។
ក្នុងបទសម្ភាសជាមួយសារព័ត៌មានថ្មីៗ នៅទីស្នាក់ការកណ្តាលក្រុមហ៊ុនសុហ្វីយ៉ា ក្នុងសង្កាត់បឹងកេងកេង១ ខណ្ឌចំការមន អ្នកស្រី ស្រ៊ាត មុំសុភា បានអះអាងថា មុនក្លាយជាម្ចាស់ក្រុមហ៊ុនដែលមានឈ្មោះបោះសំឡេងមកដល់បច្ចុប្បន្ន អ្នកស្រីបានជម្នះឧបសគ្គជាច្រើន។
អ្នកស្រីអះអាងយ៉ាងដូច្នេះថា៖ «កាលនោះ ខ្ញុំជួលOffice មួយខែ១៥០ដុល្លារ ទិញកុំព្យូទ័រ២គ្រឿង មួយគ្រឿងតម្លៃប្រហែលជាង២០០ដុល្លារ មានម៉ាស៊ីនព្រីន តុ ទូ កៅ ប្រហែលអស់ជាង១ពាន់ដុល្លារ។ លុយហ្នឹង យើងបង្វិលលុយចុះឡើងជាង២ពាន់ដុល្លារ ព្រោះធម្មតា ទិញសំបុត្រយន្តហោះ គេទិញឲ្យយើងសល់លុយចំណេញ លក់សំបុត្រឡាន សំបុត្រទូក ធ្វើវីសា លិខិតឆ្លងដែន ពោលវាជាសេវាកម្ម។ កាលនោះ បើខ្ញុំជឿមិត្តភក្តិ ក៏ខ្ញុំអត់មានថ្ងៃហ្នឹងដែរ។ ពេលធ្វើការលើយន្តហោះមានមិត្តភក្តិច្រើន។ ខ្ញុំបានសួរយោបល់មនុស្សបីបួននាក់ ថា ខ្ញុំចង់បើកក្រុមហ៊ុនរកស៊ីខ្លួនឯង។ តែពួកគេថា បើកធ្វើអី គេបិទចង់អស់ហើយ។ សម័យហ្នឹង កើតជំងឺផ្តាសាយបក្សី អ្នកទេសចរធ្លាក់ចុះមែន។ អ៊ីចឹងជាកាលៈទេសៈមួយ ដែលBusiness វា Down។ តែខ្ញុំមានជំនឿចិត្តលើខ្លួនឯងថា យើងមានដើមទុនតិច ពេលខាតក៏តិចដែរ។ តែបើយើងអត់ដែលចាប់ផ្តើម ប្រហែលជាអត់រហូត។ ហើយបើចាំតិចទៀត លុយប៉ុណ្ណឹងក៏ធ្វើអីអត់កើតដែរ»។
តាមពិតទៅ ការរកស៊ីមិនមែនជាបំណងរបស់សុភានោះទេ ប៉ុន្តែ នាងមានបំណងធ្វើការក្នុងធនាគារ។ ជាកូនទីពីរក្នុងចំណោមបងប្អូន៣នាក់ក្នុងគ្រួសារមួយនៅខេត្តត្បូងឃ្មុំ សុភាបានចាកចេញពីស្រុកកំណើត មកជ្រកកោនជាមួយបងប្អូនជីដូនមួយនៅភ្នំពេញ ក្រោយពីម្តាយបានចែកផ្លូវគ្នាជាមួយឪពុក។
បន្ទាប់ពីរៀនចប់បាក់ឌុបនៅភ្នំពេញ សុភា ដែលមានរូបសម្ផស្សស្រស់ស្អាតផងនោះ បានស្រឡាញ់ និងចាប់ចិត្តជំនាញធនាគារ និងហិរញ្ញវត្ថុ ហើយនាងបានរៀនជំនាញនេះរហូតទទួលបានសញ្ញាបត្របរិញ្ញាផងដែរ។
ទន្ទឹមនឹងការសិក្សាបរិញ្ញាបត្រក្នុងគ្រាដែលជីវភាពមានការលំបាកផង នាងបានដើរដាក់ពាក្យធ្វើការចំនួន៥០លើក ទើបទទួលបានការងារដំបូង ផ្នែករដ្ឋបាលនៅរោងចក្រកាត់ដេរមួយ។ ប៉ុន្តែនាងបោះបង់ការងារនេះ ដោយស្រវាការងារថ្មីនៅក្រុមហ៊ុនទេសចរណ៍ដ៏ធំមួយរបស់កូរ៉េខាងត្បូង។ បន្ទាប់មក នាងប្រឡងជាប់ការងារជានារីអាកាសចរណ៍ ដែលនាងមិនដែលនឹកស្រមៃទាល់តែសោះ។
ការងារជានារីអាកាសចរណ៍ ជាឱកាសដ៏ល្អក្នុងការសន្សំទុន និងបង្កើតបណ្តាញ
បើតាមអ្នកស្រី ស្រ៊ាត មុំសុភា ការដាក់ពាក្យចូលធ្វើការងារនៅក្រុមហ៊ុនអាកាសចរណ៍ ក៏ព្រោះតែអ្នកស្រីចង់បំពេញបំណងបងស្រីរបស់ខ្លួន ដែលកាលនោះបានដាក់ពាក្យធ្វើការនេះជាញឹកញាប់ តែមិនបានជាប់។ ទោះយ៉ាងណា ការងារជានារីអាកាសចរណ៍រយៈពេល២ឆ្នាំនេះហើយ ជាឱកាសដ៏ល្អសម្រាប់អ្នកស្រីអាចសន្សំទុន និងមានទំនាក់ទំនងជាមួយមនុស្សជាច្រើន ព្រមទាំងបានស្វែងយល់ពីជំនួញក្នុងវិស័យទេសចរណ៍បានយ៉ាងទូលំទូលាយ។
អ្នកស្រីបានបញ្ជាក់យ៉ាងដូច្នេះថា៖ «ទោះខ្ញុំអត់ដែលស្រមៃ និងអត់ដែលគិតមែន តែពេលប្រឡងជាប់ រំភើបដែរណា ដោយបានឆ្លងកាត់ការសម្ភាស និងធ្វើតេស្តតឹងរឹងខ្លាំង ព្រោះជាក្រុមហ៊ុនអន្តរជាតិមួយដែរ។ គេសម្ភាស ថ្លឹងគីឡូ ពិនិត្យស្បែក មិនមែនតែសម្ផស្សស្អាតតែមួយមុខនោះទេ។ កាលណាយើងមានសម្លាកធំពេក យើងធ្វើការលើអាកាសអត់កើតទេ ហើយវាមានភាពមិនល្អមើលដែរ វាអត់ស្អាត។ ហើយគេធ្វើតេស្តជាភាសាអង់គ្លេស និងភាពវៃឆ្លាត ព្រោះ ការងារជានារីអាកាសចរណ៍ត្រូវមានទំនួលខុសត្រូវខ្ពស់។ បន្ទាប់ពីជាប់ហើយ គេបញ្ជូនខ្ញុំទៅរៀននៅប្រទេសថៃ៣ខែ ទើបចេញមកធ្វើការងារ។ ខ្ញុំចាប់ផ្តើមយល់ពីតម្លៃនៃការងារហ្នឹងច្បាស់ជាងមុន មានកម្លាំងចិត្ត និងទឹកចិត្តជាងមុន ព្រោះទីមួយ៖ ប្រាក់ខែក៏ខ្ពស់ ទីពីរ៖ការងារល្អ ទីបី៖យើងចាប់ផ្តើមអភិវឌ្ឍន៍ខ្លួនឯង មើលឃើញពិភពលោកទូលំទូលាយជាងមុន ចំណេះដឹងយើងក៏កើនជាងមុន ភាពទំនាក់ទងជាមួយមនុស្សក៏ល្អជាងមុន។ ហើយវាបានជំរុញទឹកចិត្តនៃក្តីស្រមៃកាលខ្ញុំធ្វើការងារនៅក្រុមហ៊ុនទេសចរណ៍ ថាថ្ងៃណាមួយ បើខ្ញុំមានលទ្ធភាព ខ្ញុំនឹងបើកក្រុមហ៊ុនទេសចរណ៍មួយដោយខ្លួនឯង»។
នៅក្នុងឆ្នាំ២០០៥ អ្នកស្រី ស្រ៊ាត មុំសុភា ក៏បានធ្វើការលើយន្តហោះបណ្តើរ និងបានបង្កើតក្រុមហ៊ុនសុហ្វីយ៉ាដោយទទួលបានភាពជោគជ័យជាបន្តបន្ទាប់។ បច្ចុប្បន្ន អ្នកស្រីបានពង្រីកក្រុមហ៊ុនទេសចរណ៍របស់ខ្លួន ដែលចាប់ផ្តើមពីដើមទុនដ៏ស្តួចស្តើង រហូតមានការិយាល័យសហការ ជាច្រើននៅបណ្តាប្រទេសនានាជុំវិញពិភពលោក។ ក្រៅពីក្តោបក្តាប់ក្រុមហ៊ុនទេសចរណ៍ដ៏ធំមួយហើយនោះ ស្ត្រីកូនមួយរូបនេះ ក៏ជាស្ថាបនិកហាងស្ប៉ា U & ME ដែលបានដំណើរការតាំងពីឆ្នាំ២០០៨ ហើយមកដល់សព្វថ្ងៃនេះ មានសាខាចំនួន៣នៅភ្នំពេញ និងមានប្រាក់ចំណេញក្រាស់ក្រែលដែរ។
ជាជំហ៊ានៗ ក្រៅពីមានជំនួញក្នុងដៃហើយនោះ អ្នកស្រី ស្រ៊ាត មុំសុភា ដែលមានវ័យ៣៧ឆ្នាំ ត្រូវបានគេចាត់ទុកថា ជាសហគ្រិនស្ត្រីខ្មែរដ៏ឆ្នើមម្នាក់ តាមរយៈការកាន់តំណែងសំខាន់ៗមួយចំនួន។ អ្នកស្រីជាអនុប្រធានសមាគមសហគ្រិនស្ត្រីកម្ពុជា ដែលមានសមាជិក៥០០ក្រុមហ៊ុន ជាតំណាងបណ្តាញសហគ្រិនស្ត្រីប្រចាំតំបន់អាស៊ាន(AWEN) និងចុងក្រោយនេះអ្នកស្រីជាស្ត្រីម្នាក់ក្នុងចំណោមអ្នកជំនួញស្ត្រីទាំង១២នាក់ ដែលត្រូវបានស្ថានទូតអាមេរិកប្រចាំនៅកម្ពុជាអញ្ជើញឲ្យចូលរួមកម្មវិធីការពង្រឹងអំណាចរបស់សហគ្រិនស្ត្រីនៅកម្ពុជា នៅសហរដ្ឋអាមេរិក ព្រមទាំងបានចូលរួមចំណែកជួយសង្គមជាច្រើន រហូតទទួលបានងារជាឧកញ៉ាពីព្រះមហាក្សត្រនៅក្នុងឆ្នាំ២០១៤ទៀតផង។
ចង់ក្លាយជាសហគ្រិនជោគជ័យ បើមានឱកាស ត្រូវហ៊ានសម្រេចចិត្តធ្វើវា
ក្រោយប្រឡូកក្នុងមុខជំនួញជាង១ទសវត្ស៍ អ្នកស្រី ស្រ៊ាត មុំសុភា បានអះអាងថា ភាពជោគជ័យរបស់ខ្លួនបានមកពីការចាប់ឱកាស និងភាពក្លាហានក្នុងការសម្រេចចិត្តលើកិច្ចការនានា។ បើតាមសហគ្រិនស្ត្រីដែលមានអត្តចរិតម៉ត់ចត់ និងប៉ិនវោហាររូបនេះ ការមានជំហរច្បាស់លាស់ និងហ៊ានធ្វើការសម្រេចនេះហើយ ទើបជាចរិតរបស់សហគ្រិនជោគជ័យ។ ក្រោយបង្កើតអាជីវកម្មហើយនោះ ការដំណើរការអាជីវកម្មឲ្យមានប្រាក់ចំណេញ និងឈរជើងបានរឹងមាំក្នុងទីផ្សារ គឺជារឿងដែលចាំបាច់ដែលសហគ្រិនត្រូវធ្វើ។ តើធ្វើដូចម្តេច?
អ្នកស្រី ស្រ៊ាត មុំសុភា ពន្យល់បន្ថែម៖ «ត្រូវមានការអភិវឌ្ឍន៍ខ្លួនឯងជាប្រចាំ។ ដូចយើងធ្វើការងារ គឺយើងកំពុងដុះខាត់ខ្លួនឯង និងបង្កើតទំនាក់ទំនង។ នៅក្នុងវិស័យទេសចរណ៍ យើងមិនត្រឹមតែទំនាក់ទំនងនៅក្នុងប្រទេសទេ គឺនៅក្រៅប្រទេសទៀត។ ហើយមិនមែនតែលើវិស័យឯកជនតែមួយនោះទេ ត្រូវទំនាក់ទំនងជាមួយដៃគូពាក់ព័ន្ធ រដ្ឋាភិបាល និងសង្គមជាតិទៀត មានន័យថា ត្រូវចូលរួមចំណែកត្រឡប់ទៅសង្គមវិញ។ បុគ្គលិករបស់យើង និងថ្នាក់គ្រប់គ្រង សមត្ថភាពរបស់គាត់ត្រូវតែអភិវឌ្ឍន៍ប្រចាំដែរ។ មួយទៀត ត្រូវដើរឲ្យទាន់សម័យកាល ដើរឲ្យទាន់ព័ត៌មានសព្វថ្ងៃ និងមានការបន់បែន។ សម្រាប់ខ្ញុំ ខ្ញុំឲ្យនិយមន័យ ភាពជោគជ័យនៃអាជីវកម្ម គឺជាអាជីកម្មកើតមកហើយ ទោះយឺតយ៉ាងណា តែអាចឈរលើទីផ្សារបានមិនថាក្នុងកាលៈទេសៈណាក៏ដោយ»។
ក្រៅពីចង់ឲ្យក្រុមហ៊ុនរបស់ខ្លួនមានឈ្មោះបោះសំឡេងតជំនាន់ អ្នកស្រី ស្រ៊ាត មុំសុភា គ្រោងវិនិយោគក្នុងវិស័យអចលនវត្ថុ ដូចជា សណ្ឋាគារ និងរមណីយដ្ឋានជាដើម៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ស្រ៊ាត មុំសុភា
នារីអាកាសចរណ៍
ទេសចរណ៍
© រក្សាសិទ្ធិដោយ thmeythmey.com
អត្ថបទពេញនិយម
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
6 ថ្ងៃ
«មជ្ឈការ»មានន័យខុសពី«វិមជ្ឈការ»ដូចម្តេច?
4 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
6 ថ្ងៃ
«ប្រេសិត»មានន័យដូចម្តេច?
5 ថ្ងៃ
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
1 ថ្ងៃ
អត្ថបទពេញនិយមបន្ថែម