វគ្គផ្តាច់ព្រ័ត្រពានសម្តេច ហ៊ុន សែន រវាងព្រះខ័នរាជស្វាយរៀង និងបឹងកេត ត្រូវប្តូរទៅលេងនៅ RSN

កីឡាជាតិ

ជាតិ

វគ្គផ្តាច់ព្រ័ត្រពានសម្តេច ហ៊ុន សែន រវាងព្រះខ័នរាជស្វាយរៀង និងបឹងកេត ត្រូវប្តូរទៅលេងនៅ RSN

09, Oct 2019 , 8:59 am

រូបភាព

កីឡាករ រស់ គង់សំរេច និងកីឡាករ ចាន់ វឌ្ឍនាកា (រាប់ពីឆ្វេង)ពេលបង្ហាញខ្លួនជាមួយក្រុមរៀងៗខ្លួនកាលពីពេលកន្លងទៅ, រូបភាពពី CNCC

ដោយ:

ការប្រកួតវគ្គផ្តាច់ព្រ័ត្រដណ្តើមពានរង្វាន់សម្តេច ហ៊ុន សែន រវាងក្រុមបឹងកេតជាមួយព្រះខ័នរាជស្វាយរៀងត្រូវបានផ្លាស់ប្តូរទាំងពេលវេលា និងទីលានប្រកួត។ ចំណែកជំនួបដណ្តើមចំណាត់ថ្នាក់លេខ៣រវាងក្រុមវិសាខាជាមួយភ្នំពេញក្រោន ត្រូវបានរំសាយចោល។ នេះបើយោងតាមសេចក្តីប្រកាសព័ត៌មានរបស់គណៈកម្មការប្រកួតបាល់ទាត់ជាតិកម្ពុជា ដែលអះអាងថា ករណីទាំងពីរមានការឯកភាពពីភាគីក្លិបទាំងសងខាងរៀងៗខ្លួន។

ការប្រកួតវគ្គផ្តាច់ព្រ័ត្រដណ្តើមជើងឯកពានរង្វាន់សម្តេច ហ៊ុន សែន រវាងបឹងកេតជាមួយព្រះខ័នរាជស្វាយរៀង ត្រូវបានលើកពេលទៅរៀបចំនៅថ្ងៃទី៦ ខែវិច្ឆិកា ឆ្នាំ២០១៩ នៅកីឡដ្ឋាន Smart RSN។ តាមពិតការប្រកួតរវាងក្រុមទាំងពីរ គ្រោងធ្វើនៅថ្ងៃទី៩ ខែវិច្ឆិកា ឆ្នាំ២០១៩ នៅពហុកីឡដ្ឋានជាតិ។

បើតាមសេចក្តីប្រកាសព័ត៌មានរបស់គណៈកម្មការប្រកួតបាល់ទាត់ជាតិកម្ពុជា ការផ្លាស់ប្តូរពេលវេលាប្រកួត ធ្វើឡើងក្រោយមានការស្នើសុំពីក្លិបទាំងពីរ។ ចំណែកការផ្លាស់ប្តូរទីលាន ដោយសារពហុកីឡដ្ឋានជាតិ ត្រូវរៀបចំការប្រកួតវគ្គជម្រុះពានរង្វាន់បាល់ទាត់យុវជនអាស៊ីអាយុក្រោម១៩ឆ្នាំ AFC U19 Championship 2020 ដែលប្រព្រឹត្តទៅចាប់ពីថ្ងៃទី២-១០ វិច្ឆិកា។

ដោយឡែក ការប្រកួតដណ្តើមចំណាត់ថ្នាក់លេខ៣រវាងក្រុមវិសាខាជាមួយភ្នំពេញក្រោន ត្រូវបាន CNCC សម្រេចលប់ចោលតែម្តង។ ការសម្រេចបែបនេះ ធ្វើឡើយក្រោយមានការស្នើសុំពីភាគីទាំងពីរ ព្រោះពួកគេចង់ឲ្យកីឡាករ ដែលជាប់ជម្រើសជាតិមានពេលសម្រាកគ្រប់គ្រាន់ និងដើម្បីបញ្ចៀសពីបញ្ហារបួសជាដើម។ មួយវិញទៀត គឺដើម្បីទុកពេលឲ្យកីឡាករជម្រើសជាតិអាយុក្រោម១៩ឆ្នាំ ប្រមូលផ្តុំហ្វឹកហាត់សម្រាប់ត្រៀមវគ្គជម្រុះ AFC U19 Championship 2020 ដែលកម្ពុជាស្ថិតនៅពូល G ជាមួយថៃ ម៉ាឡេស៊ី ព្រុយណេ និង Northern Mariana Islands៕