ជាតិ
សេដ្ឋកិច្ច
វិស័យស្រូវអង្ករកម្ពុជា ជួបបញ្ហាប្រឈម ៧ចំណុច
× ប្រធានសហព័ន្ធស្រូវអង្ករកម្ពុជា(CRF) លោក សុង សារ៉ន បានអះអាងថា កសិករក្នុងវិស័យស្រូវអង្ករ ជួបបញ្ហាប្រឈមចំនួន ដែលអ្នកពាក់ព័ន្ធត្រូវជួយដោះស្រាយ។ លោក សុង សារ៉ន បានលើកឡើងបញ្ហារបស់វិស័យស្រូវអង្ករ ក្នុងវេទិកាកសិករថ្នាក់ជាតិលើកទី៨ នៅថ្ងៃទី១៧ខែតុលា។
បញ្ហាប្រែប្រួលអាកាសធាតុ ទឹក និងពូជស្រូវ។ ត្រង់ចំណុចនេះ លោក សុង សារ៉ន ប្រាប់ថា កម្ពុជាត្រូវការពូជស្រូវដែលធននឹងការប្រែប្រួលអាកាសធាតុ ការរៀបចំដីដាំដុះដែលប្រើទឹកតិច និងពូជស្រូវដែលឆ្លើយតបនឹងតម្រូវការនាំចេញទៅទីផ្សារអន្តរជាតិ ជាជាងពឹងផ្អែកនាំចេញទៅប្រទេសជិតខាង។
បញ្ហាផ្សេងទៀត រួមមានការប្រកួតប្រជែងនឹងប្រទេសជិតខាង និងគោលនយោបាយការពារនិយម។ «យើងដឹងហើយថា អង្កររបស់កម្ពុជាត្រូវប្រកួតប្រជែងអង្កររបស់ប្រទេសជិតខាងយើង ដែលយើងត្រូវត្រៀមខ្លួន ធ្វើយ៉ាងណាឲ្យមានភាពប្រកួតប្រជែង»។ នេះជាប្រសាសន៍របស់លោក សុង សារ៉ន មុននឹងលោកបន្តដូច្នេះទៀតថា៖«បញ្ហាការពារនិយម មានន័យថាទីផ្សារនីមួយៗ គេមិនឲ្យចូលទីផ្សារគេដោយស្រួលនោះទេ ដូចជាចិន និងសហគមន៍អឺរ៉ុបជាដើម ដែលជារបាំងថ្មីមួយក្នុងការនាំចេញស្រូវទៅប្រទេសដែលមានផលិតស្រូវអង្ករដែរ»។
បញ្ហាមួយទៀត គឺការទទួលបានឥណទានសម្រាប់សហគមន៍កសិកម្ម។ លោក សុង សារ៉ន ស្វាគមន៍ការបញ្ចេញឥណទានរបស់រដ្ឋាភិបាល តាមរយៈធនាគារអភិវឌ្ឍន៍ជនបទ ក្នុងរយៈពេលពីរបីឆ្នាំចុងក្រោយនេះ ដែលបង្កើនទំហំប្រាក់កម្ចី ក្នុងអត្រាការប្រាក់ទាប ដល់សហកមន៍ និងរោងម៉ាស៊ីនកិនស្រូវ។ ជាមួយគ្នានេះលោកស្នើដល់គ្រឹះស្ថានធនាគារឯកជនបន្តផ្ដល់ឥណទានដែលប្រកបដោយចីរភាព។
បញ្ហាសំខាន់ផ្សេងទៀត គឺកង្វះទំនើបកម្មកសិកម្ម និងការចំណាយថ្លៃដើមខ្ពស់។ លោក សុង សារ៉ន ថ្លែងថា គ្រឿងបរិក្ខារសម្រាប់ធ្វើកសិកម្ម ដូចជាគ្រឿងយន្តជាដើម ត្រូវនាំចូលក្នុងតម្លៃថ្លៃ ដែលធ្វើឲ្យចំណាយការភ្ជួររាស់ ច្រូតកាត់ ការដឹកជញ្ជូនថ្លៃ។ លោកបន្ថែម រីឯការកែច្នៃនាំចេញរបស់រោងម៉ាស៊ីនកិនស្រូវ នៅចំណាយខ្ពស់លើការដឹកជញ្ជូនជាដើម។ លោកជំរុញឲ្យក្រសួងពាក់ព័ន្ធត្រូវកែលម្អប្រព័ន្ធធារាសាស្ត្រ ការដឹកជញ្ជូន និងជួយសម្របសម្រួលបញ្ហាឃ្លាំងស្តុកឡសម្ងួត ជាដើម។
គួរបញ្ជាក់ ការនាំចេញអង្កររបស់កម្ពុជាក្នុងរយៈពេលចុងក្រោយនេះ ហាក់មិនសូវកើនឡើងនោះទេ។ តែប្រធានសហព័ន្ធស្រូវអង្ករកម្ពុជា លោក សុង សារ៉ន ដែលទើបចូលកាន់តំណែងថ្មីនេះ ប្ដេជ្ញាឲ្យការនាំចេញអង្ករនឹងសម្រេចបាន ១លានតោន ក្នុងរយៈពេល៣ឆ្នាំ ពោលគឺក្នុងអាណត្តិទី៣ ដែលលោកធ្វើជាប្រធានសហព័ន្ធនេះ៕
Tag:
សុង សារ៉ន
ស្រូវអង្ករ
© រក្សាសិទ្ធិដោយ thmeythmey.com