អន្តរជាតិ
កូរ៉េខាងត្បូង នឹងបង្កើនថវិកាដើម្បីទិញគ្រឿងសព្វាវុធបន្ថែម
×
ដោយ៖ ងួន សុភាវត្តី
ប្រធានាធិបតីកូរ៉េខាងត្បូងលោក មូន ចេអ៊ីន បានថ្លែងថា ទីក្រុងសេអ៊ូល នឹងបង្កើនថវិកាសំរាប់ទិញសព្វាវុធដើម្បីការពារខ្លួន និងបានជំរុញឲ្យកូរ៉េខាងជើងចូលតុចរចារវិញ។ ការលើកឡើងរបស់លោក មូន បានធ្វើឡើងក្នុងពិធីថ្លែងសុន្ទរកថាស្តីពីថវិកាជាតិនៅថ្ងៃទី២២ ខែតុលា។ ដែលការណ៍នេះអាចធ្វើឲ្យកូរ៉េខាងជើងក្ដៅស្លឹកត្រចៀកមិនខាន។
ចំពោះមុខសមាជិកសភាកូរ៉េខាងត្បូង លោកប្រធានាធិបតី មូន ចេអ៊ីន បានប្រកាសបង្កើនថវិកាចំនួន៧ភាគរយទៀតដែលស្មើនឹង៤២ពាន់លានដុល្លារនៅឆ្នាំ២០២០ ដែលនឹងត្រូវក្នុងការទិញសព្វាវុធបន្ថែម។ លោក មូន បានប្រាប់ទៅរដ្ឋសភាថា «យើងនឹងពង្រឹងប្រព័ន្ធការពារជាតិដោយការទិញចូលនាវាមុជទឹក និងផ្កាយរណបឃ្លាំមើលជំនាន់ថ្មី»។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ការប្រកាសរបស់លោក មូន ធ្វើឡើង ក្រោយកូរ៉េខាងជើងបានចាកចេញពីតុចរចារជាមួយអាមេរិក និងការបាញ់សាកល្បងមីស៊ីលប៉ាលីស្ទិកចេញពីនាវាមុជទឹករបស់ខ្លួននៅដើមខែតុលានេះ។ ទំនាក់ទំនងរវាងបងប្អូនកូរ៉េទាំងពីរនេះបានប្រែជាអាក្រក់វិញ ក្រោយកិច្ចព្រមព្រៀងរវាងមេដឹកនាំកូរ៉េខាងជើងលោក គីម ជុងអ៊ុន និងប្រធានាធិបតីអាមេរិកលោក ដូណាល់ ត្រាំទទួលបរាជ័យ។ កូរ៉េខាងជើង តែងរិះគន់កូរ៉េខាងត្បូងពីការធ្វើសមយុទ្ធជាមួយរដ្ឋអាមេរិក និងការទិញយន្តហោះចម្បាំងជាដើម។
ក្រៅតែពីបរាជ័យក្នុងកិច្ចចរចារជាមួយអាមេរិកនេះ កូរ៉េខាងជើងក៏បាននិយាយថាខ្លួនគ្មានអ្វីត្រូវនិយាយជាមួយកូរ៉េខាងត្បូងទៀតទេ និងបានថ្កោលទោសកូរ៉េខាងត្បូងថា បានរំលោភបំពានដល់កិច្ចព្រមព្រៀង សេអ៊ូល ព្យុងយ៉ាងដោយការធ្វើសមយុទ្ធជាមួយអាមេរិក និងការដាក់យន្តហោះចម្បាំងF-35A ដែលមានគោលបំណងចង់វាយប្រហារកូរ៉េខាងជើង។
ប៉ុន្តែ លោក មូន បានយល់ឃើញថា ការជាប់គាំងក្នុងការចរចារនេះ ជាឧបសគ្គចុងក្រោយមុនឈានដល់ការរំសាយអាវុធនុយក្លេអ៊ែរ។ លោកបានបន្ថែមថា អនាគតដ៏ភ្លឺស្វាងសំរាប់កូរ៉េខាងជើងអាចកើតឡើងបានដោយផ្អែកលើ សេដ្ឋកិច្ចសន្តិភាពដែលដឹកនាំដោយគម្រោងសេដ្ឋកិច្ចអន្តរកូរ៉េ៕
© រក្សាសិទ្ធិដោយ thmeythmey.com