ជាតិ
នយោបាយជាតិ
រាជអាវុធហត្ថ ដាស់តឿនស្មារតីកងកម្លាំងខ្លួន អំពីផែនការក្រុមប្រឆាំង លោក ស សំបូរធន ថ្លែងក្នុងពិធីផ្សព្វផ្សាយខ្លឹមសារជំនួយស្មារតី នៅវិទ្យាស្ថានកងរាជអាវុធហត្ថកំបូល កាលពីថ្ងៃទី២៥ ខែតុលា ឆ្នាំ២០១៩ (រូបពីក្រសួងការពារជាតិ)
× ស្ថាប័នកងរាជអាវុធហត្ថ បានរៀបចំពិធីមួយ ដើម្បីផ្សព្វផ្សាយខ្លឹមសារជំនួយស្មារតីដល់កងកម្លាំងរាជអាវុធហត្ថ ដោយផ្តោតសំខាន់លើផែនការនៃការវិលត្រឡប់របស់ក្រុមប្រឆាំង ដែលដឹកនាំដោយលោក សម រង្ស៊ី។ គេហទំព័រក្រសួងការពារជាតិ ចុះផ្សាយថា ការរៀបចំពិធីផ្សព្វផ្សាយខ្លឹមសារជំនួយស្មារតីនេះ គឺធ្វើតាមការណែនាំរបស់នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស។
ឧត្តមសេនីយ៍ទោ ស សំបូរធន នាយសេនាធិការកងរាជអាវុធហត្ថលើផ្ទៃប្រទេស ដែលធ្វើជាអធិបតីជំនួសលោក សៅ សុខា បានរម្លឹកពីផែនការរបស់លោក សម រង្ស៊ី ដែលមានបំណងផ្តួលរំលំរដ្ឋាភិបាលកម្ពុជា។ ក្នុងពិធីដែលរៀបចំកាលពីថ្ងៃទី២៥ ខែតុលា ឆ្នាំ២០១៩ នៅវិទ្យាស្ថានកងរាជអាវុធហត្ថកំបូល លោកឧត្តមសេនីយ៍ទោ បានលើកឡើងអំពីការពង្រឹងសតិអារម្មណ៍ដល់កងរាជអាវុធហត្ថ ដើម្បីក្ដាប់ឲ្យជាប់នូវការវិវត្តសភាពការណ៍ថ្មីៗ និងបញ្ហាសន្ដិសុខ។
លើសពីនេះ លោក ស សំបូរធន ដាស់តឿនកងរាជអាវុធហត្ថ ឲ្យការពារឲ្យបានដាច់ខាតនូវរដ្ឋធម្មនុញ្ញ ព្រះមហាក្សត្រ និងរដ្ឋាភិបាល។ ក្រសួងការពារជាតិ បានសរសេរដូច្នះថា៖«ជាចុងក្រោយ ឧត្តមសេនីយ៍ទោ ស សំបូរធន បានផ្តាំផ្ញើនិងរម្លឹកកងរាជអាវុធហត្ថទាំងអស់ ឲ្យយល់អំពីកិច្ចការរបស់ខ្លួន ដែលត្រូវទទួលខុសត្រូវ ពិសេសអំពីព្រឹត្តិការណ៏ថ្មីៗ និងអនុវត្តឲ្យបានម៉ឺងម៉ាត់បំផុតនូវបទបញ្ជារបស់រដ្ឋាភិបាល ព្រមទាំងការពាររដ្ឋាភិបាលឲ្យបាន មិនឲ្យពួកឧទ្ទាមក្បត់ជាតិ បំផ្លាញសន្តិភាព និងផ្តួលរំលំរាជរដ្ឋាភិបាលកម្ពុជាយើងបានជាដាច់ខាត»។
មិនមែនតែកងរាជអាវុធហត្ថទេ ទាំងយោធានិងនគរបាល ក៏ប្រកាសដែរ ថាបានត្រៀមលក្ខណៈរួចរាល់ហើយ ដើម្បីចាប់លោក សម រង្ស៊ី និង គ្នីគ្នារបស់លោកតាមដីកាតុលាការ បើក្រុមលោក មកដល់កម្ពុជា នៅថ្ងៃទី៩ ខែវិច្ឆិកា ឆ្នាំ២០១៩ ពិតមែន។ លោក សម រង្ស៊ី ប្រកាសជាដដែលៗថា គម្រោងមកកម្ពុជា នឹងផ្លាស់ប្តូរឡើយ ទោះត្រូវរដ្ឋាភិបាលគំរាមយ៉ាងណាក៏ដោយ៕
Tag:
កងរាជអាវុធ
ក្រុមប្រឆាំង
មាតុភូមិនិវត្ត
© រក្សាសិទ្ធិដោយ thmeythmey.com