អន្តរជាតិ
តើទេសចរណ៍នៅទ្វីប«អង់តាកទិច»មានលក្ខណៈដូចម្តេច?
× ទ្វីបអង់តាកទិច (Antarctic) ដែលជាផែនទឹកកកទំហំមហាសាលមួយនេះ មិនមែនអាចអនុញ្ញាតឲ្យមនុស្សគ្រប់រូបបានទៅទស្សនាដោយងាយស្រួល និងសេរីនោះឡើយ។ វាមានទីតាំងឆ្ងាយពីទីប្រជុំជនធំៗរបស់មនុស្ស ឆ្ងាយពីការរំពឹងទុក និងមិនមានជាកន្លែងកម្សាន្តរបស់អ្នកធ្វើដំណើរសាមញ្ញៗប៉ុន្មាននោះឡើយ។ តើលោកអ្នកគួរតែដឹងអ្វីខ្លះអំពីវិស័យទេសចរណ៍នៅលើតំបន់ទឹកកកមួយនេះ?
គេហទំព័រ Travel and Leisure បានបកស្រាយចំណុចសំខាន់ៗចំនួន៥អំពីប្រធានបទខាងលើ៖
ទី១៖ ភាពប្រុងប្រយ័ត្នអំពីបរិស្ថាន
អ្នកជំនាញខាងធម្មជាតិមួយចំនួនបានលើកឡើងថា ទ្វីបអង់តាកទិចគឺជាទ្វីបដែលងាយនឹងរងគ្រោះខ្លាំងណាស់ពីសំណាក់សកម្មភាពនានាដែលប្រព្រឹត្តឡើងដោយមនុស្ស។ ដោយហេតុនេះ កិច្ចសហប្រតិបត្តិការអន្តរជាតិគ្រប់គ្រងទេសចរណ៍អង់តាកទិច (IAATO) ត្រូវបានគេបង្កើតឡើងនៅក្នុងឆ្នាំ១៩៩១ ក្នុងនោះមានសមាជិកជាង១០០ភាគីបានចូលរួមក្នុងការទប់ស្កាត់ការបំផ្លិចបំផ្លាញបរិស្ថាននៃទ្វីបមួយនេះ ដោយសកម្មភាពមនុស្ស។ នាវាដឹកទេសចរមួយចំនួនបានយកចិត្តទុកដាក់យ៉ាងខ្លាំងអំពីការថែរក្សាបរិស្ថាន។ ក្រុមហ៊ុនទេសចរណ៍ខ្លះបាននាំអ្នកជំនាញអំពីបរិស្ថានមកធ្វើការពន្យល់អ្នកដំណើរអំពីសារៈសំខាន់នៃទ្វីបអង់តាកទិច និងផែនដីទាំងមូល និងបាននាំពួកគេទាំងនោះទៅពិនិត្យមើលភាពផ្លាស់ប្តូរនៃបរិស្ថាន ដែលត្រូវបានទទួលរងដោយឥទ្ធិពលរបស់មនុស្ស។
ទី២៖ អង់តាកទិចជាកន្លែងបក្សីរស់នៅជាក្រុមយ៉ាងធំ
បើនិយាយពីបណ្តុំសត្វបក្សីដែលរស់នៅជុំគ្នា អង់តាកទិចគឺជាកន្លែងដែលគេនឹកឃើញមុនគេ។ ដោយពេលខ្លះ ក្នុងក្រុមនីមួយៗមានបក្សីរហូតទៅដល់ជាង១០ម៉ឺនក្បាលនៅជុំគ្នា ជាពិសេសសត្វផេនគ្វីន។ វាគឺជាកន្លែងដ៏ប្រសើរសម្រាប់ទេសចរណ៍ និងអ្នកសិក្សាពីសត្វបក្សី និងបរិស្ថាន។
ទី៣៖ ការធ្វើដំណើរ
ទោះបីជាសំបុត្រដែលមានតម្លៃថ្លៃក៏ពិតមែន នាវាទេសចរណ៍នីមួយៗដែលមានអ្នកធ្វើដំណើរទៅមកជាង១០០នាក់ឯណោះម្តងៗ។ ចំពោះក្រុមហ៊ុនទេសចរណ៍ Jacada គេអាចទទួលទេសចរក្នុងលក្ខណៈឯកជនច្រើនជាង។ ជាមួយនឹងការធ្វើដំណើរចំនួន១១ថ្ងៃនេះ នាវានឹងចាក់ចេញពីទីក្រុង Cape Town នៃប្រទេសអាហ្វ្រិកខាងត្បូង និងធ្វើដំណើរជុំវិញអង់តាកទិចចំនួន៧ថ្ងៃ ជាមួយនឹងតម្លៃជាង៥៥ពាន់ដុល្លារក្នុងម្នាក់។
ទី៤៖ ក្មេងតូចៗ
ក្រុមហ៊ុនទេសចរណ៍ភាគច្រើនមិនទាន់បានបង្កើតជាកញ្ចប់ទេសចរណ៍សម្រាប់កូនក្មេងៗតូចនៅឡើយទេ តែមានក្រុមហ៊ុនមួយចំនួនបានធ្វើវារួចមកហើយដូចជា Christmas in Antarctica ក្នុងតម្លៃជិត១២ពាន់ដុល្លារក្នុងម្នាក់។
ទី៥៖ ផ្លូវធ្វើដំណើរ
អ្នកទេសចរណ៍គួរដឹងដែរថា ការធ្វើដំណើរទីទ្វីបអង់តាកទិចមិនមែនជាផ្លូវធ្វើដំណើរដែលងាយនោះទេ ទោះបីជាសម្រាប់នាវាធំៗក៏ពិតមែន។ រលកធំៗ និងអាកាសធាតុដ៏ត្រជាក់គឺជារឿងរ៉ាវដែលពិបាកក្នុងការជៀស។ ផ្លូវសមុទ្រ«ដ្រេក» ឬ Drake Passage គឺជាផ្លូវសមុទ្រមួយដែលកម្លាំងទឹកសមុទ្រខ្លាំង៕
© រក្សាសិទ្ធិដោយ thmeythmey.com