ជាតិ
កិច្ចពិភាក្សារវាង លោក Chritophe Crepin និង សម្ដេច ស ខេង (ខាងឆ្វេង គឺ លោក Chritophe Crepin ) រូបភាពពីទំព័រហ្វេសប៊ុករបស់សម្ដេច ស ខេង
×![]()
ដោយ: ឡាយ សុភាវតី
លោក Chritophe Crepin នាយកប្រតិបត្តិផ្នែកបរិស្ថាននិងធនធានធម្មជាតិនៃធនាគារពិភពលោក នឹងជួយគាំទ្រការគ្រប់គ្រងកាសសំណល់រឹង និងបរិស្ថានឲ្យសមស្រប ដោយមានប្រសិទ្ធភាព។ លោកថ្លែងបែបនេះ នៅក្នុងជំនួបជាមួយសម្ដេច ស ខេង នៅថ្ងៃទី៤ វិច្ឆិកា នាទីស្តីការក្រសួងមហាផ្ទៃ។
ក្នុងជំនួបនោះលោក Chritophe Crepin បាននិយាយថា លោកបានជួបជាមួយស្ថាប័នពាក់ព័ន្ធរបស់រាជរដ្ឋាភិបាលកម្ពុជា ដើម្បីជួយគាំទ្រដល់ការងារគ្រប់គ្រងកាកសំណល់រឹង ប្រកបដោយប្រសិទ្ធភាព និងធានាបាននូវបរិស្ថាន។ បើតាមលោក Chritophe Crepin គម្រោងនេះ គឺផ្ដោតសំខាន់លើការខិតខំធ្វើយ៉ាងណា ដើម្បីផ្សាភ្ជាប់ការគ្រប់គ្រងបរិស្ថានទៅនឹងការកែប្រែឥរិយាបទ និងចំណេះដឹងដល់សាធារណជន អំពីការគ្រប់គ្រងកាកសំណល់រឹង។ ជាពិសេសធានាដល់នរិន្តរភាពនិងចីរភាពនៃបរិស្ថាន។
ឆ្លើយតបបំណងរបស់ធនាគារពិភពលោកនេះ រដ្ឋមន្ត្រីក្រសួងមហាផ្ទៃ សម្ដេច ស ខេង បានស្នើឲ្យធនាគារពិភពលោក ពិនិត្យលទ្ធភាពលើការគ្រប់គ្រងកាកសំណល់នេះ ទៅនឹងការងារកំណែទម្រង់រដ្ឋបាលថ្នាក់ក្រោមជាតិ ដើម្បីផ្ទេរអំណាច និងសិទ្ធិក្នុងការគ្រប់គ្រងកាកសំណល់ទៅដល់រដ្ឋបាលថ្នាក់ក្រោមជាតិ។ លើសពីនេះ គឺផ្សាភ្ជាប់ជាមួយការផ្ទេរហិរញ្ញវត្ថុ និងធនធានមនុស្សទៅដល់រដ្ឋបាលថ្នាក់ក្រោមជាតិ។
តាមរយៈហ្វេសប៊ុកខ្លួន រដ្ឋមន្ត្រីក្រសួងមហាផ្ទៃ បានសរសេរដូច្នេះថា៖ «សង្ឃឹមជឿជាក់ថាធនាគារពិភពលោកនឹងបន្តជួយគាំទ្រដើម្បីឲ្យកំណែទម្រង់ និងការពង្រឹងសមត្ថភាពរដ្ឋបាលថ្នាក់ក្រោមជាតិនេះកាន់តែទទួលបានជោគជ័យ ដោយភ្ជាប់នឹងការងារគ្រប់គ្រងកាកសំណល់នេះដែរ»។
ដ្បិតធនាគារពិភពលោកជួយកម្ពុជា លើបញ្ហាគ្រប់គ្រងកាកសំណល់ក្តី ប៉ុន្តែវាក៏ត្រូវការចូលរួមពីស្ថាប័នពាក់របស់រដ្ឋាភិបាលដែរ។នាយកប្រតិបត្តិផ្នែកបរិស្ថាននិងធនធានធម្មជាតិនៃធនាគារពិភពលោក បាននិយាយដូច្នេះថា៖«កំណែទម្រង់រដ្ឋបាលថ្នាក់ក្រោមជាតិត្រូវការឲ្យមានជាកញ្ចប់ទាំងធនធានមនុស្ស ថវិកា និងសិទ្ធអំណាច ដូច្នេះលោកថាអ្វីដែលសម្ដេចបានមានប្រសាសន៍មកនេះគឺពិតជាដើរស្របទៅនឹងសកម្មភាពរបស់ធនាគារពិភពលោកដែលកំពុងធ្វើសកម្មភាពនៅប្រទេសកម្ពុជានាពេលសព្វថ្ងៃនេះ គឺមានទាំងគម្រោងជួយអភិវឌ្ឍន៍ធនធានមនុស្ស វិស័យបរិស្ថាន សុខាភិបាល និងអប់រំ ដែលពិតជាមានការចូលរួមចំណែកមិនអាចខ្វះបានពីក្រសួងមហាផ្ទៃ និងបានស្នើសម្ដេចជួយជំរុញដល់រដ្ឋបាលថ្នាក់ក្រោមជាតិ ក្នុងការចូលរួមគម្រោងគ្រប់គ្រងកាកសំណល់ដែលផ្ដួចផ្ដើមដោយធនាគារពិភពលោក»។
Tag:
ធនាគារពិភពលោក
កាសសំណល់រឹង
© រក្សាសិទ្ធិដោយ thmeythmey.com
