ជាតិ
បទយកការណ៍ / បទសម្ភាសន៍
×![]()
ភ្នំពេញ៖ បន្ទាប់ពីដាក់លក់បានប្រមាណ២ខែ បំពង់បឺតបរិស្ថាន ដែលច្នៃពីដើមបបោះរបស់ក្រុមយុវជនសំរាម ត្រូវបានហាងធំៗ ក្លិប Sky Bar ដែលសម្បូរភ្ញៀវជនជាតិបរទេសមកពីអឺរ៉ុប បញ្ជាទិញ ក្នុងមួយថ្ងៃ២ពាន់ដើម។ កញ្ញា ចន្ថា រដ្ឋី សមាជិកក្រុមយុវជនសំរាម បានអះអាងថា បើទោះបីបំពង់បឺតនេះ មានតម្លៃខ្ពស់ជាងបំពង់បឺតប្លាស្ទិក តែវាជារបស់ធម្មជាតិ និងគ្មានជាតិគីមី។
កំពុងធ្វើបំពង់បឺតដើមប្របុស ស្ថិតនៅទីស្នាក់ការយុវជនសំរាមជាប់ប្រឡាយបឹងត្របែក កញ្ញា ចន្ថា រដ្ឋី បានបញ្ជាក់ប្រាប់សារព័ត៌មានថ្មីៗថា បច្ចុប្បន្ន នៅក្នុងមួយថ្ងៃ បំពង់បឺតធម្មជាតិនេះ ត្រូវបានអតិថិជនបញ្ជាទិញ២ពាន់ដើមនៅក្នុងមួយថ្ងៃ និងមួយដើមមានតម្លៃ១០០រៀល។ រៀបរាប់ទាំងសប្បាយចិត្ត ដ្បិតមានការគាំទ្រច្រើនពីអតិថិជននោះ រដ្ឋី បានពន្យល់ថា បំពង់បឺតប្របុស មិនពិបាកធ្វើនោះទេ ព្រោះ វត្ថុធាតុដើម មានដុះស្ទើរគ្រប់ទីកន្លែងនៅកម្ពុជា គ្រាន់តែកែច្នៃតែបន្តិច នឹងអាចដាក់លក់បាន។
សូមទស្សនាវីដេអូខាងក្រោមនេះដូចតទៅ៖
ក្នុងវ័យ២៤ឆ្នាំ រដ្ឋីបានពន្យល់ពីវិធីធ្វើបំពង់បឺតនេះយ៉ាងដូច្នេះ៖«ដើមបបោះ ពួកយើងបានទៅកាប់នៅផ្លូវ៦០ម៉ែត្រ យើងបានបូតស្លឹកវាចេញ និងសកថ្នាំងចេញ ដើម្បីឲ្យវាស្អាត។ បន្ទាប់មក យកចោះថ្នាំងវា និងយកដែកមកត្បាល់វា និងផ្លុំវា ដើម្បីឲ្យអស់កម្ទេច។ ចុងក្រោយ យើងយកវាទៅដាក់នៅម៉ាស៊ីនកំដៅ ដើម្បីសម្លាប់មេរោគ»។
បើតាមយុវតីដែលមកពីខេត្តព្រៃវែងរូបនេះ បំពង់បឺតបបោះ ត្រូវបានធ្វើឡើងដោយយុវជនសំរាម និងពលរដ្ឋនៅលូបឹងត្របែក ដើម្បីចូលរួមកាត់បន្ថយការប្រើប្រាស់ប្លាស្ទិក។ ជាផលិតផលផលិតដោយដៃ រដ្ឋី បានធានាចំពោះគុណភាពនៃបំពង់បឺតនេះ ដ្បិតខ្លួនបានសាកល្បងប្រើរួចហើយ និងបានលក់ទៅអតិថិជនច្រើនរាប់ម៉ឺននាក់ ប៉ុន្តែ មិនដែលមានបញ្ហាចំពោះអតិថិជននោះទេ។
តាមពិតទៅយុវជនសំរាម មិនមែនជាក្រុមយុវជនចង់រកប្រាក់ចំណេញនោះទេ ប៉ុន្តែ ការផ្តួចផ្តើមកែច្នៃបំពង់បឺតនេះ ឲ្យក្លាយជាផលិតផលប្រើប្រាស់បាន គឺជាសារមួយ ដើម្បីឲ្យពលរដ្ឋចេះស្រឡាញ់បរិស្ថាន និងកាត់បន្ថយការប្រើប្រាស់ប្លាស្ទិក។ កញ្ញា ចន្ថា រដ្ឋី បានពន្យល់ថា បើសិនពលរដ្ឋមិនចង់ទិញបំពង់បឺតពីយុវជនសំរាម ពលរដ្ឋក៏អាចធ្វើខ្លួនឯង ដោយយុវជនសំរាមនឹងបង្រៀនឲ្យពលរដ្ឋចេះធ្វើ ដើម្បីឲ្យបំពង់បឺតដើមបបោះអាចប្រើប្រាស់បាន និងមិនប៉ះពាល់សុខភាព។
ក្នុងសម្លៀកបំពាក់ខោខូវប៉ូយ និងអាវយឺត រដ្ឋី ដែលលេងម៉ូតសក់តាមការនិយមរបស់យុវវ័យខ្មែរបច្ចុប្បន្ន បានអះអាងថា បើទោះបីអតិថិជនបញ្ជាទិញច្រើនប៉ុណ្ណោ ក៏យុវជនសំរាម អាចផ្គត់ផ្គង់គ្រប់គ្រាន់ ព្រោះ ការធ្វើបំពង់បឺតនេះ មិនមែនយុវជនសំរាមធ្វើទាំងអស់នោះទេ តែពលរដ្ឋនៅជិតទីស្នាក់ការនេះ គឺជាកម្លាំងស្នូលក្នុងការផលិត។ រដ្ឋី សំណូមពរទៅពលរដ្ឋខ្មែរ បន្តគាំទ្របំពង់បឺតធ្វើពីដើមបបោះនេះ ដើម្បីកាត់បន្ថយប្លាស្ទិកផង និងជួយលើកកម្ពស់ជីវភាពប្រជាសហគមន៍នៅតាមប្រឡាយបឹកត្របែកផង៕
Tag:
បំពង់បឺត
យុវជនសំរាម
© រក្សាសិទ្ធិដោយ thmeythmey.com
