ជាតិ
នយោបាយជាតិ
អ្នកកាសែតពីស្ថាប័ននានា កំពុងតាមប្រមាញ់ព័ត៌មាននៃជំនួបលោក កឹម សុខា និងទូតបរទេសជាលើកដំបូង
×
ភ្នំពេញ៖ នៅព្រឹកថ្ងៃទី១១ វិច្ឆិកានេះ លោក កឹម សុខា ប្រធានអតីតគណបក្សសង្គ្រោះជាតិ នឹងជួបបណ្ដាអង្គទូតបរទេសនានានៅកម្ពុជា ក្រោយទទួលបានការបន្ធូរបន្ថយលក្ខខណ្ឌទោសពីតុលាការ។ លោក កឹម សុខា នឹងជួបទូតបារាំង និងអាមេរិកនៅថ្ងៃនេះ។
ងាកមកខាងមុខផ្ទះលោក កឹម សុខា ឯណេះវិញ គេសង្កេតឃើញថា អ្នកកាសែតមកពីបណ្ដាស្ថាប័ននានា កំពុងឈរត្រៀបត្រា ដើម្បីរង់ចាំប្រមាញ់រូបភាព នៃជំនួបដំបូងរបស់លោក កឹម សុខា ជាមួយទូតបរទេសនៅកម្ពុជានេះ ក្រោយជាប់ឃុំខ្លួនក្នុងផ្ទះ ដោយសារបណ្ដឹងរដ្ឋាភិបាលរយៈពេល២ឆ្នាំមកនេះ។
លោក កឹម សុខា ត្រូវជួបឯកអគ្គរដ្ឋទូតនៃសាធារណរដ្ឋបារាំងប្រចាំកម្ពុជា នៅម៉ោង ១០: ៣០ព្រឹក ។ ចំណែកឯកអគ្គរដ្ឋទូតនៃសហរដ្ឋអាមេរិក នឹងត្រូវជួបលោក កឹម សុខា នៅម៉ោង ២:៣០រសៀល ថ្ងៃដដែលនេះ។ បើតាមលោក មុត ចន្ថា ជំនួបទាំងពីរនេះ នៅត្រូវធ្វើឡើងនៅក្នុងគេហដ្ឋានលោក កឹម សុខា ដែលស្ថិតនៅសង្កាត់បឹងកក់២ ខណ្ឌទួលគោក រាជធានីភ្នំពេញ។
លោក កឹម សុខា ប្រធានអតីតគណបក្សសង្គ្រោះជាតិ ត្រូវបានតុលាការកែប្រែលក្ខខណ្ឌខ្លះ ដោយសម្រេចឱ្យលោកដើរទៅទីណាក៏បាន នៅក្នុងប្រទេសកម្ពុជា លើកលែងតែចេញទៅក្រៅប្រទេស ។ ដ្បិតអាចដើរគ្រប់ទីកន្លែងបានមែន ប៉ុន្តែលោក កឹម សុខា នៅគ្មានសិទ្ធិធ្វើសកម្មភាពនយោបាយដដែល។ ជាពិសេសលោក កឹម សុខា ត្រូវឆ្លើយតបនឹងការកោះហៅរបស់សមត្ថកិច្ចគ្រប់ពេល ដោយសារនៅតែស្ថិតនៅក្នុងការតាមដានរបស់តុលាការ៕
Tag:
កឹម សុខា
នយោបាយ
កាសែត
© រក្សាសិទ្ធិដោយ thmeythmey.com