ជាតិ
នយោបាយជាតិ
ក្រសួងយុត្តិធម៌ ស្នើឲ្យព្រះរាជអាជ្ញា ឈប់ចាប់និងឃុំអ្នកពាក់ព័ន្ធធ្វើរដ្ឋប្រហារ
លោក អង្គ វង្ស វឌ្ឍានា រដ្ឋមន្រ្តីក្រសួងយុត្តិធម៌ (រូបពីក្រសួងយុត្តិធម៌)
×![]()
ដោយ: ថ្មីៗ
មិនបង្អង់យូរ ក្រសួងយុត្តិធម៌ បានធ្វើតាមការណែនាំរបស់នាយករដ្ឋមន្ត្រី ដោយបានស្នើទៅព្រះរាជអាជ្ញាតាមបណ្តារាជធានី-ខេត្ត ឲ្យអត់ឱនដល់អ្នកជាប់ចោទពីបទចូលរួមក្នុងគម្រោងធ្វើរដ្ឋប្រហារ ដែលរៀបចំដោយ លោក សម រង្ស៊ី និង មេដឹកនាំក្រុមប្រឆាំង។ 
តាមរយៈសេចក្តីប្រកាសព័ត៌មាន ដែលចេញនៅរសៀលថ្ងៃទី១៤ ខែវិច្ឆិកា ឆ្នាំ២០១៩ អ្នកនាំពាក្យក្រសួងយុត្តិធម៌ បានស្នើឲ្យព្រះរាជអាជ្ញា បញ្ឈប់ការចាប់ខ្លួន ហើយបន្ធូរបន្ថយការប្រើវិធានការឃុំខ្លួន ចំពោះអ្នកពាក់ព័ន្ធនឹងគម្រោងធ្វើរដ្ឋប្រហារ។ អ្នកនាំពាក្យក្រសួងយុត្តិធម៌ ហៅអ្នកទាំងនោះ ថាជាពលរដ្ឋស្លូតត្រង់ ដែលចាញ់កលលោក សម រង្ស៊ី។
ការស្នើឲ្យបន្ធូរដៃដល់អ្នកទាំងនោះ ក៏ព្រោះតែផែនការធ្វើរដ្ឋប្រហារ ត្រូវបរាជ័យទៅហើយ។ នេះបើផ្អែកលើខ្លឹមសារនៃសេចក្តីប្រកាសព័ត៌មានរបស់អ្នកនាំពាក្យក្រសួងយុត្តិធម៌។
ក្នុងពិធីសម្ពោធរោងចក្រស៊ីម៉ងត៍ ថៃ ប៊ុនរ៉ុង ក្នុងខេត្តកំពត នាព្រឹកថ្ងៃទី១៤ ខែវិច្ឆិកា ឆ្នាំ២០១៩ សម្តេចនាយករដ្ឋមន្ត្រី ហ៊ុន សែន បានបញ្ជាទៅរដ្ឋមន្ត្រីក្រសួងយុត្តិធម៌ ឲ្យធ្វើការជាមួយតុលាការ ពិសេសជាមួយព្រះរាជអាជ្ញា ដើម្បីឲ្យដោះលែងរាល់អ្នកដែលត្រូវបានចាប់ខ្លួន ក្រោមការចោទប្រកាន់ពីបទចូលរួមធ្វើរដ្ឋប្រហារ។
លើសពីនេះ សម្តេចនាយករដ្ឋមន្ត្រី បានស្នើឲ្យតុលាការនិងសមត្ថកិច្ច បញ្ឈប់ការតាមចាប់អ្នកដែលពាក់ព័ន្ធនឹងគម្រោងធ្វើរដ្ឋប្រហារផងដែរ។ សម្តេច បានប្រាប់ពួកគេ ដែលរត់ទៅក្រៅប្រទេស និងកំពុងលាក់ខ្លួនក្នុងប្រទេស ឲ្យចេញមុខនិងវិលត្រឡប់មករស់នៅជាមួយគ្រួសារជាធម្មតាវិញ ដោយកុំបារម្ភពីការចាប់ខ្លួន។
សម្តេចនាយករដ្ឋមន្រ្តី ចាត់ទុក ការស្នើឲ្យដោះលែងនិងឈប់ចាប់អ្នកទាំងនោះ ថាគឺជាការប្រោសប្រណៃរបស់រដ្ឋាភិបាល ហើយក៏ជាគោលដៅក្នុងការបង្រួបង្រួមជាតិដែរ។ ប្រមុខរដ្ឋាភិបាល សង្កត់ធ្ងន់ដូច្នេះថា៖«សូមធ្វើការប្រញាប់ប្រញាល់ ដើម្បីឲ្យបងប្អូនបាននៅក្រៅឃុំ»។
ប្រមុខរដ្ឋាភិបាល បន្ថែមដូច្នេះថា៖«កំពត អាចខិតខំដោះស្រាយមុនគេ។ តាមខ្ញុំចាំ ដូចមានតែ២នាក់ទេ។ ២នាក់ហ្នឹង បើធ្វើទាន់ ឲ្យចេញក្រៅឃុំថ្ងៃហ្នឹងទៅ ដើម្បីឲ្យឃើញប្រសិទ្ធភាពនៃសម្តីរបស់ ហ៊ុន សែន»។
២-៣ម៉ោងក្រោយមក មនុស្ស២នាក់នៅខេត្តកំពត គឺអ្នកស្រី ប៉ែន មុំ និង លោក នុត ពេជ ដែលជាប់ឃុំពីបទចូលរួមធ្វើរដ្ឋប្រហារ ត្រូវបានដោះលែងឲ្យមានសេរីភាពវិញ។
បើតាមប្រមុខរដ្ឋាភិបាល មានមនុស្សជាង៧០នាក់ ដែលត្រូវចាប់ខ្លួន ពាក់ព័ន្ធនឹងការចូលរួមក្នុងផែនការធ្វើរដ្ឋប្រហារ៕
Tag:
ក្រសួងយុត្តិធម៌
តុលាការ
© រក្សាសិទ្ធិដោយ thmeythmey.com
