ជាតិ
ការអភិវឌ្ឍកសិដ្ឋានពហុប្រយោជន៍តាមគោលការណ៍«ស៤»
×
ដោយ៖ ផាត ដាណេ
ភ្នំពេញ៖ ដើម្បីទទួលបានប្រាក់ចំណូលខ្ពស់មានចំណីអាហារបរិភោគគ្រប់គ្រាន់ និងធានាបានការងារគ្រប់រដូវនៅលើកសិដ្ឋានគ្រួសារកសិករគួរតែបំប្លែងដីស្រែឲ្យក្លាយជាកសិដ្ឋានពហុប្រយោជន៍ ឬពហុផលតាមគោលការណ៍«ស៤»។
កន្លងមកកសិករជួបនឹងភាពក្រីក្រ ដោយសារតែអាស្រ័យលើការធ្វើស្រែតែមួយមុខ ហើយការធ្វើក៏បានទិន្នផលទាប និងលក់មិនបានថ្លៃ។ ដើម្បីទទួលបានប្រាក់ចំណូលខ្ពស់មានចំណីអាហារបរិភោគគ្រប់គ្រាន់ និងធានាបានការងារគ្រប់រដូវនៅលើកសិដ្ឋានគ្រួសារកសិករគួតែបំប្លែងដីស្រែឲ្យក្លាយជាកសិដ្ឋានពហុប្រយោជន៍ ឬពហុផលតាមគោលការណ៍«ស៤»។ នៅពេលកសិករបំប្លែងដីស្រែជាកសិដ្ឋានពហុប្រយោជន៍ ផ្ទៃដីធ្វើស្រែមានទំហំតូចជាងមុន តែប្រាក់ចំណូលសរុបកើនឡើងច្រើនដងជាងពេលធ្វើតែស្រែមួយមុខ។
រូបភាពពីសៀវភៅកសិកម្ម
ដើម្បីឲ្យបានចំណូលខ្ពស់ថែមទៀតពីការធ្វើស្រែ នៅលើដីតូចកសិករគួរធ្វើស្រូវដែលលក់បានតម្លៃថ្លៃ ឬផលិតពូជស្រូវលក់។ ការមានស្រះទឹកដែលមានទឹកគ្រប់គ្រាន់ និងមានដីទួលអាចបង្កលក្ខណៈងាយស្រួលដល់កសិករក្នុងការដាំបន្លែសរីរាង្គសម្រាប់លក់មកទីផ្សារដែលជាមុខរបរមួយឆាប់ទទួលបានប្រាក់ចំណូលខ្ពស់ ស្របពេលនឹងស្ថានភាពបច្ចុប្បន្នទីផ្សារបន្លែកាន់តែធំទៅៗ ដោយសារប្រជាជនរស់នៅទីក្រុងនិងទីប្រជុំជនកាន់តែកើន និងអ្នកទេសចរណ៍បរទេស កាន់តែកើនឡើងជាប់ជានិច្ច។
ការផលិតស្រូវ បន្លែ ឈើហូបផ្លែ និងផលិតផលដំណាំផ្សេងៗបានជោគជ័យទាមទារឲ្យមានជីធម្មជាតិគ្រប់គ្រាន់ ជីលាមកសត្វ (គោ ក្របី មាន់ ទា....) ជាពិសេសកាកសំណល់ឡជីវឧស្ម័ន។ ជីធម្មជាតិមិនត្រឹមតែជួយឲ្យយើងបានផលខ្ពស់ទេ គឺថែមទាំងជួយឲ្យដីមានជីជាតិយូអង្វែង និងកាត់បន្ថយនូវចំណាយជាច្រើនដែលនាំឲ្យកសិករទទួលបាន ប្រាក់ចំណេញខ្ពស់ និងយូរអង្វែង។
ដើម្បីទទួលបានជោគជ័យយូរអង្វែងក្នុងការអភិវឌ្ឍកសិដ្ឋានកសិករត្រូវយកចិត្តទុកដាក់លើទ្រឹស្ដី«ស៤» ដែលក្នុងនោះមានដូចជាស្រះ, សួន, ស្រែខ្លឹម និងសត្វ។ ស្រះ សម្រាប់ស្តុបទឹកស្រោចស្រពគ្រប់រដូវកាលជួយរំដោះទឹក និងជាកន្លែងចិញ្ចឹមត្រី ហើយសួនដំណាំ បន្លែ ឈើហូបផ្លែ សួនដំណាំធ្វើចំណីសត្វ សួនដើមឈើពហុប្រយោជន៍ ដំណាំឳសថ។ ហើយក្នុងនោះដែរ ស្រែខ្លឹម ជាស្រែផលិតស្រូវតាម ប.វ.ស បានទិន្នផលខ្ពស់និងមានដាំដំណាំផ្សេងៗមុន និងក្រោយពេលធ្វើស្រូវ ឬបើមានទឹកគ្រប់គ្រាន់អាចធ្វើស្រែបាន ២ដងក្នុងមួយឆ្នាំ។ ស្រែក៏អាចជាកន្លែងចិញ្ចឹមកង្កែប និងត្រីនាំមកនូវចំណូលខ្ពស់ផងដែរ លើសពីនេះទៅទៀតសត្វជាពិសេស គោ ក្របី ចិញ្ចឹមយកកូនលក់ និងលាមកសម្រាប់ធ្វើជាជី និងផលិតជាជីវឧស្ម័ន។ កាកសំណល់ឡជាជីធម្មជាតិដ៏ល្អបំផុត ហើយបើប្រើលាយជាមួយធ្យូងអង្កាមធ្វើឲ្យដីមានជីជាតិល្អយូរអង្វែង៕
(សារព័ត៌មានថ្មីៗដកស្រង់ចេញពីសៀវភៅកសិករជោគជ័យ នៃមជ្ឈមណ្ឌលសិក្សានិងអភិវឌ្ឍកសិកម្ម កម្ពុជា។)
© រក្សាសិទ្ធិដោយ thmeythmey.com