អន្តរជាតិ
ឧបនាយករដ្ឋមន្រ្តីថៃ Prawit Wongsuwon នៅក្នងកិច្ចប្រជុំរដ្ឋមន្រ្តីការពារជាតិអាស៊ានបូក, រូបភាព៖ AP
×![]()
ដោយ: ធៀន ភារិន្ទ
នៅក្នុងកិច្ចប្រជុំរដ្ឋមន្ត្រីការពារជាតិអាស៊ាននៅថៃ មន្ត្រីជាន់ខ្ពស់ការពារជាតិមកពីបណ្តាលប្រទេសអាស៊ាន និងប្រទេសដៃគូសន្ទនា ៨ទៀតដូចជា អាមេរិក ចិន ជប៉ុន រុស្ស៊ី អូស្ត្រាលី ឥណ្ឌា នូវែលសេឡង់ និងកូរ៉េខាងត្បូង នៅថ្ងៃទី១៨ ខែវិច្ឆិកា បានព្រមានថា បញ្ហាសន្តិសុខ ត្រូវបានគំរាមកំហែងយ៉ាងខ្លាំងនៅក្នុងតំបន់អាស៊ី-ប៉ាស៊ីហ្វិក។ បញ្ហាទាំងនោះ មានដូចជា ជម្លោះសមុទ្រចិនខាងត្បូង នុយក្លេអ៊ែរកូរ៉េខាងជើង និងការប្រជែងឥទ្ធិពលគ្នារវាងអាមេរិក និងចិនជាដើម។ 
«យើងទទួលស្គាល់ថាការគំរាមកំហែងសន្តិសុខ និងបញ្ហាប្រឈមនៅក្នុងតំបន់អាស៊ីប៉ាស៊ីហ្វិក គឺជាបញ្ហាអន្តរប្រទេស និងកើនឡើងយ៉ាងឆាប់រហ័ស និងធ្ងន់ធ្ងរយ៉ាងខ្លាំង» ។ នេះតាមសេចក្តីថ្លែងការណ៍រួមរបស់មន្ត្រីការពារជាតិជាន់ខ្ពស់មកពីបណ្តាលប្រទេសអាស៊ានទាំង១០ និងប្រទេសដៃគូសន្ទនាទាំង ៨។
ដើម្បីទប់ស្កាត់ការគំរាមកំហែងសន្តិសុខ ឲ្យកាន់តែមានប្រសិទ្ធភាព ប្រទេសទាំងអស់ត្រូវតែចេះសហការជាមួយគ្នា និងស្វែងរកបញ្ហាគំរាមកំហែងរួមមួយ។ តាមរយៈសេចក្តីថ្លែងការណ៍រួម ប្រទេសទាំងអស់ បានប្តេជ្ញាថា នឹងរក្សាសន្តិភាព និងស្ថិរភាពក្នុងតំបន់អាស៊ី-ប៉ាស៊ីហ្វិក ដោយសហការជាមួយគ្នាឲ្យកាន់តែជិតស្និទ្ធ ដើម្បីដោះស្រាយបញ្ហារួមគ្នា។ នេះបើតាមការចុះផ្សាយរបស់កាសែត Bankok Post។
បើតាមការអះអាងនៅក្រៅកិច្ចប្រជុំកិច្ចប្រជុំរដ្ឋមន្ត្រីការពារជាតិអាស៊ានបូក លោក Kongcheep Tantravanich អ្នកនាំពាក្យក្រសួងការពារជាតិថៃ បានអះអាងថា ប្រទេសមួយចំនួន បានលើកឡើងពីការព្រួយបារម្ភលើការប្រកួតប្រជែងរបស់ប្រទេសមហាអំណាចចិន និងអាមេរិក បញ្ហាប្រឈមក្នុងតំបន់ដូចជា ភេរវកម្ម និងនុយក្លេអ៊ែរជាដើម។ ទន្ទឹមនេះ អ្នកនាំពាក្យបានបន្តទៀតថា គ្រាន់តែបញ្ហាសមុទ្រចិនខាងត្បូង ចិន និងបណ្តាលប្រទេសអាស៊ានមួយចំនួន បានជជែកគ្នាយ៉ាងច្រើន ក្នុងកិច្ចប្រជុំរយៈពី៣ម៉ោងនេះ។
ទាក់ទងទៅនឹងបញ្ហាខាងលើ ប្រទេសទាំងអស់ ប្តេជ្ញារក្សាស្ថិរភាព និងសន្តិភាពក្នុងតំបន់។ ជាពិសេស ប្រទេសទាំងអស់ បានសន្យាគោរពច្បាប់អន្តរជាតិ ក្នុងគោលបំណងទប់ស្កាត់ជម្លោះប្រដាប់អាវុធរវាងប្រទេស និងប្រទេស។
សូមបញ្ជាក់ថា កិច្ចប្រជុំរដ្ឋមន្ត្រីការពារជាតិអាស៊ានបូកលើកទី៦នេះ ត្រូវប្រារព្ធឡើងចាប់ពីថ្ងៃទី១៦ ដល់ថ្ងៃទី ១៩ ខែវិច្ឆិកា។ កិច្ចប្រជុំមានការចូលរួមពីប្រទេសអាស៊ាន ១០ និងប្រទេសដៃគូសន្ទនា ៨ប្រទេសរួមមានអាមេរិក ចិន ជប៉ុន រុស្ស៊ី អូស្ត្រាលី ឥណ្ឌា នូវែលសេឡង់ និងកូរ៉េខាងត្បូង៕
Tag:
អាស៊ាន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
