អន្តរជាតិ
កិច្ចព្រមព្រៀងពាណិជ្ជកម្មចិន-អាមេរិកដំណាក់កាលទី១ អាចនឹងចុះហត្ថលេខានៅឆ្នាំក្រោយ រូបភាព៖ Reuters
× ពិធីចុះហត្ថលេខារវាងទីក្រុងវ៉ាស៊ីនតោន និងទីក្រុងប៉េកាំង អាចពន្យារហូតដល់ឆ្នាំក្រោយ។ នេះបើតាមការលើកឡើងរបស់អ្នកជំនាញពាណិជ្ជកម្ម និងមនុស្សដែលជិតស្និទ្ធជាមួយសេតវិមាន។ ប៉ុន្តែអ្នកជំនាញចិនមួយចំនួន នៅតែមានសុទិដ្ឋិនិយមដដែលថា កិច្ចព្រមព្រៀងពាណិជ្ជកម្មដំណាក់កាលទីមួយ អាចសម្រេចក្នុងពេលឆាប់ៗនេះ ។
បើតាមការលើកឡើងកាលពីប្រធានាធីបតីអាមេរិក ដូណាល់ ត្រាំ និង រដ្ឋមន្ត្រីហិរញ្ញវត្ថុ Steven Mnuchinកន្លងមក ការចុះហត្ថលេខាលើកិច្ចព្រមព្រៀងដំណាក់កាលទីមួយរវាងអាមេរិក-ចិន អាចប្រើពេលយ៉ាងច្រើនបំផុតត្រឹម ៥សប្តាហ៍ប៉ុណ្ណោះ។ ប៉ុន្តែរហូតមកដល់ពេលនេះ មិនទាន់មានពិធីចុះហត្ថលេខាណាមួយលេចឡើងនៅឡើយទេ ហើយស្ថានការណ៍កាន់តែស្មុគស្មាញថែមទៀត។
ប្រាប់អ្នកកាសែតនៅថ្ងៃទី២០ ខែវិច្ឆិកា លោក ត្រាំ បានលើកឡើងថា លោកមិនគិតថា ទីក្រុងប៉េកាំងនឹងធ្វើតាមសំណើចង់បានរបស់ភាគីអាមេរិកឡើយ។ ទន្ទឹមគ្នានេះ លោកប្រធានាធិបតី ក៏ទទួលស្គាល់ផងថា ការដកពន្ធ ដែលបានដាក់ពីមុន ដើម្បីជាសម្បទានសម្រាប់កិច្ចព្រមព្រៀងដំណាក់កាលទីមួយ គឺមិនមែនជាសញ្ញាល្អឡើង ប្រសិនបើទីក្រុងវ៉ាស៊ីនតោន មិនគិតពីបញ្ហាផ្ទេរបច្ចេកវិទ្យា និងកម្មសិទ្ធិបញ្ហាជាមួយទីក្រុងវ៉ាស៊ីនតោន។
ប៉ុន្តែយ៉ាងណាក៏ដោយ លោក Liu He ឧបនាយករដ្ឋមន្ត្រីចិន និងអ្នកចរចាតំណាងពាណិជ្ជកម្មចិន នៅតែមានសុទិដ្ឋិនិយម លើកិច្ចព្រមព្រៀងដំណាក់កាលទី១ ដដែល។ ជាមួយគ្នានេះ លោកក៏បានបញ្ជាក់ផងដែរថា លោកបានភាន់ច្រឡំលើចំណុចទាមទាររបស់អាមេរិកមួយចំនួន តែអ្នកតំណាងចរចាពាណិជ្ជកម្មរូបនេះ មិនបានបញ្ជាក់ពីចំណុចភាន់ច្រឡំច្បាស់លាស់ឡើយ។ នេះបើតាមការចុះផ្សាយរបស់សារព័ត៌មាន Bloomberg។
ជាការពិត អាមេរិក នឹងដំឡើងពន្ធលើមុខទំនិញចិនបន្ថែមទៀត ប្រមាណជា ១៥៦ពាន់លានដុល្លារ ដែលគ្រោងនឹងចូលជាធរមាននៅថ្ងៃទី ១៥ ខែធ្នូ ខាងមុខ។ ក្នុងមុខទំនិញនោះរួមមាន វត្ថុលម្អសម្រាប់បុណ្យណូអែល និងគ្រឿងអាឡិចត្រូនិចជាដើម។
អ្នកជំនាញជាន់ខ្ពស់ មកពីមជ្ឈមណ្ឌលពាណិជ្ជកម្ម និងយុទ្ធសាស្ត្រ និងជាអតីតទីប្រឹក្សាលោក ត្រាំ និងលោក George W. Bush បានលើកឡើងថា ប្រសិនបើការចរចាទទួលលទ្ធផលល្អ ការដំឡើងពន្ធនឹងត្រូវផ្អាកបណ្តោះអាសន្ន។ ទន្ទឹមនេះ លោកបានបន្តទៀតថា បើការចរចាបរាជ័យ អាមេរិកនឹងដំឡើងពន្ធបន្ថែម ហើយត្រូវរងចាំរហូតដល់កិច្ចព្រមព្រៀងពាណិជ្ជកម្មរវាងប្រទេសទាំងពីរចុះហត្ថលេខារហូតដល់ឆ្នាំក្រោយ។ យ៉ាងណាក៏ដោយ អ្នកជំនាញចិនមួយចំនួននៅតែជឿថា កិច្ចព្រមព្រៀងពាណិជ្ជកម្មដំណាក់កាលទីមួយ នឹងសម្រេចនៅចុងឆ្នាំ២០១៩។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ជាការពិត លោក ត្រាំ និងសមភាគីចិន ស៊ី គ្រោងចុះហត្ថលេខាលើកិច្ចព្រមព្រៀងដំណាក់កាលទីមួយ ក្នុង អំឡុងពេលកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិកដែលស៊ីលីជាម្ចាស់ផ្ទះក្នុងខែវិច្ឆិកានេះ។ ប៉ុន្តែស៊ីលី បានប្រកាសលុបចោលកិច្ចប្រជុំវិញ ដែលធ្វើឲ្យរាំងស្ទះដល់ការចុះហត្ថលេខា។ ទន្ទឹមជាមួយនេះ ការអនុម័តច្បាប់ប្រជាធិបតេយ្យនិងសិទ្ធិមនុស្សហុងកុងពីសំណាក់ព្រឹទ្ធសភាអាមេរិក ក៏ជាឧបសគ្គមួយ ក្នុងការសម្រេចកិច្ចព្រមព្រៀងខាងលើផងដែរ៕
© រក្សាសិទ្ធិដោយ thmeythmey.com