អន្តរជាតិ
លោក ត្រាំ អាចមិនចុះហត្ថលេខាលើសេចក្ដីស្នើច្បាប់ហុងកុង
× សេចក្ដីស្នើច្បាប់ស្ដីពីប្រជាធិបតេយ្យនៅហុងកុងដែលត្រូវបានសភាអាមេរិកទាំងពីរអនុម័តដោយសំឡេងលើសលប់ បានទៅដល់សេតវិមានហើយ ដើម្បីរង់ចាំការចុះហត្ថលេខាដោយប្រធានាធិបតី ដូណាល់ ត្រាំ មុននឹងក្លាយជាច្បាប់ដើម្បីអនុវត្ត។ ប៉ុន្តែលោក ត្រាំ មិនទាន់និយាយយ៉ាងណាលើសេចក្ដីស្នើនេះឡើយ ដ្បិតវាអាចប៉ះពាល់ដល់ការប្រឹងប្រែងរបស់រដ្ឋបាលលោកក្នុងការចរចាជាមួយប៉េកាំងដើម្បីឈានទៅបញ្ចប់ជម្លោះពាណិជ្ជកម្ម។
ប្រធានាធិបតីអាមេរិក ដូណាល់ ត្រាំ នៅមិនទាន់ផ្ដល់ចម្លើយជាក់លាក់ណាមួយលើសេចក្ដីស្នើច្បាប់ស្ដីពីហុងកុងដែលត្រូវបានសភាទាំងពីរអនុម័តរួចរាល់ហើយ។ សេចក្ដីស្នើច្បាប់នេះ ទៅដល់តុរបស់លោករួចហើយ និងរង់ចាំដែលការចុះហត្ថលេខាដោយលោក ត្រាំ មួយដំណាក់ទៀត ទើបក្លាយជាច្បាប់តែម្ដង។ ទីក្រុងប៉េកាំង បានរិះគន់សេចក្ដីស្នើច្បាប់នេះ ដោយចាត់ទុកជាការជ្រៀតជ្រែកមកក្នុងកិច្ចការផ្ទៃក្នុងរបស់ខ្លួន។
ទន្ទឹមការរិះគន់ ប៉េកាំងក៏ព្រមានចាត់វិធានការតបវិញ បើសេចក្ដីស្នើច្បាប់នេះចូលជាធរមាននោះ។ សព្វថ្ងៃ លោក ត្រាំ កំពុងថ្លឹងថ្លែងពីផលវិបាកនានារវាងជម្រើសពីរ គឺត្រូវចុះហត្ថលេខាដើម្បីឲ្យសេចក្ដីស្នើនេះក្លាយជាច្បាប់តាមការចង់បានរបស់ស្ថាប័ននីតិបញ្ញតិទាំងពីរ ឬក៏ត្រូវទុកចោលដើម្បីថែទាំបរិយាកាសចរចាជាមួយចិនរឿងសង្គ្រាមពាណិជ្ជកម្មជិតពីរឆ្នាំមកនេះ។
ឆ្លើយនឹងសំណួរក្នុងកិច្ចសម្ភាសជាមួយទូរទស្សន៍ Fox News ព្រឹកថ្ងៃទី២២ ខែវិច្ឆិកា (ម៉ោងនៅអាមេរិក) ថា លោកអាចវ៉េតូសេចក្ដីស្នើច្បាប់នេះឬយ៉ាងណា ប្រធានាធិបតីអាមេរិករូបនេះបានផ្ដល់ចម្លើយបែបពង្វាង។ លោក ត្រាំ និយាយថា៖ «ខ្ញុំប្រាប់អ្នកថា យើងត្រូវឈរនៅជាមួយហុងកុង ប៉ុន្តែខ្ញុំក៏ឈរជាមួយប្រធានាធិបតី ស៊ី ជិនភីង ដែរ។ គាត់ជាមិត្តភក្តិរបស់ខ្ញុំ និងជាមនុស្សអស្ចារ្យ។ ខ្ញុំចង់ឲ្យពួកគេដោះស្រាយបញ្ហាខ្លួនឯង»។
ពីរឿងហុងកុងនេះ លោក ត្រាំ ក៏ឆ្លៀតនិយាយពីគុណសម្បត្តិរបស់លោកទៀតថា បាតុកម្មនៅទីក្រុងនេះ អាចនឹងត្រូវកម្ទេចត្រឹម១៤នាទីប៉ុណ្ណោះ បើលោកមិនប្រាប់ឲ្យលោក ស៊ី កុំបញ្ជូនទ័ពចូលទេនោះ។ មេដឹកនាំរូបនេះប្រាប់ទូរទស្សន៍អាមេរិកដដែលថា ចិនមានកងទ័ពត្រៀមជាស្រេចនៅក្រៅហុងកុង ប៉ុន្តែមិនឈានជើងចូលទីក្រុងនេះឡើយ ដោយលោកប្រាប់មេដឹកនាំចិនថា វាជាកំហុសដ៏ធំមួយ ហើយប៉ះពាល់ការចរចាផ្នែកពាណិជ្ជកម្មទៀតផង៕
Tag:
អាមេរិក
ចិន
ហុងកុង
© រក្សាសិទ្ធិដោយ thmeythmey.com