ជាតិ
មន្ទីរពេទ្យកុមារអង្គរ នៅខ្វះថវិកាប្រមាណ៤០ម៉ឺនដុល្លារទៀត សម្រាប់ចំណាយក្នុងឆ្នាំ២០១៩
×![]()
សៀមរាប៖ មន្ទីរពេទ្យកុមារអង្គរ ត្រូវបានគេស្គាល់ជាទូទៅថាជាមន្ទីរពេទ្យដែលទទួលព្យាបាលកុមារក្រីក្រដោយឥតគិតថ្លៃ ព្យាបាលដោយការយកចិត្តទុកដាក់ និងមានគុណភាព។ មន្ទីរពេទ្យនេះបានដើរតួយ៉ាងសំខាន់ក្នុងការទ្រទ្រង់សុខភាពកុមារកម្ពុជា ពិសេសនៅតំបន់ជុំវិញខេត្តសៀមរាប។ នៅឆ្នាំ២០១៩ មន្ទីរពេទ្យនេះនៅខ្វះថវិកាប្រមាណ៤០ម៉ឺនដុល្លារទៀត ដើម្បីបង្គ្រប់ការចំណាយប្រចាំឆ្នាំរបស់ខ្លួន។
លោក ឈុំ ឆេងហេង ប្រធានផ្នែករៃអង្គាសមូលនិធិក្នុងស្រុករបស់មន្ទីរពេទ្យកុមារអង្គរបានឱ្យដឹងថា គិតត្រឹមចុងខែ វិច្ឆិកានេះ មន្ទីរពេទ្យកុមារអង្គរនៅមានតម្រូវការថវិកាប្រមាណ៤០ម៉ឺនដុល្លារទៀត ដើម្បីបង្គ្រប់ការចំណាយផ្សេងៗសម្រាប់ឆ្នាំ២០១៩ ដែលមានចំនួន ៦,៥លានដុល្លារអាមេរិក។ លោក ឆេងហេង មើលឃើញថា ចរន្តនៃការចូលរួមឧបត្ថម្ភរបស់សប្បុរសជនក្នុងស្រុកហាក់មានសន្ទុះខ្លាំងនារយៈពេល២ឬ៣ឆ្នាំចុងក្រោយនេះ ដែលបានបង្ហាញពីសញ្ញាល្អដែលពលរដ្ឋខ្មែរកាន់តែច្រើន បានរួមចំណែកជួយសង្គមជាតិ។ គម្រោងថវិការៃអង្គាសសម្រាប់ឆ្នាំ២០១៩ដែលរំពឹងទទួលបាន៦០ម៉ឺនដុល្លារ មកដល់ពេលនេះមន្ទីរពេទ្យទទួលបាន ៧០ម៉ឺនដុល្លាររួចហើយ។ នេះជាការបញ្ជាក់ពីប្រធានផ្នែករៃអង្គាសក្នុងស្រុក។
លោក ឆេងហេង បន្ថែមថា៖« ខ្ញុំរំពឹងថា នឹងមានសប្បុរសជនកាន់តែច្រើន ប្រជាពលរដ្ឋយើងក៏មានលទ្ធភាព នឹងអាចរួមចំណែកជាមួយគ្នា ខ្ញុំតែងស្រមៃថា យើងមានពលរដ្ឋច្រើន ហើយពលរដ្ឋដែលមានលទ្ធភាពក៏មានច្រើន ដូច្នេះបើម្នាក់ជួយបន្ដិចៗ ខ្ញុំជឿថាតម្រូវការថវិកាប្រចាំឆ្នាំត្រឹម៦,៥លានដុល្លារ យើងអាចជួយមន្ទីរពេទ្យបាន»។
ក្នុងពិធីទទួលថវិកាឧបត្ថម្ភពីក្រុមហ៊ុន តូយ៉ូតា ខេមបូឌា នៅរសៀលថ្ងៃទី២២ វិច្ឆិកា លោក ងួន ចាន់ភក្ដ្រា ប្រធានមន្ទីរពេទ្យកុមារអង្គរបានលើកឡើងថា នៅឆ្នាំ២០១៩នេះមន្ទីរពេទ្យមានអាយុ២០ឆ្នាំគត់ដែលបានដំណើរការដើម្បីព្យាបាលកុមារកម្ពុជា។ ២០ឆ្នាំមកនេះ មានកុមារជាង ២,៥លាននាក់ហើយដែលទទួលបានសេវាព្យាបាលក្នុងមន្ទីរពេទ្យនេះ ក្នុងនោះមន្ទីរពេទ្យក៏បានផ្តល់កន្លែងស្នាក់នៅនិងម្ហូបអាហារដល់អាណាព្យាបាលកុមារអំឡុងពេលសម្រាកព្យាបាលជំងឺទៀតផង។ នេះបើតាមការបញ្ជាក់របស់លោក ចាន់ភក្ដ្រា។
Tag:
មន្ទីរពេទ្យកុមារអង្គរ
រៃអង្គាសមូលនិធិក្នុងស្រុក
កុមារ
© រក្សាសិទ្ធិដោយ thmeythmey.com
