អចលនទ្រព្យ
អត្ថបទពាណិជ្ជកម្ម
គម្រោងវិនិយោគទុនក្នុងវិស័យទេសចរណ៍កើនឡើង ៩៤% ក្នុងរយៈពេល៨ខែឆ្នាំនេះ វេទិកាវិនិយោគទេសចរណ៍កម្ពុជាលើកទី២ រៀបចំដោយក្រសួងទេសចរណ៍ សហការជាមួយក្រុមហ៊ុនក្នុងវិស័យទេសចរណ៍ កាលពីថ្ងៃទី២២ វិច្ឆិកា ឆ្នាំ២០១៩
× រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងថាកម្ពុជាបានទទួល និងអនុម័តគម្រោងវិនិយោគទុនជាច្រើន លើវិស័យទេសចរណ៍ក្នុងឆ្នាំនេះ។ ត្រឹមរយៈពេល ៨ ខែ ដើមឆ្នាំនេះ ការវិនិយោគក្នុងវិស័យទេសចរណ៍ មានការកើនឡើងរហូតដល់៩៤% បើប្រៀបធៀបជាមួយរយៈពេលដូចគ្នា ក្នុងឆ្នាំ២០១៨។
លោករដ្ឋមន្ត្រីក្រសួងទេសចរណ៍ ថោង ខុន បានលើកឡើងដូចនេះ ក្នុងពេលបើកវេទិកាវិនិយោគទេសចរណ៍កម្ពុជា លើកទី២ នៅថ្ងៃទី២២ វិច្ឆិកា។ វេទិកានេះ រៀបចំឡើងដោយ ក្រសួងទេសចរណ៍ សហការជាមួយក្រុមហ៊ុនក្នុងវិស័យទេសចរណ៍ ក្រោមប្រធានបទ «ការកំណត់ដំណាក់កាលសម្រាប់កំណើន» ។
នៅក្នុងវេទិកាវិនិយោគទេសចរណ៍នេះ លោក ថោង ខុន បានបញ្ជាក់ថា នៅក្នុងរបាយការណ៍ក្រុមប្រឹក្សាអភិវឌ្ឍន៍កម្ពុជា CDC បើគិតចាប់ពីឆ្នាំ២០១៦ រហូតមកដល់ពេលបច្ចុប្បន្ននេះ រដ្ឋាភិបាលកម្ពុជា បានអនុម័តនិងឯកភាពគាំទ្រគម្រោងវិនិយោគទុនជាតិ និងអន្តរជាតិសរុបប្រមាណជា ៨១៣ គម្រោង មានទំហំទុនវិនិយោគសរុបប្រមាណ ២២.៥ ពាន់លាន ដុល្លារ។ ក្នុងនោះ គម្រោងទេសចរណ៍ និងផ្នែកពាក់ព័ន្ធមានចំនួន ៣៨ គម្រោង ដែលមានទុនវិនិយោគសរុបចំនួនប្រមាណជា ៩ ពាន់លានដុល្លារ កើនឡើង៤៧%។
បើគិតក្នុងរយៈពេល ៨ខែដំបូង ឆ្នាំ២០១៩ នេះ កម្ពុជាឯកភាពគម្រោងវិយោគទុនសរុបមានប្រមាណ ២២២ គម្រោង មានទំហំទឹកប្រាក់វិនិយោគសរុប ៦ ពាន់លានដុល្លារអាមេរិក ក្នុងនោះ វិស័យទេសចរណ៍ មានគម្រោងវិនិយោគចំនួន ១៤ គម្រោង ដែលមានទំហំទឹកប្រាក់វិនិយោគសរុបជាង ៤,២០០ លានដុល្លារ កើនឡើង ៩៤% បើធៀបជាមួយរយៈពេលដូចគ្នាក្នុងឆ្នាំ២០១៨។ នេះបើតាម លោក ថោង ខុន ដែលបានបន្តទៀតថា វិស័យទេសចរណ៍ នាពេលបច្ចុប្បន្ន បានរួមចំណែកប្រមាណ១២,៧% នៃផលិតផលក្នុងស្រុកសរុប(GDP)។
លោករដ្ឋមន្ត្រីទេសចរណ៍ បន្តលើកឡើងទៀតថា រាជរដ្ឋាភិបាលកម្ពុជា តែងចាត់ទុកវិស័យទេសចរណ៍ ជាវិស័យចម្បងមួយ។ ការជំរុញកំណើនសេដ្ឋកិច្ចជាតិ តាមរយៈ «ទេសចរណ៍វប្បធម៌ និងធម្មជាតិ» ត្រូវបានរាជរដ្ឋាភិបាលចាត់ទុកថាជា «មាសបៃតង» ដែលបានរួមចំណែកយ៉ាងសកម្ម ក្នុងការអភិវឌ្ឍសេដ្ឋកិច្ច និង សង្គម តាមរយៈការបង្កើតឱកាសមុខរបរ និងការងារ ជួយបង្កើនប្រាក់ចំណូល លើកកម្ពស់ជីវភាពរស់នៅ និងកាត់បន្ថយភាពក្រីក្រ របស់ប្រជាពលរដ្ឋបានយ៉ាងមានប្រសិទ្ធភាព៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com