ជាតិ
កញ្ញា សុធាវី៖ នាំគ្នាថាតៃវ៉ាន់ស្អាត សិង្ហបុរីស្អាត យើងក៏ត្រូវរួមគ្នាឲ្យគេសរសើរថា ខ្មែរស្អាតដែរ
×![]()
ដោយ: ខន ចំប៉ា
ភ្នំពេញ៖ យុទ្ធនាការ«Think Plastic» ត្រូវបានកញ្ញា អាត សុធាវី បង្កើតឡើងនៅអំឡុងខែមីនា ឆ្នាំ២០១៩ បន្ទាប់ពីនាងបានឃើញរូបភាពសំរាម ជាពិសេសសំរាមប្លាស្ទិកច្រើនពេក និងមានស្ទើរគ្រប់ទីកន្លែងនៅប្រទេសកម្ពុជា ជាពិសេសនៅតំបន់ទេសចរណ៍។ ក្នុងយុទ្ធនាការនេះ កញ្ញា អាត សុធាវី បានផលិតជាវីដេអូអប់រំខ្លីៗពីផលប៉ះពាល់របស់បា្លស្ទិក ការទុកដាក់សំរាម និងសកម្មភាពប្រចាំថ្ងៃដែលអាចចូលរួមកាត់បន្ថយប្លាស្ទិកជាដើម។ អ្នកខេត្តត្បូងឃ្មុំ រូបនេះ រំពឹងថាយុទ្ធនាការ«Think Plastic» នឹងជួយបង្កើនចំណេះដឹងអំពីប្លាស្ទិកទៅដលពលរដ្ឋកម្ពុជា ហើយគោលដៅរបស់កញ្ញា អាត សុធាវី ស្ថាបនិក«Think Plastic» គឺនាងចង់ឃើញ គឺប្រទេសកម្ពុជាស្អាត គ្មានសំរាមប្លាស្ទិកនៅពាលវាលពាសកាលនៅក្នុងរយៈពេល ១០ឆ្នាំទៀត។ 
ការនិយាយ និងការធ្វើសកម្មភាពទាក់ទងនឹងការកាត់បន្ថយការប្រើប្រាស់ប្លាស្ទិក និងការទុកដាក់សំរាម កាន់តែមានភាពសកម្មភាពឡើងៗនៅកម្ពុជា។ កញ្ញា អាត សុធាវី ក៏ជាអ្នកដែលមានសកម្មភាពច្រើនដែរ អំពីបញ្ហានេះ។ នៅដើមឆ្នាំ២០១៩ នារីសក់ខ្លីវាលក វ័យ៣៣ឆ្នាំរូបនេះ បានបង្កើតយុទ្ធនាការមួយ ឈ្មោះថា«Think Plastic» ឬ«សូមគិតពីប្លាស្ទិក» ដើម្បីចែករំលែកបទពិសោធន៍ការកាត់បន្ថយការប្រើប្រាស់បា្លស្ទិករបស់ខ្លួន,ពន្យល់ពីផលប៉ះពាល់របស់ប្លាស្ទិកដល់សុខភាព និងបរិស្ថាន និងការរៀបចំទុកដាក់សំរាមជាដើម។
ជាកូនទី៤ ក្នុងចំណោមបងប្អូនប្រុសស្រី៦នាក់ នៃគ្រួសារអ្នកលក់ដូរមួយក្នុងស្រុកក្រូចឆ្មារ ខេត្តត្បូងឃ្មុំ កញ្ញា អាត សុធាវី បានឲ្យដឹងថា យុទ្ធនាការ«សូមគិតពីប្លាស្ទិក»បង្កើតឡើង នៅពេលដែលនាងបានឃើញសំរាម ជាពិសេសសំរាមប្លាស្ទិក ច្រើនហួសប្រមាណអណ្តែតមកទើរនៅច្រាំងសមុទ្រ និងសំរាមនៅទីកន្លែងផ្សេងទៀតនៅកម្ពុជា ជាពិសេសនៅតំបន់ទេសចរណ៍តែម្តង។ កញ្ញា អាត សុធាវី រៀបរាប់ប្រាប់សារព័ត៌មាន ThmeyThmey ដូច្នេះ៖«ខ្ញុំឃើញថាសំរាមប្លាស្ទិកនៅស្រុកខ្មែរយើង វាច្រើនពេក។ ខ្ញុំទៅលេងឆ្នេរសមុទ្រដែលខ្ញុំធ្លាប់ទៅ ហើយសំរាមនៅលើឆ្នេរវាច្រើនមែនទែន។ ដល់កម្រិតមួយដែលយើងគិតថា បើយើងអត់ធ្វើអ្វីម្យ៉ាងទេ សំរាមហ្នឹងវាកាន់តែច្រើនទៅ។ អ៊ីចឹង មុន និងក្រោយ ប្រទេសកម្ពុជា សឹងតែថាគ្រប់កន្លែងណា ក៏មានសំរាមច្រើនដែរ។ អ៊ីចឹងវាអាចជាបញ្ហាដល់បរិស្ថាន និងមនុស្សយើងដែរ»។
កញ្ញា អាត សុធាវី ចង់ឃើញស្រុកខ្មែរស្អាត គ្មានសំរាម!
ក្នុងរយៈពេលមិនទាន់បានមួយឆ្នាំផង កញ្ញា អាត សុធាវី វ័យ៣៣ឆ្នាំ បានផលិតជាវីដេអូអប់រំខ្លីៗជាង៥០ហើយ ស្តីពីផលប៉ះពាល់របស់បា្លស្ទិក សកម្មភាពកាត់បន្ថយការប្រើប្លាស្ទិកប្រចាំថ្ងៃ និងការទុកដាក់សំរាមជាដើម។ វីដេអូទាំងអស់នោះ មានអ្នកទស្សនាច្រើនជាង ១ លានដង។ សម្រាប់ សុធាវី តួលេខអ្នកទស្សនានេះ បានផ្តល់ក្តីសង្ឃឹម និងការលើកទឹកចិត្តដល់នាង ឲ្យកាន់តែស្វាហាប់ថែមទៀត នៅក្នុងសកម្មភាពសង្គមមួយនេះ។
អ្វីដែលធ្វើឲ្យ នារីសក់ខ្លីសម្បុរសរូបនេះ កាន់តែរំភើប និងបានចាត់ទុកថាជាជោគជ័យជំហានដំបូងរបស់ខ្លួននោះគឺមិត្តភក្តិជុំវិញខ្លួន និងអ្នកដែលបានទស្សនាវីដេអូរបស់ខ្លួនមួយចំនួននោះ បានចាប់ផ្តើមកាត់បន្ថយការប្រើប្រាស់ប្លាស្ទិក ក្នុងជីវភាពប្រចាំថ្ងៃរបស់ពួកគេ។
កញ្ញា អាត សុធាវី បន្តជាមួយនឹងពាក្យពេចន៍ក្លៀវក្លាថា៖«ការចូលរួមកាត់បន្ថយការប្រើប្រាស់ប្លាស្ទិក ទាមទារឲ្យយើងមានការលើកទឹកចិត្តគ្នាទៅវិញទៅមក។ ចំពោះខ្ញុំ ខ្ញុំលើកទឹកចិត្តឲ្យអ្នកដែលមើលវីដេអូ គាត់ចូលរួមកាត់បន្ថយ។ ចំពោះអ្នកដែលចូលរួមកាត់បន្ថយ ហើយគាត់ប្រាប់រឿងហ្នឹងមកខ្ញុំវិញ គឺខ្ញុំសប្បាយចិត្តណាស់ ព្រោះអ្វីដែលយើងបានចែករំលែកទៅ គឺគាត់ទទួលបាន ហើយពួកគាត់អាចធ្វើតាមដែរ។ អ៊ីចឹងខ្ញុំសង្ឃឹមថា អ្វីដែលខ្ញុំចែករំលែក អាចមានឥទ្ធិពលជាវិជ្ជមានចំពោះអ្នកផ្សេង»។
ចំណាយថវិកាផ្ទាល់ខ្លួន និងពេលវេលាដែលនៅសេសសល់ពីការងារប្រចាំថ្ងៃ កញ្ញា អាត សុធាវី មិនប្រាថ្នាឲ្យអ្នកដទៃសរសើរខ្លួន ថាបានចូលរួមកាត់បន្ថយការប្រើប្រាស់ប្លាស្ទិកឡើយ ប៉ុន្តែស្ត្រីដែលស្រឡាញ់បរិស្ថានរូបនេះ ចង់ឮភ្ញៀវទេសចរបរទេស ឬអ្នកដែលមកដល់កម្ពុជា អួតសរសើរថា ប្រទេសខ្មែរស្អាត គ្មានសំរាម។ កញ្ញា អាត សុធាវី លើកឡើងដូច្នេះ៖ «អ្វីដែលយើងតែងតែឮប្រជាជនខ្មែរយើងនិយាយ គឺថាស្រុកខ្មែរអត់សូវស្អាតទេ កន្លែងណាក៏សម្បូរសំរាមដែរ។ ហើយអ្នកដែលធ្លាប់បានទៅស្រុកគេ គេថា ប្រទេសគេស្អាតណាស់! សិង្ហបុរីស្អាត! តៃវ៉ាន់ស្អាតណាស់! ប្រទេសនេះស្អាត! អ៊ីចឹងខ្ញុំចង់ឲ្យពាក្យហ្នឹងគេនិយាយដូចគ្នាដែរ។ ២០ឆ្នាំក្រោយ ១០ឆ្នាំក្រោយ ក្មេងៗជំនាន់ក្រោយ ឬអ្នកគេមកលេងស្រុកខ្មែរ គេនិយាយថា ស្រុកខ្មែរស្អាតណាស់ គ្មានសំរាម។ អ៊ីចឹងនេះជាជំហានមួយ បើសិនជាយើងធ្វើការជាមួយគ្នានៅថ្ងៃហ្នឹង ១០ឆ្នាំក្រោយ គឺកម្ពុជាយើងអត់មានសំរាម។ វាមានដែរ មិនអត់សោះទេ តែវានៅកន្លែងមួយដែលត្រឹមត្រូវ»។
កញ្ញា អាត សុធាវី៖ ការងារសង្គមធ្វើឲ្យយុវជនចេះធ្វើការជាមួយមនុស្ស
តាមពិតទៅ យុទ្ធនាការ«សូមគិតពីប្លាស្ទិក» មិនមែនជាការងារស្នូលរបស់កញ្ញា អាត សុធាវីនោះទេ វាគ្រាន់តែជាផ្នែកមួយនៃការងារសង្គមរបស់នាងប៉ុណ្ណោះ។ សុធាវី បានចំណាយទាំងថវិកាផ្ទាល់ខ្លួន និងជាពិសេសពេលវេលាដែលសេសសល់ពីការងារប្រចាំថ្ងៃរបស់នាងទាំងអម្បាលម៉ាន មកផលិតវីដេអូអប់រំ អំពីប្លាស្ទិកនេះ។
លះបង់ដល់ថ្នាក់នេះ ក៏ព្រោះតែស្ត្រីវ័យ៣៣ឆ្នាំរូបនេះ ផ្តល់តម្លៃខ្ពស់ចំពោះការធ្វើការងារសង្គម ដែលនាងបន្តធ្វើមកប្រមាណ១៥ឆ្នាំមកហើយ។ បើតាម កញ្ញា អាត សុធាវី រយៈពេលកន្លងមក នាងបានចូលរួមយ៉ាងច្រើននៅក្នុងការងារសង្គម ជាមួយអង្គការសង្គមស៊ីវិល ដែលធ្វើការងារនៅក្នុងវិស័យអប់រំ និងសុខាភិបាល។ សម្រាប់ស្ត្រីរូបនេះ ការចូលរួមក្នុងការងារ មិនត្រឹមតែផ្តល់ចំណេះដឹង កេរ្តិ៍ឈ្មោះ និងបទពិសោធន៍ការងារប៉ុណ្ណោះទេ ប៉ុន្តែក៏វាបានជួយបង្រៀនឲ្យចេះពីរបៀបធ្វើការងារផង។
កញ្ញា អាត សុធាវី ពន្យល់បន្ថែមថា៖«បើសិនជាយុវជនគាត់ចាប់ផ្តើមធ្វើការងារសង្គមណាមួយ មិនថាទៅលើផ្នែកអប់រំ បរិស្ថាន ឬទេសចរណ៍ ឬក៏ផ្នែកណាមួយទេ ខ្ញុំជឿថា គាត់នឹងរៀនបានច្រើនចេញពីអ្វីដែលគាត់បានធ្វើហ្នឹង។ ហើយអ្វីដែលសំខាន់មួយទៀត គឺយើងរៀនធ្វើការជាមួយមនុស្សនៅក្នុងសង្គមដូចគ្នា ពីព្រោះនេះគឺជារឿងមួយដែលសំខាន់។ ការណ៍ដែលយុវជនទាំងអស់គ្នាទៅរៀននៅមហាវិទ្យាល័យ រៀនបានជ្រៅជ្រះច្រើន គឺជារឿងល្អ ប៉ុន្តែគាត់មានជំនាញរៀន គាត់ត្រូវមានជំនាញធ្វើមួយទៀត។ អ៊ីចឹងគឺវាទាក់ទងនឹងការងារសង្គមហ្នឹងហើយ ទាល់តែគាត់ចាប់ប្រឡូក គាត់ចាប់ផ្តើមចូលរួម ទើបគាត់បែកគំនិតច្រើន មើលឃើញភាពទូលំទូលាយបានច្រើន បទពិសោធន៍របស់គាត់ ក៏ល្អជាងមុន»។
ដោយវាមានគុណតម្លៃដ៏មហិមានេះហើយ ទើបកញ្ញា អាត សុធាវី លើកទឹកចិត្តឲ្យយុវជន ចូលរួមធ្វើការងារសង្គមឲ្យបានកាន់តែច្រើន និងចូលរួមដោយក្តីស្រឡាញ់ ទើបការងារនោះមានភាពយូរអង្វែង និងទទួលបានផ្លែផ្កាល្អ។ «ធម្មតាអ្វីក៏ដោយ ដែលយើងធ្វើដោយក្តីស្រឡាញ់ គឺទី១ យើងធ្វើបានយូរអង្វែង ហើយបើសិនជាយើងធ្វើច្រើន យើងធ្វើយូរៗទៅនឹងមានគេទទួលស្គាល់ ដែលយើងសន្មត់ថាជាការកសាងកេរ្តិ៍ឈ្មោះហ្នឹង។ អ៊ីចឹង ចំពោះខ្ញុំ ខ្ញុំមើលឃើញថា អ្វីក៏ដោយឲ្យតែយើង និងចូលរួមដោយសុដ្ឋចិត្ត អ៊ីចឹងគឺយើងអត់ចាំបាច់គិតច្រើន ថាខ្ញុំធ្វើអ៊ីចឹងដើម្បីខ្ញុំល្បី ខ្ញុំធ្វើអ៊ីចឹងដើម្បីមានកេរ្តិ៍ឈ្មោះ ឲ្យគេស្គាល់ ឬអី។ ....។ ខ្ញុំលើកទឹកចិត្តឲ្យយុវជនធ្វើចេញពីចិត្ត»។ នេះជាការលើកឡើងរបស់ កញ្ញា អាត សុធាវី ស្ថាបនិក យុទ្ធនាការ«Think Plastic» ឬ«សូមគិតពីប្លាស្ទិក» ៕
Tag:
អាត សុធាវី
ប្លាស្ទិក
សំរាម
© រក្សាសិទ្ធិដោយ thmeythmey.com
