ដោយ៖ ស៊ីធី
បន្ទាប់ពីបង្ហាញខ្លួនលើកដំបូងនៅក្នុងកម្មវិធី ONE Super Series គួរឲ្យទាក់ទាញ Wang Junguang ឬ «Golden Boy» ទទួលបានឱកាសបង្កើតប្រវត្តិសាស្ត្រថ្មីនៅក្នុងកម្មវិធី ONE: MARK OF GREATNESS នៅថ្ងៃសុក្រទី ៦ ខែធ្នូ នាក្រុងកូឡាឡាំពួរប្រទេសម៉ាឡេស៊ី។
Wang Junguang នឹងឡើងប្រកួតដណ្ដើមខ្សែក្រវាត់ ONE Strawweight Kickboxing World Championship ដែលត្រូវបានគេដាក់ឲ្យប្រជែងលើកដំបូងទល់នឹងវីរបុរសរបស់ថៃ Sam-A Gaiyanghadao។ ប៉ុន្តែវាជាការងារលំបាកមួយព្រោះ Sam-A ជាកីឡាករវីរបុរសជើងខ្លាំងថៃ និង ធ្លាប់ឈ្នះខ្សែក្រវាត់នៅសង្វៀន ONE Championship ទៀតផង។ Sam-A ជាកីឡាករដ៏អស្ចារ្យដែលឈ្នះការប្រកួតរហូតដល់ ៣៦៧ ដងក្នុងអាជីពរបស់គេ។
យ៉ាងណាក្ដី បទពិសោធន៍របស់ Wang ក៏មិនធម្មតាដែរទោះមានវ័យត្រឹម ២៤ ឆ្នាំក៏ដោយ ហើយគេឈ្នះខ្សែក្រវាត់កម្រិតពិភពលោកមុនឈានជើងចូលប្រកួតនៅសង្វៀន ONE ទៀតផង។ កីឡាករចិនរូបនេះជឿជាក់ថា វាជាពេលវេលាមួយដើម្បីកសាងកេរ្តិ៍ឈ្មោះរបស់ខ្លួនលើឆាកអន្តរជាតិ។ “Golden Boy” បានថ្លែងថា៖«ខ្ញុំជាកីឡាករជំនាន់ក្រោយ។ Sam-A ជាវីរបុរសទៅហើយក្នុងអាជីពរបស់គាត់ ប៉ុន្តែវាជាអតីតកាលប៉ុណ្ណោះ។ ខ្ញុំនឹងប្រកួតជាមួយគាត់ដោយមានទំនុកចិត្ត និងមិនព្រួយបារម្ភ»។
កីឡាករមកពី Zhoukou នៃខេត្ត Henan មានកំណត់ត្រា ឈ្នះ ២៤ ដង ចាញ់ ៣ដង និង ស្មើ១ដងនៅក្នុងអាជីពប្រកួត kickboxing ហើយមានកំណត់ត្រាអស្ចារ្យក្នុងរយៈពេល២ឆ្នាំចុងក្រោយដោយឈ្នះ ៨ លើកជាប់គ្នា។ ជ័យជម្នះនេះបានធ្វើឲ្យរូបគេឈ្នះខ្សែក្រវាត់ World Title កាលខែសីហា កន្លងទៅ។ ការបង្ហាញខ្លួនលើសង្វៀនលំដាប់អន្តរជាតិលើកដំបូង «Golden Boy» មិនបានធ្វើឲ្យអ្នកគាំទ្រនិងក្រុមគ្រូបង្វឹកខកចិត្តឡើយដោយផ្ដួល Federico Roma ឲ្យសន្លប់ត្រឹមទឹកទី១ប៉ុណ្ណោះដោយសារកណ្ដាប់ដៃមហាសាលរបស់គេ។ Wang បានសារភាពថា គេមានភាពភ័យខ្លាចតិចតួចកាលប្រកួតដំបូងនៅ ONE ទល់នឹងកីឡាករមានបទពិសោធន៍កម្រិតពិភពលោកប៉ុន្តែ រូបគេអាចផ្ដួលដៃគូឲ្យសន្លប់បានដើម្បីជ័យជម្នះ។
កីឡាករ ដដែលសង្កត់ធ្ងន់ថា៖«[Roma] មានមាឌធំជាងខ្ញុំ ហើយខ្ញុំគិតថាគេច្បាស់ជាខ្លាំងជាងខ្ញុំ។ ដូច្នេះខ្ញុំបារម្ភណាស់។ ប៉ុន្តែនៅពេលយើងឡើងលើសង្វៀន វាមិនជាលំបាកពេកដូចដែលខ្ញុំធ្លាប់ គិតនោះទេ»។ «Golden Boy» គូសបញ្ជាក់ថា៖ «ខ្ញុំបង្កើតចន្លោះ ហើយខ្ញុំបានផ្ដួលគេតែម្ដង។ ខ្ញុំដឹងថាគេរហ័ស ប៉ុន្តែខ្ញុំក៏ទទួលផលចំណេញអំពីវា។ ខ្ញុំចាប់ផ្ដើមបានល្អហើយក៏ផ្ដាច់យកឈ្នះតែម្ដង។ ខ្ញុំដឹងថា បើសិនជារាប់៣ដងក្នុងការប្រកួតមួយទឹក នោះការប្រកួតនឹងបញ្ចប់។ ដូច្នេះខ្ញុំត្រូវតែធ្វើវា និង ម៉ាត់ឲ្យធ្ងន់ៗ»។
Wang មានជំនាញក្បាច់ Kugn Fu តាំងពីតូចបន្ទាប់ពីឳពុករបស់ខ្លួននាំយកទៅវិហារ Shaolin ដើម្បីរៀនក្បាច់គុនចិនមួយនេះ។ បន្ទាប់មកទៀត រូបគេបានលះបង់ដើម្បីសម្រេចក្ដីស្រមៃនិងដើម្បីអាជីពដ៏អស្ចារ្យរបស់ខ្លួន។
«Golden Boy» ពិតជារីករាយដែលបានប្រឈមនឹងកីឡាករល្បីៗកម្រិតពិភពលោក ហើយវាជាការតេស្តសមត្ថភាពដ៏ល្អនៅក្នុងអាជីព។ គេតែងតែត្រៀមរួចរាល់ជានិច្ច។ «បន្ទាប់ពីផ្ដួល Roma អ្នកចាត់ការរបស់ខ្ញុំ បានសួរថាចង់ប្រកួតដណ្ដើមខ្សែក្រវាត់ទេនៅ ONE ទេ នៅថ្ងៃទី ៦ ធ្នូ។ ខ្ញុំឆ្លើយ បាទចង់។ ខ្ញុំចង់បានខ្សែក្រវាត់ តែខ្ញុំមិនដឹងជួបកីឡាកររូបណានោះទេ។ ពីរបីថ្ងៃបន្ទាប់ទើបគាត់ផ្ញើព័ត៌មានឲ្យខ្ញុំ។ ហើយពេលនោះគឺ Sam-A។ ខ្ញុំពិតជាតិភ្ញាក់ផ្អើលមែនទែន។ ខ្ញុំធ្លាប់មើលវីដេអូរបស់ Sam-A ជាច្រើនពេលហ្វឹកហាត់។ Sam-A ប្រកួតជាង ៤០០ លើក ហើយមានបទពិសោធន៍ច្រើនណាស់។ តែភាពអំណត់របស់ខ្ញុំល្អជាង ខ្ញុំក្មេងជាង និងកម្លាំងរបស់ខ្ញុំក៏ខ្លាំងជាងដែរ»។ Wang រៀបរាប់ដូច្នេះ។
Sam-A ជាកីឡាករជំនាញខាងមួយថៃ ប៉ុន្តែ គេថ្មីក្នុងការប្រកួត kickboxing ស្របពេលដែល Wang មានការប្រកួតដ៏អស្ចារ្យកន្លងមកនៅលើសង្វៀន។ Wang រំលឹកថា៖«ក្បាច់របស់ខ្ញុំ ខ្ញុំអាចបំបែកក្បួនការពាររបស់ Sam-A បាន។ ខ្ញុំអាចរកចន្លោះប្រហោងដើម្បីបញ្ចប់រូបគេ។ ខ្ញុំព្យាយាមមិនឲ្យ Sam-A ចូលជិតខ្ញុំទេនៅក្នុងពីរទឹកដំបូង។ បន្ទាប់មក ខ្ញុំនឹងប្រើក្បាច់របស់ខ្ញុំផ្ដួលយកតែម្ដង។ Sam-A អ្នកជាវីរបុរសម្នាក់ ខ្ញុំគោរពអ្នក ប៉ុន្តែពេលវេលាកន្លងផុតទៅហើយ ហើយពេលរបស់ខ្ញុំនឹងចូលមកដល់។ ខ្ញុំនឹងធ្វើឲ្យការប្រកួតល្អ និង នាំខ្សែក្រវាត់ទៅប្រទេសចិនវិញ»។
កម្មវិធីបន្ទាប់ សូមកុំភ្លេចទស្សនាកម្មវិធីប្រកួតបន្ទាប់នៅ ONE: MARK OF GREATNESS នៅថ្ងៃទី ៦ ខែ ធ្នូ ខាងមុខ ពីក្រុងកូឡាឡាំពួរ ប្រទេសម៉ាឡេស៊ី ចាប់ពីម៉ោង ៥:០០ ល្ងាចតទៅ (ម៉ោងកម្ពុជា)តាមរយៈ Facebook, Twitter, YouTube, ONE Super App, និង ផ្សាយបន្តផ្ទាល់ដោយ CBS៕