ពេលនេះ កម្ពុជាមានមេដាយសរុប២៤ ខណៈប្រដាល់សកល និងគុនខ្មែរត្រៀមទទួលសំរឹទ្ធ៥បន្ថែម

កីឡាជាតិ

ជាតិ

ពេលនេះ កម្ពុជាមានមេដាយសរុប២៤ ខណៈប្រដាល់សកល និងគុនខ្មែរត្រៀមទទួលសំរឹទ្ធ៥បន្ថែម

08, Dec 2019 , 7:15 am

រូបភាព

លោក អេ ភូថង ជាមួយកីឡាករ ហ៊ឹម គឹមរៀង។ រូបថត អគ្គនាយកដ្ឋានកីឡា

ដោយ: រួបរួម

កាលពីថ្ងៃសៅរ៍ ទី៧ ខែធ្នូ កីឡាការិនីសូហ្វតិន្នីស ម៉េត ម៉ារីយ៉ាន ទទួលបានមេដាយសំរឹទ្ធលើវិញ្ញាសាឯកត្តជននារី ដែលធ្វើឲ្យចំនួនមេដាយរបស់កម្ពុជាឡើងសរុបដល់២៤ ក្នុងនោះមានមាស២ ប្រាក់៤ និងសំរឹទ្ធ១៨ ពីព្រឹត្តិការណ៍កីឡាស៊ីហ្គេមលើកទី៣០នៅហ្វីលីពីន។ តាមពិតទៅ កម្ពុជាមានមេដាយសំរឹទ្ធ៥ទៀតពីកីឡាករប្រដាល់សកល (២) និងគុនខ្មែរ (៣) ប៉ុន្តែនៅរង់ចាំពិធីបំពាក់ផ្លូវការ។

កីឡាករប្រដាល់សកល សៅ រង្សី បានប្រកួតចាញ់កីឡាករឥណ្ឌូណេស៊ី Langu Kornelis ក្នុងលទ្ធផល ៥-០ ប៉ុន្តែត្រូវទទួលបានមេដាយសំរឹទ្ធ។ ជាមួយគ្នានេះ កីឡាករ ស៊ីវ សុខម៉េង ដែលបានយកឈ្នះកីឡាករឡាវ Khotsombath Kalanh ត្រូវទទួលមេដាយសំរឹទ្ធផងដែរ ក្រោយពីគេបានកីឡាករវៀតណាម Nguyen Manh Cuong ក្នុងទម្ងន់៧៥គីឡូក្រាមនៅវគ្គពាក់កណ្តាលផ្តាច់ព្រ័ត្រ។ កីឡាករទាំងពីររង់ចាំតែពិធីបំពាក់មេដាយផ្លូវការប៉ុណ្ណោះ ក្រោយរកឃើញអ្នកឈ្នះមេដាយមាស និងប្រាក់។

ងាកទៅប្រភេទកីឡាគុនខ្មែរឯណោះវិញ បន្ទាប់ពីបានយកឈ្នះកីឡាករឡាវ Banxabeth Soubinh កីឡាករ ឡៅ ចិត្រា បានចាញ់កីឡាករថៃ Khundam Norapat នៅវគ្គពាក់កណ្តាលផ្តាច់ព្រ័ត្រ។ កីឡាករ វ៉ាន់ វឿន បានយកឈ្នះកីឡាករវៀតណាម Nguyen Quang Huy ក្នុងទម្ងន់៥៤គីឡូក្រាម តែចាញ់កីឡាករហ្វីលីពីន Lampacan Ariel Lee នៅវគ្គពាក់កណ្តាលផ្តាច់ព្រ័ត្រ។ រីឯកីឡាករ ហ៊ឹម គឹមរៀង បានចាញ់កីឡាករថៃ Chittra Naruphon នៅវគ្គពាក់កណ្តាលផ្តាច់ព្រ័ត្រទម្ងន់៤៨គីឡូក្រាមផងដែរ។

មកដល់ពេលនេះ មេដាយដែលកម្ពុជាទទួលបានផ្លូវការរួមមាន មាស២ ប្រាក់៤ សំរឹទ្ធ១៨ សរុប២៤មេដាយ
កីឡា Arnis៖ មាស ១ ប្រាក់២ និងសំរឹទ្ធ១៧
-កីឡាករ យ៉ុង ម៉េងលី មាស១ ប្រាក់១
-កីឡាការិនី ស៊ីវ័ន្ត សូនីតា ប្រាក់១ សំរឹទ្ធ១
-កីឡាការិនី បូ ចន្ធី សំរឹទ្ធ២
-កីឡាការិនី យស់ សញ្ចនា សំរឹទ្ធ២
-កីឡាការិនី ខៀវ ចិន្តារ័ត្ន សំរឹទ្ធ២
-កីឡាករ ឌឹប ង៉ែត សំរឹទ្ធ២
-កីឡាករ មឿន ប៊ុនលី សំរឹទ្ធ២
-កីឡាករ សុខ ឈុន សំរឹទ្ធ២
-កីឡាករ ឆេម សីឡា សំរឹទ្ធ២
-កីឡាការិនី អេង ស៊ូម៉ាឡា សំរឹទ្ធ២

កីឡាប៉េតង់៖ មាស១ ប្រាក់១
-ក្រុមនារីបីទល់បី (ស្រ៊ាង សុរ៉ាឃីម, ឃួន យ៉ារី, ដួង ឌីណា និងវង ចន្ថា) មេដាយមាស ១
-វាយគូបុរស (សុខ ចាន់មាន និងយ៉ែម បូរ៉ា) មេដាយប្រាក់១

កីឡាសីប៉ាក់តាក្រ (សីដក់)៖ ប្រាក់១
-ក្រុមបុរស (នុត វិសាល, ហេង រ៉ាវុធ, ហួត សុវុត្ថា, ឈន សុខុម, ឈុំ ហាប់ឈុន, ជាតិ ខេមរិន្ទ) ប្រាក់១

សូហ្វតិន្នីស៖ សំរឹទ្ធ១
-កីឡាការិនី ម៉េត ម៉ារីយ៉ាន សំរឹទ្ធ១

***រង់ចាំពិធីបំពាក់ផ្លូវការ៖
គុនខ្មែរ៖ សំរឹទ្ធ៣
-កីឡាករ ឡៅ ចិត្រា
-កីឡាករ វ៉ាន់ វឿន
-កីឡាករ ហ៊ឹម គឹមរៀង

ប្រដាល់សកល៖ សំរឹទ្ធ២
-កីឡាករ សៅ រង្សី សំរឹទ្ធ១
-កីឡាករ ស៊ីវ សុងម៉េង សំរឹទ្ធ១