អន្តរជាតិ
ករណីផ្ទុះភ្នំភ្លើងនៅនូវែលសេឡង់៖ យ៉ាងតិច ៥នាក់ស្លាប់ និងជាច្រើននាក់រងរបួស
× យ៉ាងហោចណាស់ មនុស្ស៥នាក់បានបាត់បង់ជីវិត, ដល់២០នាក់ រងរបួស ហើយជាច្រើននាក់ផ្សេងទៀត ត្រូវបានរាយការណ៍ថា បាត់ខ្លួន ក្នុងប្រទេសនូវែលសេឡង់ បន្ទាប់ពីភ្នំភ្លើងកោះ ស (White Island ) បានផ្ទុះភ្លាមៗ នៅថ្ងៃចន្ទ ៩ ធ្នូ ។ ការផ្ទុះនេះ បានហុយផ្សែយយ៉ាងខ្លាំងលើអាកាស។
មនុស្សប្រមាណ ៥០នាក់ ដែលរួមមាន អ្នកដំណើរតាមនាវាជនជាតិនូវែលសេឡង់និងជនបរទេស ត្រូវបានគេជឿជាក់ថា នៅលើ ឬ នៅក្បែរកោះ ស នៅខណៈពេល ភ្នំភ្លើងនេះបានផ្ទុះ។ ប្រាប់អ្នកសារព័ត៌មាន នៅរដ្ឋធានី វែលីងតោន ស្នងការរងប៉ូលិស លោក John Tims លើកឡើងថា វានៅមានមនុស្សដែលនៅជាប់លើកោះ ហើយខណៈនេះ វាមានគ្រោះថ្នាក់ពេកហើយសម្រាប់ប៉ូលិស និងសេវាកម្មជួយសង្គ្រោះ ធ្វើដំណើរទៅកាន់កោះនេះ។
តាមទីភ្នាក់ងារព័ត៌មាន AFP លោក Tims អះអាងថា ប៉ូលិសកំពុងសិក្សាវាយតម្លៃអំពីពេលវេលាដែលពួកគេអាចចូលទៅដល់កោះដែលភ្នំភ្លើងកំពុងផ្ទុះនោះ។ ក៏ប៉ុន្តែលោក ដឹងពីភាពបន្ទាន់នៃការចូលត្រលប់ទោកាន់កោះមួយនេះ ដើម្បីជួយសង្គ្រោះមនុស្ស។ ប៉ូលិស និយាយទៀតថា ពួកគេ ពុំមានការទាក់ទងណាមួយជាមួយមនុស្សដែលជាប់គាំងនៅលើកោះ ស នោះឡើយ។
ភ្នំភ្លើងនេះ បានផ្ទុះនៅវេលាម៉ោង ២៖១០នាទី ពេលរសៀល (ម៉ោងក្នុងស្រុក) ដែលផ្សែងហុយឡើងលើមេឃជាង ៣,៦គីឡូម៉ែត្រ។ ក្រោយដឹងដំណឹងនេះ លោកស្រីនាយករដ្ឋមន្ត្រីនូវែលសេឡង់ Jacinda Ardern បានបញ្ជាក់ថា កោះភ្នំភ្លើងនេះបានផ្ទុះឡើង ខណៈក្រុមភ្ញៀវទេសចរកំពុងដើរកម្សាន្តនៅទីនោះ។ ប្រាប់សន្និសីទព័ត៌មានមួយ លោកស្រី Ardern លើកឡើងថា៖«យើងដឹងថា វាមានចំនួនអ្នកទេសចរនៅលើ ឬនៅក្បែរកោះនោះ នៅពេលនោះ ទាំងប្រជាជន នូវែលសេឡង់ និងភ្ញៀវទេសចរបរទេស»។
លោក ស្រី សង្កត់ធ្ងន់ថា លោកស្រី ទទួលស្គាល់ថា វាមានក្តីព្រួយបារម្ភយ៉ាងធំធេងចំពោហអ្នកដែលមានមនុស្សដែលពួកគេស្រលាញ់ នៅលើ ឬក្បែរ កោះ ស នៅពេលនេះ។ លោកស្រី ធានាថា ប៉ូលិស នឹងធ្វើរឿងគ្រប់យ៉ាងដែលពួកគេអាច ដើម្បីជួយសង្គ្រោះពួកគេ។ បន្ថែមពីនេះ លោកស្រី Ardern ក៏បានអះអាងថា លោកស្រី នឹងធ្វើដំណើរទៅកាន់តំបន់នោះ នៅពេលល្ងាច ថ្ងៃចន្ទ ដើម្បីធានាថា ប៉ូលិស និងសេវាកម្មជួយសង្គ្រោះមានធនធានគ្រប់គ្រាន់តាមតម្រូវការពួកគេ។
ដំបូងឡើយ លោកស្រីនាយករដ្ឋមន្ត្រី បាននិយាយថា វាអាចមានមនុស្សប្រហែល១០០នាក់ នៅលើ ឬនៅក្បែរកោះនោះ។ ក៏ប៉ុន្តែ លោកស្នងការរងប៉ូលិស Tims អះអាងថា ប៉ូលិស បានជឿជាក់ថា តួលេខគឺមានទាបជាង៥០នាក់ ហើយមនុស្ស២៣នាក់ ត្រូវបានដឹកមកកាន់ច្រាំងរួចរាល់ហើយ៕
Tag:
នូវែលសេឡង់
ផ្ទុះភ្នំភ្លើង
© រក្សាសិទ្ធិដោយ thmeythmey.com