ក្រោយក្រុមទាំង៣២ បញ្ចប់ការប្រកួតវគ្គជម្រុះតាមពូលពី A ដល់ H ចំនួន៦ប្រកួតរៀងៗខ្លួនរួចមក គេអាចរកឃើញក្រុមចំនួន១៦ទទួលបានកៅអីទៅកាន់វគ្គ១/៨ផ្តាច់ព្រ័ត្រ ក្នុងយុទ្ធនាការដណ្តើមពានរង្វាន់ UEFA Champions Leageu រដូវកាល២០១៩-២០។ មិនខុសពីឆ្នាំមុនឡើយ ក្រុមមកពីក្របខណ្ឌអង់គ្លេសចំនួន៤ បានឡើងទៅធ្វើព្យុះភ្លៀងដល់វគ្គនេះសារជាថ្មី។
ម្ចាស់ការពារតំណែងជើងឯក Liverpool, Manchester City, Chelsea (ឡើងមកជំនួស Man Utd ដែលឈានដល់វគ្គនេះរដូវកាលមុន) និងក្រុមរងជើងឯក Tottenham Hotspur ជាក្រុមពី Premier League ដែលអាចបន្តឈានដល់វគ្គ១៦ក្រុមចុងក្រោយ ដូចដែលពួកគេធ្វើបាននារដូវកាលមុន ២០១៨-១៩។
ហង្សក្រហម ឈរនៅកំពូលតារាងពូល E ដោយរកបានពិន្ទុសរុប១៣ពិន្ទុ មេឃខៀវឈរលេខ១ពូល C មាន១៤ពិន្ទុ ឯ តោខៀវ ឈរចំណាត់ថ្នាក់ទី២ពូល H មាន១១ពិន្ទុ ហើយមាន់ខ្នាយមាសឈរលេខ២ពូល B ដោយរកបាន១០ពិន្ទុ។
ក្រៅពីក្រុមនៅអង់គ្លេស ក្រុមពីលីគកីឡាបាល់ទាត់កំពូលអេស្ប៉ាញ La Liga ក៏មានក្រុមចំនួន៤បានឡើងទៅដល់វគ្គ១៦ក្រុមដែរ។ ក្រុមទាំង៤រួមមាន Barcelona, Real Madrid, AT-Madrid និង Valencia។
ក្រុមទាំង១៦ ដែលឡើងទៅវគ្គ១៨ផ្តាច់ព្រ័ត្រមាន Liverpool, Manchester City, Chelsea, Spurs, Barcelona, Real Madrid, AT-Madrid, Valencia, Paris Saint-Germain, Napoli, Juventus, Bayern München, Borussia Dortmund, RasenBallsport Leipzig, Lyon និង Atalanta។
ដោយឡែកក្រុមដែលទទួលបានលេខ៣ក្នុងវគ្គជម្រុះតាមពូលចំនួន៨ក្រុម នៅសល់កៅអីលេងក្នុងក្របខណ្ឌទីពីរអឺរ៉ុប Europa Leage វគ្គ៣២ក្រុម។ ៨ក្រុមនោះរួមមាន Ajax, Benfica, Inter Milan, Salzburg, Club Brugge, Olympiacos, Shakhtar Donetsk និង Bayer Leverkusen៕