អន្តរជាតិ
អ្នកស្រី Hua Chunying អ្នកនាំពាក្យក្រសួងការបរទេសចិននាសន្និសីទព័ត៌មានថ្ងៃទី១១ ខែធ្នូ។ រូបភាពពីវេបសាយក្រសួងការបរទេសចិន
×![]()
ដោយ: តន ចាន់រិទ្ធារ៉ា
ទីក្រុងប៉េកាំង នៅថ្ងៃទី១១ ខែធ្នូ បានបញ្ជាក់ជំហរជំទាស់របស់ខ្លួនម្ដងទៀតទាក់ទងការចរចាត្រីភាគីដើម្បីគ្រប់គ្រងការសាយភាយអាវុធមហាប្រល័យដែលអាមេរិក និងរុស្ស៊ីចង់ឲ្យមាន។ តាមរយៈក្រសួងការបរទេសរបស់ខ្លួន ប៉េកាំងអះអាងថា ខ្លួនមានជំហរច្បាស់ខ្លួនឯងហើយលើរឿងគ្រប់គ្រងអាវុធនេះ ហើយក៏អំពាវនាវឲ្យក្រុងវ៉ាស៊ីនតោនបើកការជជែកទ្វេភាគីជាមួយក្រុងមូស្គូទៅចុះ ព្រោះជាប្រទេសមានក្បាលនុយក្លេអ៊ែរច្រើនជាងគេ។
អាមេរិក និងរុស្ស៊ីចរចាលក្ខណៈទ្វេភាគីមុន ហើយចិនទៅតាមក្រោយ។ នេះជាជំហររបស់ទីក្រុងប៉េកាំងតបនឹងការអំពាវនាវរបស់អាមេរិកដែលចង់បញ្ចូលចិនទៅក្នុងការចរចាត្រីភាគីអាមេរិក-រុស្ស៊ី-ចិនលើការគ្រប់គ្រងអាវុធនុយក្លេអ៊ែរ។
ក្នុងសន្និសីទសារព័ត៌មានរួមគ្នាថ្ងៃទី១០ ខែធ្នូ លោក ប៉ុមប៉េអូ និយាយចំពោះមុខសមភាគីរុស្ស៊ី សេហ្គេយ៍ ឡាវរ៉ូវ ថា ចិនត្រូវតែចូលមកក្នុងការជជែកពីការគ្រប់គ្រងអាវុធ ព្រោះការគំរាមកំហែងលើសន្តិសុខពិភពលោកមានហួសពីអាវុធនុយក្លេអ៊ែរ ហើយប្រព័ន្ធបាញ់អាវុធនេះក៏រីកចម្រើនទៅមុខ និងមានប្រភេទខុសគ្នា។
ឆ្លើយតបនឹងការលើកឡើងរបស់ប្រមុខការទូតអាមេរិក អ្នកនាំពាក្យក្រសួងការបរទេសចិន Hua Chunying បញ្ជាក់ថា ចិនគ្មានបំណងចូលរួមក្នុងការចរចាត្រីភាគីជាមួយអាមេរិក និងរុស្ស៊ីឡើយ។ បើតាមអ្នកស្រី Hua អាមេរិក កំពុងយកចិនជាលេសដើម្បីគេចវេសពីការទទួលខុសត្រូវរបស់ខ្លួនក្នុងការការគ្រប់គ្រងអាវុធនុយក្លេអ៊ែរ ដែលបញ្ហានេះជាកាតព្វកិច្ចមុនគេរបស់អាមេរិកដែលជាមហាអំណាចមាននុយក្លេអ៊ែរច្រើន។
«ក្នុងនាមជាប្រទេសមានអាវុធនុយក្លេអ៊ែរទំនើបជាងគេ និងធំជាងគេ អាមេរិកគួរបំពេញទំនួលខុសត្រូវរបស់ខ្លួនឲ្យពេញលេញ ឆ្លើយតបនឹងការអំពាវនាវរបស់រុស្ស៊ីដើម្បីបន្តសុពលភាពសន្ធិសញ្ញាកាត់បន្ថយអាវុធយុទ្ធសាស្ត្រថ្មី (STRAT) កាត់បន្ថយអាវុធនុយក្លេអ៊ែរថែមទៀត ដើម្បីបង្កើតលក្ខខណ្ឌសម្រាប់ប្រទេសមាននុយក្លេអ៊ែរដទៃទៀតចូលរួមក្នុងការចរចាពហុភាគី។» នេះជាការលើកឡើងរបស់អ្នកនាំពាក្យក្រសួងការបរទេសនាសន្និសីទសារព័ត៌មានថ្ងៃទី១១ ខែធ្នូ។
ទន្ទឹមនឹងការបដិសេធការចរចា អ្នកស្រី Hua ក៏ឆ្លៀតនិយាយផ្លែផ្កាឲ្យអាមេរិកដែលលើកឡើងពីផលប៉ះពាល់ដោយសារអាវុធប្រល័យលោកនេះ។ បើតាមមន្ត្រីក្រសួងការបរទេសចិនរូបនេះ បើបារម្ភពីស្ថិរភាពអន្តរជាតិមែន ទីក្រុងវ៉ាស៊ីនតោន គួរបញ្ឈប់សកម្មភាពអវិជ្ជមានដែលធ្វើឲ្យមានអតុល្យភាពស្ថិរភាព ឈប់បង្កើនការប្រឈមមុខជាមួយមហាអំណាចនានា ហើយលែងដកខ្លួនជាឯកតោភាគីពីកិច្ចព្រមព្រៀងអន្តរជាតិ។
មិនចូលរួមក្នុងការចរចាត្រីភាគីមែនពិត ទីក្រុងប៉េកាំង នឹងអនុវត្តកាតព្វកិច្ចរបស់ខ្លួនឲ្យបានខ្ជាប់ខ្ជួនលើការគ្រប់គ្រងអាវុធនេះ។ នេះជាការបញ្ជាក់របស់អ្នកស្រី Hua ដែលបន្តថា ចិនតែងតែងរក្សាការប្ដេជ្ញាចិត្តរបស់ខ្លួនស្របតាមប្រព័ន្ធគ្រប់គ្រងការសាយភាយអាវុធអន្តរជាតិ ក៏ដូចជាការពារស្ថិរភាព និងតុល្យភាពយុទ្ធសាស្ត្រពិភពលោកផងដែរ៕
Tag:
ចិន
អាមេរិក
រុស្ស៊ី
នុយក្លេអ៊ែរ
© រក្សាសិទ្ធិដោយ thmeythmey.com
