ជាតិ
មន្ត្រីសង្ឃទូទាំងប្រទេស ធ្វើមហាសន្និបាតលើកទី២៨ រូបពីគណៈសង្ឃនាយក
× មន្ត្រីសង្ឃនៅទូទាំងប្រទេស កំពុងចូលរួមប្រជុំក្នុងអនុសំវច្ឆរមហាសន្និបាតលើកទី២៨ ដែលមានរយៈពេល២ថ្ងៃ គឺចាប់ពីថ្ងៃទី១៦ ដល់ថ្ងៃទី១៧ ខែធ្នូ ឆ្នាំ២០១៩ នៅសាលសន្និសីទចតុមុខ រាជធានីភ្នំពេញ។ អនុសំវច្ឆរមហាសន្និបាត គឺសំដៅដល់កិច្ចប្រជុំរបស់ព្រះសង្ឃទូទាំងប្រទេស ដែលតែងតែត្រូវបានរៀបចំឡើងជារៀលរាល់ឆ្នាំ។
ជាព្រះរាជតំណាងរបស់ព្រះមហាក្សត្រ សម្តេច សាយ ឈុំ ប្រធានព្រឹទ្ធសភា បានធ្វើជាអធិបតីក្នុងពិធីបើកអនុសំវច្ឆរមហាសន្និបាតនេះ រួមទាំងមានការយាងនិមន្តចូលរួមរបស់សម្ដេចព្រះមហាសង្ឃរាជទាំងពីរគណៈ។ ទំព័រហ្វេសប៊ុករបស់ក្រសួងធម្មការនិងសាសនា ផ្សាយថា ថ្នាក់ដឹកនាំព្រះសង្ឃគ្រប់ជាន់ថ្នាក់ តំណាងសាសនានានៅកម្ពុជា និង មន្ត្រីរដ្ឋាភិបាល មានចំនួនសរុបប្រមាណ១ពាន់អង្គ/នាក់ ដែលចូលរួមក្នុងអនុសំវច្ឆរមហាសន្និបាត។
ក្រសួងធម្មការ បញ្ជាក់ថា អនុសំវច្ឆរមហាសន្និបាតឆ្នាំនេះ នឹងពិនិត្យមើលការអនុវត្តសង្ឃប្រកាស កាលពីឆ្នាំមុន ហើយក៏នឹងមានការពិភាក្សា និងការផ្លាស់ប្តូរយោបល់លើការងារព្រះពុទ្ធសាសនានាពេលបច្ចុប្បន្ន បន្ទាប់មកលើកទិសដៅសម្រាប់អនុវត្តនាឆ្នាំបន្ត ដើម្បីពង្រឹងការអនុវត្តរចនាសម្ព័ន្ធដឹកនាំរបស់ព្រះសង្ឃ និងរាល់លិខិតបទដ្ឋានគតិយុត្ត ធ្វើឲ្យវិស័យព្រះពុទ្ធសាសនា មានការរីកចម្រើនបន្ថែមទៀត។
សូមបញ្ជាក់ថា ក្រោយបញ្ចប់អនុសំវច្ឆរមហាសន្និបាត ព្រះសង្ឃតែងចេញនូវសេចក្តីសម្រេចរួមមួយ ដែលហៅថា «សង្ឃប្រកាស»។ សង្ឃប្រកាស គឺជាការកំណត់គោលការណ៍ និងទិសដៅ ដើម្បីឲ្យព្រះសង្ឃ ប្រតិបត្តិឲ្យបានត្រឹមត្រូវ ក្នុងព្រះពុទ្ធសាសនា។ សង្ឃប្រកាសនេះ ក៏អាចកំណត់ពី អ្វីដែលព្រះសង្ឃគួរប្រព្រឹត្ត និងអ្វីដែលមិនគួរប្រព្រឹត្តដែរ ដើម្បីធ្វើឲ្យព្រះពុទ្ធសាសនា កាន់តែមានតម្លៃ និងរីកចម្រើន៕
© រក្សាសិទ្ធិដោយ thmeythmey.com