ពីនេះ ពីនោះ
រូបត្លុក
តៀមកាហ្វេថ្មីៗ៖ កម្ពុជាទំនើប តែមិនស៊ីវិល័យ ព្រោះកម្ពុជានៅនិយាយរឿងកំប៉ិកកំប៉ុក
×![]()
ដោយ: ថ្មីៗ
ថ្ងៃនេះ ថ្ងៃអង្គារ។ អ្នកមានជំនឿខ្លះ គេហៅថ្ងៃរឹង។ សុធីរទំនងជាមានអារម្មណ៍មិនល្អ និយាយខឹងមនុស្សមួយចំនួនប្រាប់សំណាង ដែលកំពុងអង្គុយបឺត ice latte នៅទល់មុខ។
សំណាង៖ មានអារម្មណ៍ថាមនុស្សយើងមួយចំនួនដូចមិនសូវខ្វល់អីទេអ្ហា! ដូចសួនតួនិយមកាន់តែខ្លាំងហើយ។ តែពេលខ្លះ អញយល់ថា មិនមែនជាការគិតសួនតួទេ តែដូចអត់ដឹងអីតែម្តង!
សុធីរ៖ អញថា «អត់ដឹងអី»ហ្នុងត្រូវជាង។ សម័យនេះទៅហើយ យើងនៅនិយាយគ្នារឿងកំប៉ិកកំប៉ុក ហើយស្តាប់គ្នាមិនបានទៀតផង។ នៅតាមក្រុមហ៊ុនធំៗ ឬនៅតាមក្រសួង ស្ថាប័នរដ្ឋផង ដែលមានបុគ្គលិក និងមន្ត្រីដែលសុទ្ធតែជាយុវជនរៀនបានច្រើនៗ ប៉ុន្តែអ្ហែងមើលតាមជញ្ជាំងកន្លែងកុងតាក់ភ្លើងទៅ អ្ហែងឃើញគេព្រីនក្រដាសសរសេរថា «ពេលចេញពីធ្វើការត្រូវបិទភ្លើង»។ បើនៅក្នុងបន្ទប់ទឹកវិញ នៅលើជញ្ជាំងក៏មានសរសេរទូន្មានណែនាំ «ហាមបោះចោលវត្ថុរឹងក្នុងបង្គន់», «សូមប្រើប្រាស់បង្គន់ឱ្យមានអនាម័យ», នៅកន្លែងដែលមានធុងសំរាម នៅក្នុងស្ថាប័នធ្វើការក៏ដោយ គេត្រូវសរសេរក្រដាសបិទលើជញ្ជាំងក្បែរធុងសំរាមថា «ត្រូវចោលសំរាមក្នុងធុងសំរាម»។
សំណាង៖ អើ អ្ហែងនិយាយត្រូវអ្ហា! នេះនៅកន្លែងធ្វើការ មានសុទ្ធតែអ្នកបានរៀនសូត្រផងអ្ហា។ អញឆ្ងល់ដែរវ៉ី! បើនៅតាមថ្នល់វិញ កន្លែងសរសេរអក្សរហាមនោម ឆ្អេះង៉ោង, កន្លែងសរសេរអក្សរហាមចាក់សំរាម ឃើញសុទ្ធតែសំរាម, កន្លែងសរសេរហាមដើរកាត់ស្មៅ ស្មៅឡើងទក់។ បើនៅតាមចំណតឡានក្រុងសាធារណៈវិញ ឃើញសុទ្ធតែម៉ូតុឌុប និងម៉ូតូកង់បី។
សុធីរ៖ នៅអាឡានបើកបញ្ច្រាសទិស, អាឡានឈប់តាមផ្លូវកែងនិយាយទូរសព្ទ អាឡានទំនើបចុចស៊ីផ្លេស្ទើរបែកត្រចៀកឱ្យគេចៀសចេញពីមុខ … អ្ហែងចង់ឱ្យប្រទេសរីកចម្រើនជឿនលឿនទៅណាកើត បើអ្ហែងនៅវិលវល់ ប្រកែកតែរឿងប៉ិកកំប៉ុក រឿងក្មេងបៀមដៃអ៊ីចឹងៗ។ អ្ហែងរៀនចប់មហាវិទ្យាល័យមែន តែអ្ហែងនៅឱ្យគេប្រដៅរឿងបោះសំរាមក្នុងធុងសំរាម រឿងបិទកុងតាក់ភ្លើង រឿងគោរពភ្លើងសញ្ញាចរាចរណ៍ នៅឡើយហ្នឹង?
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
6 ថ្ងៃ
