ជាតិ
ពិធីចុះហត្ថលេខា
×![]()
ដោយ: ឡាយ សុភាវតី
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) និងលោក Yuichi Sugano ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA ) បានចុះហត្ថលេខារួមគ្នាស្តីពីគម្រោងកិច្ចសហប្រតិបត្តិការបច្ចេកទេសនៃគម្រោងពង្រឹងតួនាទីអង្គភាពស៊ីម៉ាក់រយៈពេល៤ឆ្នាំ និងការទទួលថវិកាជាជំនួយឥតសំណង១,៧៨លានដុល្លារអាមេរិក។ ពិធីត្រូវបានរៀបចំឡើងនៅទីបញ្ជាការស៊ីម៉ាក់ភ្នំពេញ ក្រោមវត្តមានផងដែរពីសំណាក់លោក មាស សុភា ទេសរដ្ឋមន្ត្រី ទទួលបន្ទុកការងារមីន យុទ្ធភណ្ឌមិនទាន់ផ្ទុះ និងកងវិស្វកម្មនៃកងយោធពលខេមរភូមិន្ទ លោក ខឹម សោភ័ណ្ឌ ប្រធានក្រុមប្រឹក្សាភិបាលស៊ីម៉ាក់ និងលោក Masahiro Mikami ឯកអគ្គរដ្ឋទូតជប៉ុនប្រចាំកម្ពុជា។
ក្រោមគម្រោងរយៈពេល៤ឆ្នាំ ពីខែកុម្ភៈ ឆ្នាំ២០២០ ដល់ខែកុម្ភៈ ឆ្នាំ២០២៤ ភាគីជប៉ុននឹងជួយពង្រឹងកិច្ចសហប្រតិបត្តិការបច្ចេកទេស កសាងសមត្ថភាពបច្ចេកទេសរបស់អង្គភាពស៊ីម៉ាក់ឲ្យ កាន់តែល្អប្រសើរថែមទៀត។
ទាក់ទងនឹងជំនួយឥតសំណងចំនួនជាង១លាន៧៩ម៉ឺនដុល្លារអាមេរិក ជប៉ុនបន្តគាំទ្រអង្គភាពស៊ីម៉ាក់លើគម្រោងសមាហរណកម្មបោសសម្អាតមីន និងការសង្គ្រោះជនពិការដោយសារមីន។ ជំនួយនេះផ្តល់ជូនរាជរដ្ឋាភិបាលតាមរយៈក្រសួងសេដ្ឋកិច្ចនិងហិរញ្ញវត្ថុនៃគម្រោងថវិកាបដិភាគរាជរដ្ឋាភិបាលកម្ពុជា-ជប៉ុន។
លោក ហេង រតនា អគ្គនាយក CMAC បានថ្លែងប្រាប់អ្នកសារព័ត៌មានបន្ថែមថា គម្រោងនេះ នឹងជួយដល់ការបណ្ដុះបណ្ដាល ក៏ដូចជាការជ្រើសរើសអ្នកជំនាញបន្ថែមលើកម្លាំងដែលមានស្រាប់ប្រមាណ៤៥០នាក់ ហើយនឹងបន្តប្រតិបត្តិការបោសសម្អាតមីននៅស្រុកចំនួន៥ក្នុងខេត្តបាត់ដំបង។
«កម្ពុជាមានតម្រូវការជាង៣០លានដុល្លារក្នុងមួយឆ្នាំៗ សម្រាប់អនុវត្តគម្រោងបោះសម្អាតមីននៅទូទាំងប្រទេសដើម្បីឲ្យសម្រេចតាមគោលការលុបបំបាត់គ្រប់មីនប្រឆាំងមនុស្សនៅឆ្នាំ២០២៥»។ នេះបើតាមការបញ្ជាក់របស់លោក ហេង រតនា។
លោក ហេង រតនា បានបន្ថែមថា បញ្ហានៅកម្ពុជាមាន៤ គឺបញ្ហាគ្រប់មីនប្រឆាំងមនុស្ស គ្រប់បែកចង្កោម គ្រប់មិនទាន់ផ្ទុះ និងគ្រប់បែកគីមី។ CMAC បានបោះសម្អាតមីនជាង៤លានគ្រប់ ដែលក្នុងនោះមាន គ្រប់ប្រឆាំងមនុស្សជាង១លានគ្រប់ និងគ្រាប់មិនទាន់ផ្ទុះប្រមាណ៣លានគ្រប់។
សូមបញ្ជាក់ថា ចាប់តាំងពី១៩៩៨ដល់ឆ្នាំ២០១៩នេះ ជប៉ុនបានផ្ដល់ជំនួយប្រមាណ៥០លានដុល្លារ ដែលក្នុងប្រមាណ៧០លានជាថវិកា ប្រមាណ៥០លានលើឧបករណ៍ និងផ្សេងៗទៀតជាជំនួនរបស់អង្គការដៃគូអភិវឌ្ឍន៍៕
© រក្សាសិទ្ធិដោយ thmeythmey.com
