រដ្ឋបាលខេត្តសៀមរាប រៀបចំភ្លើងលម្អក្រុង ត្រៀមស្វាគមន៍ឆ្នាំសកល

ជាតិ

រដ្ឋបាលខេត្តសៀមរាប រៀបចំភ្លើងលម្អក្រុង ត្រៀមស្វាគមន៍ឆ្នាំសកល

28, Dec 2019 , 10:59 pm

រូបភាព

ដោយ: ថ្មីៗ

សៀមរាប៖ ភ្លើងលម្អជាច្រើនកន្លែង ត្រូវបានអាជ្ញាធរខេត្តសៀមរាប ដំឡើង និងរៀបចំរួចរាល់ហើយ សម្រាប់ការទទួលស្វាគមន៍ឆ្នាំសកល ឆ្នាំថ្មី ឆ្នាំ២០២០។ នៅឆ្នាំនេះ រដ្ឋបាលខេត្តគ្រោងរៀបចំកម្មវិធីស្វាគមន៍ឆ្នាំថ្មីនៅសួនច្បារព្រះរាជដំណាក់ ដែលគ្រោងមានអ្នកចូលរួមច្រើនកុះករ។

តាមដងផ្លូវសំខាន់ៗក្នុងក្រុងសៀមរាប ពិសេសតំបន់ផាប់ស្ទ្រីត និងតាមបណ្ដោយផ្លូវជាតិលេខ៦ ត្រូវបានរៀបចំដំឡើងភ្លើងចម្រុះពណ៌ និងផ្ទាំងបដា ត្រៀមស្វាគមន៍ឆ្នាំសកល ឆ្នាំ២០២០ ដែលនឹងមកដល់នាពេលឆាប់ខាងមុខនេះ។ នៅឆ្នាំ រដ្ឋបាលខេត្តសៀមរាប នឹងរៀបចំកម្មវិធីស្វាគមន៍ឆ្នាំសកលនៅបរិវេណសួនច្បារព្រះរាជដំណាក់ ដែលគ្រោងមានកម្មវិធីកម្សាន្ត ការតាំងពិព័រណ៍ ការសម្ដែងសិល្បៈ រួមនិងការបាញ់កាំជ្រួចនៅទីនោះផង។ អភិបាលខេត្ត លោក ទៀ សីហា ក៏គ្រោងចូលរួមកម្មវិធីដ៏ពិសេសនេះដែរ។

ក្រៅពីការរៀបចំរបស់ខេត្ត ក្នុងនោះនៅតាមបណ្ដាសណ្ឋាគារ និងស្ថាប័នធំៗ ក៏មានការរៀបចំភ្លើងដ៏ស្រស់ស្អាតផងដែរ។ នាពេលរាត្រី ប្រជាពលរដ្ឋបាននាំគ្នាទៅកម្សាន្ត និងផ្តិតរូបលេងយ៉ាងសប្បាយរីករាយ។

ទាក់ទងនឹងកម្មវិធីឆ្លងឆ្នាំសកលនេះដែរ រដ្ឋបាលខេត្តសៀមរាបបានចេញសារាចរណ៍ ប្រកាសផ្អាកចរាចរណ៍បណ្ដោះអាសន្ននៅតំបន់ផ្លូវជុំវិញផាប់ស្ទ្រីត ដោយទុកសម្រាប់អ្នកថ្មើរជើង បង្ការក្រែងមានការកកស្ទះដោយរថយន្តធុនធំ៕