ស្ត្រីចិនម្នាក់ ត្រូវបានឃើញថាមានផ្ទុកវីរុសរលាកសួតប្រភេទថ្មីនៅប្រទេសថៃ

អន្តរជាតិ

ស្ត្រីចិនម្នាក់ ត្រូវបានឃើញថាមានផ្ទុកវីរុសរលាកសួតប្រភេទថ្មីនៅប្រទេសថៃ

14, Jan 2020 , 2:12 pm

រូបភាព

រូបភាព៖ CTN News

ដោយ: ធៀន ភារិន្ទ

អាជ្ញាធរថៃ បានរកឃើញករណីជំងឺរលាកសួតដែលមិនស្គាល់អត្តសញ្ញាណកំពុងផ្ទុះនៅទីក្រុង Wuhan លើស្ត្រីជនជាតិចិនម្នាក់ ដែលធ្វើដំណើរមកពីចិន។ បើតាមការអះអាងរបស់ក្រសួងសុខាភិបាលថៃនៅថ្ងៃទី១៣ ខែមករា អ្នកជំនាញពិតជារកឃើញថា ស្ត្រីរូបនេះពិតជាមានផ្ទុកវីវុសថ្មី ដែលអាចបង្កឲ្យកើតជំងឺរលាកសួតធ្ងន់ធ្ងរនេះមែន។ ករណីនេះ គឺជាលើកទីមួយហើយ ដែលត្រូវបានគេរកឃើញនៅក្នុងក្រៅប្រទេសចិន។

ចាប់តាំងពីវីរុសរលាកសួតប្រភេទថ្មី ផ្ទុះឡើងនៅក្នុងប្រទេសចិន អាជ្ញាធរថៃចាប់ផ្តើមរឹតបន្តឹង និងត្រួតពិនិត្យភ្ញៀវទេសចរចិនយ៉ាងតឹងរឹង ដើម្បីប្រាកដថាភ្ញៀវទាំងនោះ គ្មានផ្ទុកវីរុសប្រភេទថ្មីនេះ មុននឹងជាន់ទឹកដីថៃ។ ប៉ុន្តែថៃអាចនឹងបន្ថែមកម្លាំង ដើម្បីពិនិត្យករណីសង្ស័យនេះបន្ថែមទៀត ដើម្បីប្រាកដថាគ្មានភ្ញៀវទេសចរចិនផ្ទុកជំងឺនេះទេ ស្របពេលឱកាសចូលឆ្នាំចិនជិតចូលមកដល់។

តាមសេចក្តីប្រកាសរបស់ក្រសួងសុខាភិបាលថៃនៅថ្ងៃទី១៣ ខែមករា មកទល់ពេលនេះ អ្នកដំណើរចំនួន ១២នាក់ ត្រូវបានឃាត់ខ្លួន ដើម្បីធ្វើរោគវិនិច្ឆ័យវីរុសសួតប្រភេទថ្មី។ ក្រោមចំណាត់ការនេះ ត្រូវបានគេរកឃើញថា ស្ត្រីចិនវ័យ៦១ឆ្នាំ ត្រូវបានរកឃើញថា មានផ្ទុកវីរុសប្រភេទថ្មីនេះកាលពីថ្ងៃទី៨ ខែមករា ប៉ុន្តែស្ត្រីរូបនេះ បានទទួលការព្យាបាលនៅក្នុងវិទ្យាស្ថានជំងឺឆ្លងខេត្ត Nonthaburi និងអាចវិលត្រលប់ទៅចិនវិញបានក្នុងរយៈពេល២ ឬ៣ថ្ងៃទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

បន្ថែមពីនេះមនុស្ស ១៦នាក់ផ្សេងទៀត ដែលបានអង្គុយជិតស្ត្រីវ័យ៦១ឆ្នាំរូបនេះ នៅលើយន្តហោះ ក៏ត្រូវបានគេពិនិត្យរួចហើយ ថាគ្មានផ្ទុកជំងឺអ្វីទេ។

ចំណែកអង្គការសុខភាពពិភពលោក ក៏បានអះអាងដែរថា ស្ត្រីចិន ដែលត្រូវបានថៃឃាត់ខ្លួននេះ គឺមានផ្ទុកវីរុសប្រភេទថ្មី ដែលអាចបង្កឲ្យមានការរលាកសួតធ្ងន់ធ្ងរមែន ប៉ុន្តែស្ត្រីរូបនេះ ត្រូវបានថៃព្យាបាលតាំងពីថ្ងៃទី៨ ខែមករាមកម្លេះ។ ដោយសារព្រួយបារម្ភពីបញ្ហាវីរុសថ្មីនេះ អង្គការសុខភាពពិភពលោក អាចនឹងបើកកិច្ចប្រជុំមួយក្នុងពេលឆាប់ៗខាងមុខនេះ។

មកទល់ពេលនេះ គេមិនទាន់កំណត់អត្តសញ្ញាណវីរុសនេះបាននៅឡើយទេ ហើយតើវាអាចឆ្លងពីមនុស្សទៅមនុស្សឬក៏អត់។ បើតាមការសន្មត់របស់អាជ្ញាធរចិន វីរុស ដែលពាក់ព័ន្ធនឹងជំងឺរលាកសួតប្រភេទថ្មី គឺមានបញ្ហាទាក់ទងទៅនឹងផ្សារលក់គ្រឿងសមុទ្រមួយកន្លែងក្នុងក្រុង Wuhan ខេត្ត Hubei ។ ផ្សារលក់គ្រឿងសមុទ្របោះដុំ Huanan នេះហើយ ដែលមានអ្នកជំងឺផ្ទុកវីរុសប្រភេទថ្មីនេះ ធ្វើការ និងទិញគ្រឿងសមុទ្រជាច្រើន។

សូមបញ្ជាក់ថា អ្នកស្លាប់ដោយសារជំងឺរលាកសួត គឺមានតែម្នាក់ប៉ុណ្ណោះនៅក្នុងប្រទេសចិន ខណៈពេលមនុស្សចំនួន ៤១នាក់ កំពុងត្រូវបានគេពិនិត្យតាមដានយ៉ាងម៉ត់ចត់ ហើយមនុស្ស៧នាក់ផ្សេងទៀត កំពុងស្ថិតក្នុងស្ថានភាពធ្ងន់ធ្ងរ៕