សុខភាព
អន្តរជាតិ
កូរ៉ូណាវីរុស៖ ចិនប្រើពេល១០ថ្ងៃដើម្បីសង់មន្ទីរពេទ្យព្យាបាលអ្នកជំងឺ សកម្មភាពសាងសង់មន្ទីរពេទ្យនៅក្នុងក្រុងវូហានដែលថតពីលើអាកាស។ រូបថត CNN
× ស្ថិតនៅក្រុងវូហាន ដែលកន្លែងផ្តើមរាលដាលជំងឺរលាកសួត កូរ៉ូណាវីរុស មន្ទីរពេទ្យមួយស្ថិតក្នុងដំណើរការសាងសង់រយៈពេល១០ថ្ងៃ ដើម្បីពិនិត្យ និងព្យាបាលអ្នកជំងឺ ក៏ដូចជាមនុស្សដែលសង្ស័យដ៏មានជំងឺដ៏កក្រើកពិភពលោកមួយនេះ។
តាមការផ្សាយរបស់ទីភ្នាក់ងារព័ត៌មានស៊ីនហួរ មន្ទីរពេទ្យដែលមានឈ្មោះថា Huoshenshan Hospital បានដំណើរការសាងសង់ចាប់ពីថ្ងៃទី២៤ ខែមករា ហើយគ្រោងចាប់ផ្តើមប្រតិបត្តិការពីថ្ងៃទី៣ ខែកុម្ភៈ ឆ្នាំ២០២០។
មន្ទីរពេទ្យមានគ្រែសម្រាកព្យាបាលចំនួន១០០០គ្រែនេះ យកគំរូបតាមមន្ទីរពេទ្យ Xiaotangshan Hospital នៅជាយក្រុងប៉េកាំង ដែលត្រូវបានសាងសង់ឡើងរយៈពេលតែ១សប្តាហ៍ដើម្បីព្យាបាលករណីជំងឺ SARS កាលពីអំឡុងឆ្នាំ២០០៣។
មកដល់ពេលនេះ អ្នកមានជំងឺរលាកសួតប្រភេទថ្មី កើនជិត១៤០០នាក់ហើយដោយភាគច្រើននៅក្រុងវូហាន ប្រទេសចិន ចំណែកអ្នកស្លាប់មាន៤១នាក់ ដែលស្ថិតនៅក្នុងប្រទេសចិនទាំងអស់។ អូស្ត្រាលី ឡើងដល់៤ករណី បន្ទាប់ពីហុងកុង និងថៃ ដែលមានករណី៥រៀងៗខ្លួន។
អាមេរិកមាន២ករណី ខណៈបារាំងជាប្រទេសទីមួយនៅអឺរ៉ុប ដែលមានករណីឆ្លងជំងឺនេះ ។ ក្រៅពីនេះ មានម៉ាឡេស៊ី សិង្ហបុរី តៃវ៉ាន់ ម៉ាកាវ ជប៉ុន កូរ៉េខាងត្បូង វៀតណាម និង ណេប៉ាល់៕
© រក្សាសិទ្ធិដោយ thmeythmey.com