អង្គការសុខភាពពិភពលោក (WHO) នៅថ្ងៃទី២៧ ខែមករា បានចេញមុខទទួលស្គាល់កំហុសរបស់ខ្លួន ជុំវិញបញ្ហាវាយតម្លៃខុសលើកូរ៉ូណាវីរុសនៅចិន ថាមិនប៉ះពាល់ក្នុងកម្រិតខ្ពស់ មកលើសកលលោក។ជាមួយគ្នានេះ អង្គការអន្តរជាតិមួយនេះ ក៏បានបើការស៊ើបអង្កេតលើ លទ្ធភាព ដែលវីរុសប្រភេទថ្មីនេះ អាចឆ្លងមុនពេលចេញរោគសញ្ញាផងដែរ។
គិតមកដល់ពេលនេះ ត្រឹមព្រឹកថ្ងៃទី២៨ ខែមករា មនុស្សដែលស្លាប់ដោយសារជំងឺរលាកសួត ដែលបណ្តាលមកពីកូរ៉ូណាវីរុស បានកើនឡើងរហូតដល់ ១០៦នាក់ហើយនៅក្នុងប្រទេសចិន ហើយអ្នកជំងឺផ្ទុកវីរុសប្រភេទនេះ បានកើនដល់ជាង ៤០០០នាក់ នៅចិន និងបណ្តាប្រទេសមួយចំនួន។
ពាក់ព័ន្ធនឹងបញ្ហានេះ អង្គការសុខភាពពិភពលោក បានប្រកាសទទួលស្គាល់ពីកំហុសរបស់ខ្លួន ក្នុងការវាយតម្លៃខុសលើកូរ៉ូណាវីរុស។ បើតាមការពន្យល់របស់អង្គការអន្តរជាតិមួយនេះ កូរ៉ូណាវីរុស កំពុងគំរាមកំហែងសកលលោកក្នុងកម្រិតខ្ពស់ ដែលផ្ទុយពីការវាយតម្លៃនៅសប្តាហ៍មុន ដែលមានគ្រោះថ្នាក់ត្រឹមតែមធ្យមប៉ុណ្ណោះ។ ពោលគឺវាមានលក្ខណៈធ្ងន់ធ្ងរតែនៅក្នុងប្រទេសចិនប៉ុណ្ណោះ ហើយមិនសូវប៉ះពាល់ដល់ពិភពលោកទេ។
ប៉ុន្តែពេលនេះ វីរុសថ្មី បានទៅដល់ប្រទេស និងតំបន់ជាច្រើនដូចជាអាមេរិក កាណាដា អង់គ្លេស សិង្ហបុរី កម្ពុជា ថៃ វៀតណាម នេប៉ាល់ បារាំង កូរ៉េខាងត្បូង ជប៉ុន ហុងកុង ម៉ាកាវ អូស្ត្រាលី ម៉ាឡេស៊ី និងតៃវ៉ាន់ជាដើម។
បើតាមប្រធានអង្គការសុខភាពពិភពលោក Tedros Adhanom Ghebreyesus ការវាយតម្លៃពីបញ្ហាគ្រោះថ្នាក់នៅក្នុងប្រទេសចិន គឺមានកម្រិតខ្ពស់ ស្របពេលកូរ៉ូណាវីរុស កំពុងគំរាមដល់ប្រទេសក្នុងតំបន់ និងសកលលោក ក្នុងកម្រិតមួយខ្ពស់ផងដែរ។ ជាមួយគ្នានេះ លោក Tedros បានទទួលស្គាល់ថា កំហុសនោះកើតចេញពីការខុសពាក្យនៅក្នុងរបាយការណ៍ ។
ជាមួយគ្នានេះដែរ អង្គការសុខភាពពិភពលោក ក៏កំពុងស៊ើបអង្កេតជុំវិញ ករណីឆ្លងនៃវីរុសប្រភេទថ្មីនេះ ថាតើវាអាចឆ្លងមុនពេលចេញរោគសញ្ញា ដូចការអះអាងរបស់ក្រុមអ្នកជំនាញសុខាភិបាលចិនឬក៏អត់។ កន្លងមកចិន ធ្លាប់អះអាងថា វីរុសថ្មីនេះ អាចឆ្លងទៅមនុស្សទៅមនុស្សមុនពេលចេញរោគសញ្ញា ប៉ុន្តែខាងអង្គការសុខភាពពិភពលោក មិនទាន់អាចបញ្ជាក់បានទេជុំវិញបញ្ហានេះ។
«ដឹងពីពេលវេលា ដែលអ្នកជំងឺរលាកសួត អាចចម្លងកូរ៉ូណាវីរុសទៅមនុស្សធម្មតា គឺសំខាន់បំផុត ដើម្បីគ្រប់គ្រងករណីឆ្លង»។ នេះជាការអះអាងរបស់អង្គការសុខភាពពិភពលោក។ ដើម្បីដឹងពីបញ្ហា និងពេលវេលានៃការចម្លងវីរុស អង្គការអន្តរជាតិមួយនេះ ត្រូវការព័ត៌មានជាច្រើនទៀត ទាក់ទងនឹងការឆ្លងវីរុសថ្មីនេះ ថាតើវាឆ្លងមុនពេលចេញរោគសញ្ញា ឬក្រោយចេញរោគសញ្ញា។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។
សូមបញ្ជាក់ថា កូរ៉ូណាវីរុស ត្រូវបានអាជ្ញាធរសុខាភិបាលចិន និងអ្នកជំនាញសុខភាពអន្តរជាតិ ជឿថា កើតចេញពីសត្វព្រៃ ដែលត្រូវបានគេលក់នៅក្នុងផ្សារលក់គ្រឿងសមុទ្រមួយកន្លែងនៅក្នុងក្រុងវូហានប្រទេសចិន ប៉ុន្តែគេមិនទាន់ច្បាស់ថា សត្វប្រភេទណាមួយអាចបង្កឲ្យកើតវីរុសថ្មីនេះទេ៕