កីឡាជាតិ
ជាតិ
លោក តឹក ប៊ុនវី ជាប់ជាប្រធានសហព័ន្ធកីឡាកាយវប្បកម្ម ដែលរ៉ាំរៃដោយទំនាស់ផ្ទៃក្នុង
លោក តឹក ប៊ុនវី (អាវស)ទទួលត្រាប្រធានសហព័ន្ធកីឡាកាយវប្បកម្ម និងលំហាត់ប្រាណពីលោក បឹង គឹមតោ, រូបភាពពីអគ្គនាយដ្ឋានកីឡា
×![]()
លោក តឹក ប៊ុនវី ត្រូវបានបោះឆ្នោតគាំទ្រឲ្យធ្វើជាប្រធានសហព័ន្ធកីឡាកាយវប្បកម្ម និងលំហាត់ប្រាណជំនួសលោក ស៊ីម សុកមង្គលរស្មី សម្រាប់អាណត្តិថ្មីឆ្នាំ២០២០-២០២៤។ ការបោះឆ្នោតនេះ ធ្វើឡើងក្នុងអង្គមហាសន្និបាតបូកសរុបការងារអាណត្តិទី២និងដាក់ទិសដៅអនុវត្តសម្រាប់អាណត្តិទី៣ កាលពីថ្ងៃទី១ កុម្ភៈ ឆ្នាំ២០២០។ 
ទីបំផុតបញ្ហាទំនាស់ផ្ទៃក្នុងសហព័ន្ធកីឡាកាយវប្បកម្ម និងលំហាត់ប្រាណ ដែលបានអូសបន្លាយអស់រយៈពេលជាច្រើនខែ ត្រូវបានបញ្ចប់ បន្ទាប់ពីសហព័ន្ធបានបោះឆ្នោតជ្រើសរើសថ្នាក់ដឹកនាំ និងសមាជិកប្រតិបត្តិថ្មី។ លោក តឹក ប៊ុនវី អតីតអគ្គលេខាធិការ ត្រូវបានសមាជិកសមាជិការបោះឆ្នោតគាំទ្រឲ្យធ្វើជាប្រធានសហព័ន្ធ សម្រាប់អាណត្តិឆ្នាំ២០២០-២០២៤។
នៅក្នុងការបោះឆ្នោត ដែលធ្វើឡើងក្នុងមហាសន្និបាតបូកសរុបការងារក្នុងអាណត្តិទី២ និងលើកទិសដៅអនុវត្តសម្រាប់អាណត្តិទី៣ លោក តឹក ប៊ុនវី ទទួលបានសម្លេងគាំទ្រចំនួន១៦សម្លេង ចំណែកអតីតប្រធានសហព័ន្ធចាស់ គឺលោក ស៊ីម សុកមង្គលរស្មី ទទួលបានការគាំទ្រតែ៣សម្លេងប៉ុណ្ណោះ។ ការបោះឆ្នោតនេះ មានសមាជិកសមាជិកាមកពីតំណាងក្លិប-សមាគម និងសមាជិកប្រតិបត្តិសហព័ន្ធជាង២០រូបចូលរួម។
ទោះបីយ៉ាងនេះក្តី គេ ក៏មិនប្រាកដថា ការផ្លាស់ប្តូរសមាសភាពដឹកនាំថ្មីនេះ អាចធ្វើឲ្យសហព័ន្ធមានដំណើរការល្អ១០០ភាគរយនោះទេ ព្រោះសហព័ន្ធមួយអាចដំណើរបល្អទៅបាន វាអាស្រ័យលើការឯកភាពផ្ទៃក្នុង ចេះអធ្យាស្រ័យគ្នា និងភាពឈ្លាសវៃក្នុងការដឹកនាំ។ តែយ៉ាងណា លោក តឹក ប៊ុនវី ដែលទើបជាប់ឆ្នោតជាប្រធានសហព័ន្ធប្តេជ្ញាថា លោក នឹងខិតខំប្រឹងប្រែងស្វែងរកយុទ្ធសាស្ត្រ ដើម្បីដឹកនាំសហព័ន្ធឲ្យកាន់តែមានភាពរីកចម្រើន និងល្បីល្បាញទាំងលើថ្នាក់ជាតិនិងអន្តរជាតិ។
លោក បឹង គឹមតោ ប្រធានស្តីទីនាយកដ្ឋានអប់រំកាយនិងកីឡាអះអាងថា ការបោះឆ្នោតជ្រើសរើសសមាជិកប្រតិបត្តិថ្មីរបស់សហព័ន្ធកីឡាកាយវប្បកម្មនិងលំហាត់ប្រាណបានប្រព្រឹត្តទៅដោយរលូន និងស្របតាមលក្ខ័ន្តិកៈច្បាប់ស្តីពីការបោះឆ្នោតរបស់ក្រសួងអប់រំ យុវជននិងកីឡា។ ទន្ទឹមនឹងនេះ លោក ជំរុញឲ្យសមាជិកសមាជិកប្រតិបត្តិថ្មីទាំងអស់ ត្រូវចេះរួបរួមសាមគ្គីគ្នាក្នុងការដឹកនាំសហព័ន្ធឲ្យកាន់តែមានការអភិវឌ្ឍបន្ថែមទៀត។
សមាជិកប្រតិបត្តិអាណត្តិទី៣រួមមាន លោក តិត ប៊ុនវី (ជាប្រធាន), លោក ចាប់ វ៉ាន់នី (អនុប្រធាន), លោក សុខ វណ្ណៈ (អគ្គលេខាធិការ), លោក ណុំ សុបិន្ត (អគ្គលេខាធិការរង), លោក ហេង សារ៉ាត់ (អគ្គហិរញ្ញឹក), លោក ធិ ប៊ុនធី (អគ្គហិរញ្ញឹករង),លោក សំបូរ ណាន, លោក អ៊ុន បូរ៉ាត់, លោក ហ៊ុន សុភី និងលោក ឈុន ឌីរតនា ជាសមាជិក៕
Tag:
កាយវប្បកម្ម
តឹក ប៊ុនវី
ស៊ីម មង្គលរស្មី
© រក្សាសិទ្ធិដោយ thmeythmey.com
