ស្ត្រីកាន់តែច្រើននៅលើពិភពលោក បាននាំគ្នាឈោងចាប់យកការសិក្សា និងពង្រឹងអាជីពការងារ មុនពេលគិតដល់ជីវិតអាពាហ៍ពិពាហ៍។ នេះបើតាមការសិក្សាផ្សេងៗគ្នាពីសំណាក់សាស្ត្រាចារ្យនរវិទ្យាដ៏ល្បីល្បាញលើពិភពលោក។ កត្តានេះ បានបង្ហាញឲ្យឃើញថា ស្ត្រីដែលឈានចូលដល់វ័យជាង៣០ឆ្នាំហើយ ហើយមិនទាន់រៀបការនោះ វាមិនមែនជាករណីដាច់ដោយឡែកឡើយ។
អ្នកស្រាវជ្រាវឈ្មោះ Nancy Smith-Hefner បានសាកសួរសិស្សនៅមហាវិទ្យាល័យក្នុងក្រុង Togyakarta ប្រទេសឥណ្ឌូណេស៊ីទាក់ទងនឹងគម្រោងអាពាហ៍ពិពាហ៍។ ស្ត្រីត្រឹម២ភាគរយប៉ុណ្ណោះ ដែលមានអាយុ៤០ឆ្នាំជាងអះអាងថា នឹងមិនរៀបការ រីឯស្ត្រីវ័យក្មេង បញ្ជាក់ថា ពួកគេចង់បញ្ចប់ការសិក្សា និងមានការងារធ្វើត្រឹមត្រូវ មុនពេលគិតគូរអនាគតគ្រួសារ។
តាមការស្រាវជ្រាវរបស់អ្នកស្រី Smith-Hefner ករណីបែបនេះ មិនមែនស្ថិតតែក្នុងចំណោមយុវនារីនៅក្រុង Yogyakarta នោះឡើយ ប៉ុន្តែជាករណីសកល ដែលបានពីការសិក្សានៅក្រុង Brooklyn, ប៉ារីស ក៏ដូចជានៅប្រទេសរវ៉ាន់ដា និងជប៉ុនផងដែរ។ អ្នកស្រីបានហៅថា «Waithood»។
អ្នកស្រី Smith-Hefner ដែលជាសាស្ត្រាចារ្យជំនាញនរវិទ្យានៅសាកលវិទ្យាល័យបូស្តុននោះ បានសិក្សាពីសង្គមយុវជនអាស៊ីអស់រយៈពេលជាច្រើនឆ្នាំ។ អ្នកស្រីបានរកឃើញកាន់តែច្បាស់ថា យុវជនឥណ្ឌូណេស៊ី ក៏ដូចជាយុវជនអាមេរិក មានបញ្ញាដ៏ធំមួយដូចគ្នា គឺការរកដៃគូដ៏ត្រឹមត្រូវម្នាក់។
អ្នកស្រី Marcia Inhorn សាស្ត្រាចារ្យនរវិទ្យា និងកិច្ចការអន្តរជាតិនៅ Yale University ក៏បានអះអាងស្រដៀងគ្នាផងដែរ ដោយករណីទាំងនេះ មកពីយុវតីមានសិទ្ធិសម្រេចដោយខ្លួន ដោយសារពួកគេចាកចេញពីផ្ទះឪពុកម្តាយ និងមានភាពម្ចាស់ការលើខ្លួនឯង។
តាមការផ្សាយរបស់ Quartz និន្នាការសាកលនាពេលបច្ចុប្បន្ននេះ គឺមានករណីពន្យាឯកសារក្នុងការរៀបចំអាពា ហ៍ពិពាហ៍ ជាពិសេសក្នុងចំណោមស្ត្រីដែលទទួលបានការអប់រំខ្ពស់ មិនថានៅហ្ស៊កដានី ចិន អាមេរិក រវ៉ាន់ដា ឬហ្គាតេម៉ាឡានោះឡើយ។
ការសិក្សាតាំងពីឆ្នាំ២០០៨ របស់សាស្ត្រាចារ្យ Diane Singerman នៃ American University ក៏បង្ហាញលទ្ធផលដូចគ្នាផងដែរ។ នៅអេហ្ស៊ីប យុវជនពន្យាពេលរៀបការដោយសារតែការចំណាយច្រើនពេក រីឯការមានកូនក្រៅចំណងអាពាហ៍ពិពាហ៍ ក៏មិនត្រូវបានសង្គមទទួលស្គាល់នោះដែរ។
អ្នកកាសែតអាមេរិកឈ្មោះ Jon Birger ដែលជាម្ចាស់សៀវភៅ «Date-onomics» បានបង្ហាញថា សហរដ្ឋអាមេរិកទាំងមូល មានស្ត្រី៧.៤លាននាក់ចន្លោះពី៣០ ទៅ៣៩ឆ្នាំ សិក្សានៅកម្រិតមហាវិទ្យាល័យ ខណៈបុរសមានត្រឹម៦លានប៉ុណ្ណោះ។ កត្តានេះ បង្ហាញឲ្យឃើញថា ស្ត្រីដែលនៅលីវរហូតដល់អាយុជាង៣០ឆ្នាំ មិនមែនជាករណីដាច់ដោយឡែកនោះឡើយ តែជានិន្នាការពិភពលោក៕