រថយន្ត
អន្តរជាតិ
រថយន្តផលិតថ្មីនៅឥណ្ឌា ត្រូវបានតម្រូវឲ្យបំពាក់បច្ចេកវិទ្យាសម្រាប់សុវត្ថិភាពថ្មើរជើង
×![]()
ដោយ: ធីតា
ឥណ្ឌាតម្រូវឲ្យក្រុមហ៊ុនរថយន្តទាំងអស់ចាប់ផ្តើមអភិវឌ្ឍន៍សូហ្វែរថ្មីដើម្បីពង្រឹងសុវត្ថិភាពថ្មើរជើង (Pedestrian Safety) ចាប់ពីខែតុលា ឆ្នាំ២០២០នេះ តទៅ។ យោងតាមការផ្សាយរបស់ ETAuto.com នេះមិនមែនត្រឹមតែជាគោលករណ៍ពង្រឹងសុវត្ថិសម្រាប់អ្នកដំណើរតែប៉ុណ្ណោះទេ ប៉ុន្តែឥណ្ឌាតាំងចិត្តអនុវត្តបទដ្ឋានជាសកលស្តីពីសុវត្ថិភាពយានយន្ត។
កាលពីខែតុលា ឆ្នាំ២០១៨ រដ្ឋាភិបាលឥណ្ឌា បានចេញបទបញ្ជាទៅដល់ក្រុមហ៊ុនរថយន្តទាំងអស់ឲ្យបំពាក់សូហ្វែដែលអាចជួយកាត់បន្ថយគ្រោះថ្នាក់អ្នកថ្មើរជើង ពោលគឺសម្រាប់រថយន្តដែលផលិតថ្មី ទាំងប្រទេសអ្នកដំណើរ និង SUV។
របាយការណ៍របស់ក្រសួងដឹកជញ្ជូនតាមផ្លូវថ្នល់ និងហាយវេ (MoRTH) របស់ឥណ្ឌា បានឲ្យដឹងថា ក្នុងចំណោមមនុស្ស១៥០ ០០០នាក់ ដែលស្លាប់ដោយគ្រោះថ្នាក់ចរាចរណ៍ មាន៦០ភាគរយគឺជាថ្មើរជើង។ ដូច្នេះឥណ្ឌា សម្រេចអនុវត្តតាមគោលការណ៍ប្រទេសជាច្រើនលើពិភពលោកដែលផ្តល់តម្លៃ និងការគោរពចំពោះថ្មើរជើង។
ការផលិតរថយន្តនៅឥណ្ឌា ត្រូវបានណែនាំឲ្យមានឧបករណ៍ចាប់សញ្ញាភ្លាមៗនៅផ្នែកខាងមុខនៃរថយន្ត នៅពេលដែលមានការប៉ះទង្គិចជាមួយថ្មើរជើង ជាពិសេសការកម្រិតល្បឿនដោយស្វ័យប្រវត្តិ រួមទាំងលក្ខណៈបច្ចេកនានាដែលបំពាក់លើពោងសុវត្ថិភាព។
ប្រៀបធៀបជាមួយសហរដ្ឋអាមេរិក និងចក្រភពអង់គ្លេស ស្តង់ដារសុវត្ថិភាពយានយន្តនៅឥណ្ឌា ហាក់មានកម្រិតនៅឡើយ ប៉ុន្តែរដ្ឋាភិបាលចាប់ផ្តើមដាក់ចេញបទប្បញ្ញត្តិថ្មី ដើម្បីការធ្វើឲ្យប្រសើរឡើងនូវច្បាប់ដែលមានស្រាប់ ឈានឆ្ពោះដល់ការកត់បន្ថយគ្រោះថ្នាក់ចរាចរណ៍ ពោលគឺទៅលើថ្មើរជើង។
រថយន្តទំនើបៗ ត្រូវបានរដ្ឋាភិបាលឥណ្ឌាលើកទឹកចិត្តឲ្យនាំមុខគេលើការបំពាក់មុខងារសុវត្ថិភាពថ្មីៗ និងជឿនលឿន។ ស្របពេលជាមួយគ្នានេះ អ្នកប្រើប្រាស់ក៏មានផ្នត់គំនិតកាន់ខ្ពស់ទាក់ទងសុវត្ថិភាពក្នុងរថយន្ត ដែលកន្លងមក ពួកគេផ្តោតជាមូលដ្ឋានតែលើតម្លៃប្រេងឥន្ធនៈ តម្លៃរថយន្ត ក៏ដូចជាម៉ាករថយន្ត។
ភ្នាក់ងាពាក់ព័ន្ធយានយន្តនៅឥណ្ឌា បានអះអាងថា បទដ្ឋាននានាទាក់ទងនៃសុវត្ថិភាពយានយន្ត ទំនងអាចលេចរូបរាងឡើងនៅឆ្នាំ២០២២ឯណោះ។ ប៉ុន្តែអ្វីដែលជាបញ្ហាចោទនោះ ការបំពាក់មុខងារផ្សេងៗក្នុងរថយន្ត ក៏នាំឲ្យតម្លៃរថយន្តកាន់តែឡើងថ្លៃផងដែរ៕
© រក្សាសិទ្ធិដោយ thmeythmey.com
