ជាតិ
សម្រាប់អ្នកដំណើរលើ Westerdam បើសាម៉ីប្រទេសមិនទទួល កម្ពុជានឹងបន្តមើលថែពួកគេ មន្ត្រីម្នាក់ឈរគ្រវីទង់ជាតិខ្មែរនៅមុខនាវា Westerdam ដែលចតនៅផែព្រះសីហនុ។ រូបថត AFP
× «ចំពោះនាវាទេសចរណ៍ [Westerdam] ដែលមានអ្នកធ្វើដំណើរជាង ២០០០នាក់ ដែលបានមកដល់ទីសុវត្ថិភាពក្នុងទឹកដីកម្ពុជាហើយ បើសាម៉ីប្រទេសគេមិនទទួលទេ គឺកម្ពុជានឹងបន្តមើលថែពួកគេ»។ នេះបើតាមសំណេរនៅលើទំព័រហ្វេសប៊ុកផ្លូវការរបស់សម្តេចនាយករដ្ឋមន្ត្រី ហ៊ុន សែន នាល្ងាចថ្ងៃចន្ទ ទី១៧ ខែកុម្ភៈ។
នាពិធីបូកសរុបការងាររបស់ «ក្រុមប្រឹក្សាជាតិកម្ពុជាដើម្បីស្ត្រី» នៅវិមានសន្តិភាព សម្តេចនាយករដ្ឋមន្ត្រី ហ៊ុន សែន បានលើកឡើងពីករណីជំងឺរលាកសួតបង្កដោយមេរោគកូរ៉ូណាប្រភេទថ្មី (COVID-19) ដោយសម្តេចបានមើលឃើញ បណ្តាប្រទេសក្នុងតំបន់ និងពិភពលោក មានការភ័យតក់ស្លុតរហូតបាត់អស់នូវគុណធម៌ សីលធម៌ មនុស្សធម៌ និងមិត្តភាពល្អជាមួយគ្នា។
សម្តេចបានកត់សម្គាល់ពីការរើសអើងជាតិសាសន៍ជ្រុល ដោយករណីនាវាទេសចរណ៍ MS Westerdam ដែលមានអ្នកធ្វើដំណើរចម្រុះជាតិសាសន៍ជាង២២០០ នាក់ត្រូវបានបដិសេធដោយប្រទេស និងកោះចំនួន៦ ក្នុងនោះក៏មានកោះហ្គាម ដែលជាទឹកដីកោះមួយផ្នែករបស់សហរដ្ឋអាមេរិកផងដែរ។
«ពិភពលោកអាចនឹងបែកបាក់ ហើយតម្លៃមនុស្សនៅត្រង់ណា បើសិទ្ធិរស់រានមានជីវិតគ្មានផងនោះ?»។ នេះជាការចោទសួររបស់សម្តេច ហ៊ុន សែន ដោយរំលឹកឡើងវិញពីការសម្រេចចិត្តទទួលយកនានា ក្នុងន័យមនុស្សធម៌ដោយគ្មានការរើសអើងជាតិសាសន៍ ការគោរពសិទ្ធិមនុស្សតាមរយៈការជួយផ្តល់នូវសិទ្ធិរស់រានមានជីវិតដល់មនុស្សជាតិដែលជាប់គាំងនៅក្នុងនាវាទាំងអស់។
ការសម្រេចចិត្តនេះ ទទួលបាននូវការគាំទ្រ ជាពិសេសពី អង្គការសុខភាពពិភពលោក អង្គការទេសចរណ៍ពិភពលោក អង្គការឆ្នេរស្អាតបំផុតពិភពលោក ក៏ដូចពីសំណាក់លោក Donald Trump ប្រធានាធិបតីសហរដ្ឋអាមេរិកផងដែរ។
បើហ្វេសប៊ុកប្រមុខរដ្ឋាភិបាលកម្ពុជាដដែល អ្នកទេសចរចម្រុះជាតិសាសន៍ ៥០០ នាក់ក្រោយពីបានត្រួតពិនិត្យសុខភាពថាគ្មានសញ្ញាវិជ្ជមាន COVID-19 គឺត្រូវបានផ្តល់កន្លែងស្នាក់នៅបណ្តោះអាសន្ននៅសណ្ឋាគារសុខាក្នុងរាជធានីភ្នំពេញ។
សម្តេចបានបញ្ជាក់ថា អ្នកដំណើរទាំងអស់នឹងត្រូវដាក់ឲ្យពិនិត្យសុខភាពយ៉ាងហ្មត់ចត់បំផុត មុននឹងអនុញ្ញាត្តឲ្យមកស្នាក់នៅតាមសណ្ឋាគារ។ បើទោះបីត្រូវការចតរយៈពេលវែងយ៉ាងណាក្តី ក៏កម្ពុជាផ្តល់ឱកាសអោយនាវាទេសចរណ៍នេះបន្តស្នាក់នៅកម្ពុជាដោយមិនគិតពីថ្លៃចត និងថ្លៃសេវាផ្សេងៗនៅក្នុងដែនសមុទ្រកម្ពុជានោះឡើយ។
នៅថ្ងៃចន្ទនេះ លោកអភិបាលរាជធានីភ្នំពេញ ឃួង ស្រេង ក៏បាននាំទេសចរដែលមិនទាន់ចាកចេញពីកម្ពុជាដើរកម្សាន្តក្នុងរាជធានីផងដែរ ហើយសម្តេច ហ៊ុន សែន មានបំណងរៀបចំពិធីជប់លៀងជូនភ្ញៀវទេសចរដែលជាប់ក្នុងនាវា MS Westerdam ឲ្យបានស្គាល់បេះដូងមនុស្សធម៌កម្ពុជា៕
© រក្សាសិទ្ធិដោយ thmeythmey.com