កីឡាអន្តរជាតិ
អន្តរជាតិ
UCL៖ Klopp ថាប៉ះ AT-Madrid ជាជំនួបដ៏ពិបាកសម្រាប់កីឡាករ Liverpool
× ម្ចាស់ការពារជើងឯក Liverpool ត្រូវធ្វើដំណើរទៅជួប Atletico Madrid ក្នុងការប្រកួត Champions League ជើងទី១ វគ្គ១៦ក្រុមចុងក្រោយ នៅយប់ថ្ងៃទី១៨ ខែកុម្ភៈ។ លោក Jurgen Klopp យល់ឃើញថាជំនួបទល់ក្រុមដ៏រឹងមាំនៅអេស្ប៉ាញមួយនេះជាការប្រកួតដ៏លំបាកបំផុតក្នុងជីវិតរបស់កូនក្រុមលោក។
ទឹកដី Wanda Metropolitano របស់ AT-Madrid ជាកន្លែងដែល Liverpool ប្រកួតឈ្នះ Tottenham Hotspur ដើម្បីលើកពានក្របខណ្ឌកំពូលអឺរ៉ុបជាលើកទី៦ កាលពីរដូវកាលមុន។ នៅយប់នេះ វេលាម៉ោង ៣:០០នាទីអាធ្រាត្រ [ម៉ោងនៅកម្ពុជា] លោក Klopp ត្រូវដឹកនាំកូនក្រុមទៅកាន់កីឡដ្ឋានដដែលនេះដើម្បីតតាំងជាមួយ AT-Madrid នៅវគ្គ១/៨ផ្តាច់ព្រ័ត្រ។
«ពួកគេមិនបន្ទូរដៃឲ្យយើងឡើយ។ លោក Klopp អ្នកចាត់ការទូទៅហង្សក្រហមលើកឡើងបែបនេះក្នុងសន្នីសីទព័ត៌មានមុនជំនួបរវាងក្រុមកំពុងនាំមុខនៅ Premier League ជាមួយក្រុមឈរលេខ៤នៅ La Liga។
អ្នកចាត់ការសញ្ជាតិអាល្លឺម៉ង់បន្ថែមថា៖«ពួកគេប្រៀបដូចជាម៉ាស៊ីនដែលប្រើប្រេងល្អ និងមានការរៀបចំយ៉ាងល្អិតល្អន់ដើម្បីចម្រាញ់បានជាលទ្ធផលដ៏ល្អមួយ។ ពួកគេស្ថិតក្នុងដំណាក់កាលផ្លាស់ប្តូរធម្មតា ប៉ុន្តែពួកគេនឹងប្រយុទ្ធដោយប្រើអាវុធដែលពួកគេមាន ហើយវាពិតជាលំបាកសម្រាប់យើង។ ពួកគេជាក្រុមមានគុណភាព ល្បឿន និងភាពច្បាស់លាស់។ ខ្ញុំដឹងថាយើងស្ថិតនៅក្នុងប្រទេសដែលមានស្តាយលេងបែប tiki-taka»។
ប្រសិនបើមានក្រុមមួយដែលអាចទទួលបានលទ្ធផលល្អពេលប៉ះក្រុមដូចជា Atletico នេះ នោះក្រុមនឹងមានឱកាសឡើងទៅវគ្គផ្តាច់ព្រ័ត្រញឹកញាប់មិនខាន។ Klopp អះអាងបែបនេះ។
ដោយឡែក Jan Oblak អ្នកចាំទីរបស់ AT-Madrid វិញមើលឃើញថាកូនក្រុមរបស់ Liverpool ទាំង១១រូបសុទ្ធតែជាកីឡាករដ៏គ្រោះថ្នាក់ទាំងអស់។ «មិនមែនមានតែ Sadio Mane, Mohamed Salah ឬ Roberto Firmino នោះទេ ប៉ុន្តែកីឡាករដ៏ទៃដូចជាខ្សែការពារ Trent Alexander-Arnold, Andrew Robertson ក៏ដូចជា Virgil van Dijk សុទ្ធតែមានលទ្ធភាពខ្ពស់ក្នុងការសម្រេចទីក្រុមគូប្រជែងរបស់ពួកគេបាន»។
Oblak បន្ថែមថា ពួកគេទាំងអស់នេះហើយដែលជួយ Liverpool មិនឲ្យស្គាល់ចាញ់ និងនាំមុខពិន្ទុដាច់ក្នុងក្របខណ្ឌលីគកំពូលអង់គ្លេសរដូវកាលនេះរហូតដល់២៥ពិន្ទុ។
ក្រៅពីជំនួបរវាង AT-Madrid ជាមួយ Liverpool ក៏មានការជួបគ្នាមួយគូទៀតផងដែរ រវាង Borussia Dortmund និង Paris Saint-Germain៕
Tag:
Jurgen Klop
Liverpool
UEFA Champions League
© រក្សាសិទ្ធិដោយ thmeythmey.com