សម្ដេច ហ៊ុន សែន សរសើរឧកញ៉ា ឌួង ឆាយ ដែលបានកែប្រែអត្តចរិតមកល្អវិញ

ជាតិ

នយោបាយជាតិ

សម្ដេច ហ៊ុន សែន សរសើរឧកញ៉ា ឌួង ឆាយ ដែលបានកែប្រែអត្តចរិតមកល្អវិញ

25, Feb 2020 , 2:07 pm

រូបភាព

រាប់ពីស្ដាំដៃទី២ គឺលោកឧកញ៉ា ឌួង ឆាយ ដែលឈរជិតសម្ដេចនាយករដ្ឋមន្រ្តី ហ៊ុន សែន នៅគ្រាយកថវិកាចូលរួមមូលនីធិកាកបាទក្រហមកម្ពុជាកន្លងមក (រូបពីហ្វេសប៊ុកលោក ឌួង ឆាយ)

ដោយ: ធឿន បញ្ញាឬទិ្ធ

ភ្នំពេញ៖ សម្ដេច ហ៊ុន សែន សរសើរឧកញ៉ា ឌួង ឆាយ ដែលបានកែប្រែអត្តចរិតមកល្អវិញ។ ឧកញ៉ាវ័យក្មេង ឌួង ឆាយ ដែលត្រូវបានគេស្គាល់ថា ជាកូនប្រុសរបស់លោកឧកញ៉ា ឌួង ងៀប នោះ ធ្លាប់ត្រូវបានសមត្ថកិច្ចឃាត់ខ្លួន កាលពីអំឡុងខែមេសា ឆ្នាំ២០១៥ ក្នុងករណីវាយទៅលើកូនឧកញ៉ាទ្រីភាព។

«អាឆាយពីដើមកាចណាស់ អត់មានដូចអាឆាយឥឡូវទេ អាឆាយឥឡូវស្លូត អាឆាយឥឡូវល្អ»។ នេះជាការលើកឡើងរបស់សម្ដេច ហ៊ុន សែន ដែលសរសើរលោកឧកញ៉ា ឌួង ឆាយ ចំពោះការកែប្រែអត្តចរិកពីអ្នកធ្លាប់តែប្រើហិង្សាវាយអ្នកដទៃ មកជាអ្នកដោះស្រាយបញ្ហាដោយសន្តិវិធី និងចេះធ្វើអំពើសប្បុរសធម៌នៅក្នុងសង្គម។

ថ្លែងក្នុងពិធីចែកសញ្ញាបត្រនិងវិញ្ញាបនបត្រជូនសិស្សសាលាភូមិន្ទរដ្ឋបាល នៅវិទ្យាស្ថានជាតិអប់រំ នាព្រឹកថ្ងៃទី២៥ កុម្ភៈនេះ សម្ដេច ហ៊ុន សែន បានសង្កត់ធ្ងន់ថា៖«ឥឡូវអាឆាយ កែខ្លួនល្អទៅជាសប្បុរសជនទៀត»។

សូមស្ដាប់សំឡេង៖

កាលពីខែមេសា ឆ្នាំ២០១៥ លោក ឌួង ឆាយ បានទះកំផ្លៀងយុវជនម្នាក់ ដែលគេស្គាល់ថា ជាកូនឧកញ៉ាទ្រីភាព នៅទីតាំងចាក់សាក់មួយកន្លែង ក្នុងរាជធានីភ្នំពេញ។ ក្រោយសកម្មភាពហិង្សាមួយថ្ងៃនោះ លោក ឌួង ឆាយ ក៏បានប្រគល់ខ្លួនឱ្យសមត្ថកិច្ច អនុវត្តតាមនីតិវិធីច្បាប់ និងយល់ព្រមទទួលស្គាល់កំហុសខ្លួន។ មូលហេតុដែលលោក ឌួង ឆាយ ប្រគល់ខ្លួនឱ្យសមត្ថកិច្ចតាមសម្រួលនេះ គឺធ្វើឡើងក្រោយពីមានការអន្តរាគមន៍របស់លោកនាយករដ្ឋមន្ត្រី ហ៊ុន សែន ។

សម្ដេច ហ៊ុន សែន បានបកស្រាយនៅចំពោះមុខនិស្សិតសាលាភូមិន្ទរដ្ឋបាល ដូច្នេះថា៖«កាលហ្នឹង ខ្ញុំទូរសព្ទទៅ ឌួង ងៀប (ឪពុកលោក ឌួង ឆាយ) ។ ងៀប ឯងប្រគល់អាឆាយ មកទទួលខុសត្រូវចំពោះមុខច្បាប់ បើសិនជា ងៀប ឯងមិនប្រគល់(ឌួង ឆាយ) មកទេ ខ្ញុំនឹងដកស័ក្តិ ងៀប ឯងតែម្ដង។ ឥឡូវសម្រេចចិត្តទៅ ហើយប្រគល់កូនមកឱ្យទទួលខុសត្រូវចំពោះមុខច្បាប់ លើពេលធ្វើអំពើហិង្សាទៅលើអ្នកដទៃ»។

អត្ថបទទាក់ទង

សម្ដេច ហ៊ុន សែន៖ មន្ត្រីទាំងអស់ប្រយ័ត្នគ្រោះថ្នាក់ ដោយសារប្រពន្ធ និងកូន

ការណ៍ដែលនាយករដ្ឋមន្ត្រី លើកយករឿងលោក ឌួង ឆាយ មកនិយាយនេះ គឺដើម្បីជាឧទាហរណ៍ណែនាំទៅកាន់មន្ត្រីរដ្ឋាភិបាលទាំងអស់ ឱ្យមានការប្រុងប្រយ័ត្នចំពោះការបាត់បង់តួនាទី និងមុខតំណែង ដោយសារតែបណ្ដែតបណ្ដោយឱ្យប្រពន្ធ និងកូន លូកដៃចូលការងារ និងដើរអុកឡុក គំរាមកំហែងអ្នកដទៃ។ បើតាមសម្ដេច ហ៊ុន សែន មន្ត្រីខ្លះបំពេញការងារល្អណាស់ ប៉ុន្តែបែរជារងគ្រោះដោយសារតែប្រពន្ធនិងកូនទៅវិញ។

«ប្តីល្អណាស់ធ្វើការ ក៏ប៉ុន្តែប្រពន្ធរកស៊ី(អចលនទ្រព្យ) ប្រពន្ធលូកលាន់(ការងារប្តី) ងាកមកកូនដើរគំរាមកំហែងគេ ប្រើឥទ្ធិពលឪពុក។ រឿងចំណុចនេះ គឺជាចំណុចដែលសុំផ្ដាំផ្ញើទុក ហើយប្រសិនបើមន្ត្ររបស់យើងនៅទូទាំងប្រទេសបានស្ដាប់ឮ ក៏សុំតែប្រយ័ត្ន…។ ខ្មែរយើងស្អប់បំផុតប្តីស័ក្តិ៣ ប្រពន្ធស័ក្តិ៤ កូនស័ក្តិ៥ហ្នឹងគឺស្អប់ណាស់ ប្រយ័ត្នអាចំណុចហ្នឹង។ជួនកាលប្តីអត់រកស៊ីទេ តែបើកឱកាសឱ្យប្រពន្ធរកស៊ី (ប្តី)ទៅកន្លែងណាក៏មានដីរបស់ប្រពន្ធមន្ត្រីហ្នឹង ប្តីទៅកន្លែងណាក៏មានដីប្រពន្ធមន្ត្រីហ្នឹង»។នេះជាការបញ្ជាក់របស់សម្ដេច ហ៊ុន សែន ដែលធ្លាប់ឮពលរដ្ឋរអ៊ូរទាំពីសែស្រឡាយមន្ត្រីរាជការខ្លះ ប្រើប្រាស់អំណាចហួសដែនកំណត់ ដែលនាំឱ្យប៉ះពាល់ដល់ការដឹកនាំរបស់រដ្ឋាភិបាលដែរ៕