ជាតិ
ក្រុមហ៊ុន៥ នឹងបោះទុនជាង៣០លានដុល្លារ វិនិយោគលើវិស័យកាត់ដេរ អគ្គិសនី និងកែច្នៃផ្លែឈើ
× ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា CDC បានសម្រេចឱ្យក្រុមហ៊ុនចំនួន៥ បោះទុនវិនិយោគជាង៣០លានដុល្លារ លើរោងចក្រកាត់ដេរផលិតសម្លៀកបំពាក់ ឥដ្ឋ អំពូលភ្លើង បរិក្ខាអគ្គិសនី និងកែច្នៃផ្លែឈើ។ នេះបើតាមការចេញផ្សាររបស់ CDC នៅថ្ងៃទី២៥ កុម្ភៈ ឆ្នាំ២០២០។
ក្រុមហ៊ុន “SHANXI HEXIN (CAMBODIA) METAL TECHNOLOGY CO., LTD” មានគម្រោងបង្កើតរោងចក្រផលិតឥដ្ឋដុំ និងឥដ្ឋបច្ចេកទេសធុនស្រាល ដែលមានទីតាំងវិនិយោគស្ថិតនៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ។ ក្រុមហ៊ុននេះ មានទុនវិនិយោគប្រមាណ៦.២លានដុល្លារ និងអាចបង្កើតការងារបានជាង៤០០កន្លែង។
ក្រុមហ៊ុន “ ROYAL INNOTECH KNITWEAR CO., LTD” មានគម្រោងបង្កើតរោងចក្រចាក់ និងកាត់ដេរសម្លៀកបំពាក់ ដែលមានទីតាំងវិនិយោគ នៅភូមិកំពង់ស្វាយកណ្តាល ឃុំព្រែកថ្មី ស្រុកកោះធំ ខេត្តកណ្តាល។ ក្រុមហ៊ុននេះ មានទុនវិនិយោគប្រមាណ១០លានដុល្លារ និងអាចបង្កើតការងារបានជាង១៦០០កន្លែង។
ក្រុមហ៊ុន “LITKCONN TECHNOLOGY (CAMBODIA) CO., LTD” មានគម្រោងបង្កើតរោងចក្រផ្គុំដំឡើងអំពូលភ្លើងគ្រប់ប្រភេទ ដែលមានទីតាំងវិនិយោគស្ថិតនៅ ភូមិចមពល ឃុំពពេល ស្រុកត្រាំកក់ ខេត្តតាកែវ។ ក្រុមហ៊ុននេះ មានទុនវិនិយោគប្រមាណ៣.៤លានដុល្លារ និងអាចបង្កើតការងារបានជិត៣០០កន្លែង។
ចំណែកក្រុមហ៊ុន “NINGBO BAINIAN (CAMBODIA) ELECTRIC APPLIANCE CO., LTD” មានគម្រោងបង្កើតរោងចក្រផលិតសម្ភារបរិក្ខារអគ្គិសនី ដែលមានទីតាំងវិនិយោគ នៅភូមិអង្គ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ក្រុមហ៊ុននេះ មានទុនវិនិយោគប្រមាណ ២.៥លានដុល្លារ និងអាចបង្កើតការងារបានជាង៥០០កន្លែង។
រីឯ ក្រុមហ៊ុន “SHANG DA JIAN HUI INTERNATIONAL AGRICULTURE PRODUCT AND LOGISTIC CO., LTD” មានគម្រោងបង្កើតរោងចក្រកែច្នៃផ្លែឈើគ្រប់ប្រភេទ ដូចជា ស្វាយ ស្វាយចន្ទី ម្នាស់ ចេកជាដើម ហើយមានទីតាំងវិនិយោគស្ថិតនៅភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ។ ក្រុមហ៊ុននេះ មានទុនវិនិយោគប្រមាណ៨.៨លានដុល្លារ និងអាចបង្កើតការងារបានជាង២០០កន្លែង៕
© រក្សាសិទ្ធិដោយ thmeythmey.com