ភ្នំពេញ៖ ផ្ទះ១៦ខ្នងនៅភូមិ១៧ សង្កាត់ស្រះចក ខណ្ឌដូនពេញ ត្រូវបានភ្លើងលេបត្របាក់ស្ទើរតែទាំងស្រុងកាលពីដើមសប្តាហ៍កន្លងទៅនេះ។ ពលរដ្ឋរងគ្រោះខ្លះអង្គុយមើលផ្ទះរបស់ខ្លួនឯងទាំងទឹកភ្នែករលីងរលោង ខណៈខ្លះទៀតកំពុងរុះរើគំនរផ្ទះ ដែលសល់តែធ្យូង ដើម្បីរៀបចំសាងសង់ឡើងវិញ។
ជាបន្តសូមអញ្ជើញស្តាប់បទយកការណ៍ ដែលរៀបចំដោយ លោក រ៉ឹម ភារី ដូចតទៅ៖
បន្ទាប់ពីអគ្គិភ័យឆេះផ្ទះស្ទើរតែទាំងស្រុង ពលរដ្ឋនៅភូមិ១៧ សង្កាត់ស្រះចក បាននាំគ្នារើគ្រោងឆ្អឹងផ្ទះ និងអីវ៉ាន់ទាំងទឹកភ្នែករលីងរលោង។ ពលរដ្ឋខ្លះ ឈរសម្លឹងមើលផ្ទះរបស់ខ្លួនទឹកមុខស្រងូតស្រងាត់ ខណៈពលរដ្ឋខ្លះទៀត ក៏បានដឹងជញ្ជូនគំនរឈើ និងសម្ភារដែលសុទ្ធសឹងជាធ្យូងទៅហើយនោះ ទៅបោះចោល ដើម្បីរៀបចំសាងសង់ផ្ទះឡើងវិញ។
រៀបរាប់ពីហេតុការណ៍ភ្លើងឆេះផ្ទះទាំងរន្ធត់ លោកយាយ មុត វណ្ណី បានអះអាងថា នៅពេលភ្លើងឆេះផ្ទះអ្នកជិតខាងប្រហែលម៉ោង៥ល្ងាច លោកយាយ និងសមាជិកគ្រួសារ បាននាំគ្នារើអីវ៉ាន់សំខាន់ៗចេញពីផ្ទះ និងប្រាប់កូនចៅទាំងអស់ឲ្យរត់គេចទៅកន្លែងមានសុវត្ថិភាព។ ហេតុការណ៍នេះ បានធ្វើឲ្យលោកយាយរៀបរាប់ទាំងអួលដើមកថា៖ «ពិបាកណាស់ខ្ញុំ គ្មាននរណាចង់បាត់បង់អ្វីទេ តែធ្វើម៉េច វាចៃដន្យ ឬអកុសលរបស់យើង ត្រូវតែអ៊ីចឹង មិនដឹងធ្វើម៉េច ទាំងគេទាំងយើង»។
ក្នុងជន្មានយុ៧២ឆ្នាំ លោកយាយ មុត វណ្ណី ដែលកំពុងអង្គុយលើគ្រែក្បែរផ្ទះឈើ ប្រក់ស័ង្គសី និងរៀបឥដ្ឋនៅខាងក្រោម បានពោលបន្តថា លោកយាយរស់នៅផ្ទះនេះយ៉ាងសុខសាន្តតាំងពីឆ្នាំ១៩៧៩មក តែអគ្គិភ័យ បែរជាបំផ្លាញផ្ទះលោកយាយ និងទ្រព្យសម្បត្តិដែលលោកយាយខំសន្សំអស់មួយជីវិតទៅហើយ។
មានមាឌដំបង និងសក់ស្កូវផង លោកយាយ មុត វណ្ណី បាននិយាយទាំងទឹកមុខស្រពាប់ស្រពោនយ៉ាងដូច្នេះ៖ «បានតែឯកសារប្លង់ដីហ្នឹងទេ ចំណែកខោអាវ បានតែមួយចង្កេះហ្នឹងទេ។ ខ្ញុំនៅក្នុងហេតុការណ៍នេះ ភ្លើងវាឆេះមក យើងមិនអាចធ្វើអ្វីបាន សម្ភារផ្សេងៗយកមិនទាន់ទេ។ ទាំងកូនទាំងចៅ សូម្បីខោអាវមួយកំប្លេរ ក៏យកមិនទាន់ដែរ»។
កាលពីល្ងាចថ្ងៃទី២៥ ខែកុម្ភៈ អគ្គិភ័យមួយ បានឆាបឆេះនៅក្នុងបន្ទប់អគារមួយរហូតរាលដាលឆេះអស់១៦ខ្នងផ្ទះនៅភូមិ១៧ សង្កាត់ស្រះចក ខណ្ឌដូនពេញ។ លោក អិន យ៉ន ប្រធានភូមិ១៧ កំពុងឈរនៅខាងមុខផ្ទះរបស់ខ្លួន ដែលបានឆាបឆេះអស់គ្មានសល់ បានរៀបរាប់ថា បើទោះបីមិនមានមនុស្សស្លាប់ តែហេតុការណ៍ភ្លើងឆេះនេះ បានធ្វើឲ្យមនុស្សមានរបួស និងខូចខាតទ្រព្យសម្បត្តិអស់ជាច្រើន។ ផ្ទះលោក អិន យ៉ន ដែលជាប្រភេទផ្ទះថ្មពីរជាន់ បានឆេះសម្ភារសំខាន់ៗ ដូចជា លិខិតឆ្លងដែន អត្តសញ្ញាណប័ណ្ណ និងឯកសារមួយចំនួនទៀត។ លោក អិន យ៉ន ដែលមានអាយុ៦៦ឆ្នាំ បានរៀបរាប់ទាំងទឹកមុខស្រពោនថា៖ «ពេលកំពុងឆេះ ម្នាក់ៗ គិតតែពីស្រវាយកអីវ៉ាន់រត់ចុះរត់ឡើង ទាល់តែឡានទឹកមក ទើបជួយបាញ់ទឹកគ្នា។ បើអត់មានឡានទឹកទេ ឆេះអស់ច្រើនជាងនេះ។ បើនឹកឃើញ ខ្លួនឯងក៏អាណិត ប្រជាពលរដ្ឋក៏អាណិត មិនដឹងធ្វើម៉េចទេ បើវាកើតឡើងទៅហើយ»។
បើតាមមេភូមិរូបនេះ ក្រោយអគ្គិភ័យកើតឡើងនេះ មានសប្បុរជនខ្លះ បានចុះមកចែកសម្លៀកបំពាក់ និងគ្រឿងបរិភោគបានមួយចំនួន។
ទាំងលោក អិន យ៉ន និងពលរដ្ឋ ដែលកំពុងរើផ្ទះ ដើម្បីចាប់ផ្តើមជីវិតសារជាថ្មីនេះ បានស្នើពលរដ្ឋដទៃទៀតមានការប្រុងប្រយ័ត្នខ្ពស់ចំពោះគ្រោះអគ្គិភ័យនេះ ព្រោះ បើមានអគ្គិភ័យហើយ វាបានបំផ្លាញអ្វីៗគ្រប់យ៉ាងជាញើសឈាមរបស់យើងដែលខំរកអស់ជាច្រើនឆ្នាំ និងត្រូវចាប់ផ្តើមជីវិតសារថ្មីទាំងលំបាកលំបិន។
តាមពិតទៅ ប៉ុន្មានឆ្នាំមកនេះ អគ្គិភ័យនៅប្រទេសកម្ពុជា បានកើតឡើងយ៉ាងសន្ធឹកសន្ធាប់ និងមានកំណើនពីមួយឆ្នាំទៅមួយឆ្នាំ។ នៅទូទាំងប្រទេសកម្ពុជានៅឆ្នាំ២០១៩កន្លងទៅ មានករណីភ្លើងឆេះចំនួន៧១៧លើក កើនឡើង១៨៣លើកបើធៀបឆ្នាំ២០១៨។ នេះបើតាម លោក ង៉ែត សាម៉ុន នាយការិយាល័យរដ្ឋបាលនាយកដ្ឋានពន្លត់អគ្គិភ័យ ដែលបានប្រាប់សារព័ត៌មានថ្មីតាមខ្សែទូរស័ព្ទ។ លោក ង៉ែត សាម៉ុន បានបន្ថែមថាទៀតថា ករណីអគ្គិភ័យនេះ បានកើតឡើងរឹតតែច្រើនថែមទៀតនៅដើមឆ្នាំ២០២០ បន្ទាប់ពីរដូវក្តៅបានឈានចូលមកដល់។ លោកបញ្ជាក់ថា គ្រាន់តែខែកុម្ភៈឆ្នាំ២០២០នេះ មានអគ្គិភ័យកើតឡើង១៣៦លើកបាត់ទៅហើយ។
បើតាម លោក ង៉ែត សាម៉ុន មូលហេតុនៃអគ្គិភ័យឆាបឆេះផ្ទះ និងរោងចក្រសហគ្រាសនានានេះ ភាគច្រើនបណ្តាលមកពីការឆ្លងចរន្តអគ្គីសនី។ លោកពន្យល់យ៉ាងដូច្នេះថា៖ «អាជ្ញាធរអគ្គីសនី គេអត់ខុសទេ ព្រោះគាត់តភ្លើងត្រឹមបង្គោល ដល់ពេលពលរដ្ឋ បែរជាគាត់តខ្សែភ្លើងតូចចូលផ្ទះ ហើយកាលពីមុន គាត់ប្រើកង្ហារធម្មតា ដល់ពេលគាត់ថែមម៉ាស៊ីនត្រជាក់ ម៉ាស៊ីនបោកខោអាវ ទូរទស្សន៍ច្រើន ខ្សែភ្លើងក្នុងផ្ទះគាត់ ដែលទិញពីឯកជនហ្នឹង គាត់មិនបានដូរទេ»។
លោក ង៉ែត សាម៉ុន បន្ថែមថា ក្រៅពីឆ្លងចរន្តអគ្គីសនី ការលួចដុត ការផ្ទុះហ្គាស និងការធ្វេសប្រហែលរបស់ពលរដ្ឋខ្លួនឯង ក៏សុទ្ធសឹងជាមូលហេតុដែលបណ្តាលឲ្យមានអគ្គិភ័យកើតឡើងដែរ។
បច្ចុប្បន្ន នៅកម្ពុជាមានរថយន្តពន្លត់អគ្គិភ័យ៣៣៦គ្រឿង និងនគរបាលពន្លត់អគ្គិភ័យមានចំនួន១៣៩៤នាក់។ លោក ង៉ែត សាម៉ុន អះអាងថា កម្លាំងពន្លត់អគ្គិភ័យបាននឹងកំពុងតែខិតខំបំពេញការងារយ៉ាងសស្រាក់សស្រាំ ប៉ុន្តែ សម្រាប់អគារខ្ពស់ៗ ដូចជា សណ្ឋាគារ ផ្ទះសំណាក់ ខុនដូរជាដើម នាយកដ្ឋានពន្លត់អគ្គិភ័យមានសមត្ថភាពពន្លត់ត្រឹមតែជាន់ទី៥ប៉ុណ្ណោះ។
លោកពន្យល់បន្ថែមថា៖ «យើងពន្លត់បានត្រឹម៥ជាន់ តែនៅតាមសណ្ឋាគារ និងខុនដូរខ្ពស់ៗមួយចំនួន គេមានប្រព័ន្ធបង្ការ មានឧបករណ៍ពន្លត់អគ្គិភ័យរួចហើយ។ តែបើមានករណីកើតឡើងត្រង់កន្លែងអត់មានហ្នឹង ពិបាកណាស់សមត្ថកិច្ច បើនិយាយមួយម៉ាត់ ដូចកន្លងមក ច្រើនតែថាអត់មានសមត្ថភាពពន្លត់អីចឹង មានតែពឹងលើសណ្ឋាគារ។ កន្លងមក នាយកដ្ឋាន ក៏បានចុះផ្សព្វផ្សាយ អគារខ្ពស់ៗហ្នឹង ឲ្យគាត់រៀបប្រព័ន្ធបង្ការពន្លត់អគ្គិភ័យ គេមានទឹកដាក់លើអគារហ្នឹង ពេលវាឆេះ វាលោតពោងពន្លត់ខ្លួនវា តែឥឡូវមិនទាន់មានឆេះអាធំៗហ្នឹងទេ»។
លោក ង៉ែត សាម៉ុន បានអំពាវនាវឲ្យពលរដ្ឋរាយការណ៍ ដោយហៅ(call)ទៅលេខ៦៦៦ និង១១៨ ដោយមិនគិតថ្លៃ ដើម្បីឲ្យអង្គភាពពន្លត់អគ្គិភ័យអាចមកជួយពន្លត់ទាន់ពេល។ យ៉ាងណាលោកស្នើពលរដ្ឋមានវិធានការបង្ការទុកជាមុន និងប្រុងប្រយ័ត្នឲ្យបានខ្ពស់ ដូចជា ផ្លាស់ប្តូរខ្សែភ្លើងចាស់ៗដោយអ្នកបច្ចេកទេសអគ្គីសនី ត្រូវបិទហ្គាស និងបិទអគ្គីសនីមុនចេញពីផ្ទះ និងត្រូវមានបំពង់ពន្លត់អគ្គិភ័យគ្រប់ផ្ទះ ដើម្បីទប់ស្កាត់ភ្លាមដោយខ្លួនឯងពេលមានអគ្គិភ័យកើតឡើង៕