COVID-19
អន្តរជាតិ
ធនាគារពិភពលោកត្រៀមលុយ ១២ពាន់លានដុល្លារ ដើម្បីប្រយុទ្ធប្រឆាំង COVID-19 រូបភាព៖ Morocco World News
× ធនាគារពិភពលោក (World Bank) នៅថ្ងៃទី៣ ខែមីនា បានប្រកាសផ្តល់កញ្ចប់ជំនួយ ក្នុងទំហំទឹកប្រាក់ ១២ពាន់លានដុល្លារ ដើម្បីជួយប្រទេសមួយចំនួន ជាពិសេសប្រទេសក្រីក្រ ក្នុងការប្រយុទ្ធប្រឆាំងជាមួយ COVID-19 ដែលកំពុងអុកឡុកយ៉ាងខ្លាំង។
បន្ទាប់ពីផ្ទុះឡើងក្នុងរយៈពេលជាងពីរខែកន្លងមកនេះ COVID-19មិនត្រឹមតែកើតមាននៅចិនប៉ុណ្ណោះទេ ប៉ុន្តែវាថែមទាំងបានរីកសាយភាយទៅជាង ៧០ប្រទេស។ បញ្ហា ដែលកំពុងតែចោទនៅពេលនេះ គឺថាប្រទេសក្រីក្រ និងប្រទេសខ្វះសម្ភារសុខាភិបាលទំនើបៗ ក៏ប្រឈមនឹងជំងឺថ្មីនេះដែរ។
ពាក់ព័ន្ធនឹងបញ្ហានេះ ប្រធានធនាគារពិភពលោក លោក David Malpass បានប្រាប់អ្នកកាសែតយ៉ាងដូច្នេះថា៖ « គោលបំណងនៃកញ្ចប់ជំនួយ ១២ពាន់លានដុល្លារនេះ គឺជាការចាត់វិធានការដ៏លឿន និងមានប្រសិទ្ធភាពបំផុត ដើម្បីឆ្លើយតបទៅនឹងប្រទេស ដែលកំពុងត្រូវការជំនួយ»។ ប្រមុខធនាគារពិភពលោក ចង់សំដៅទៅប្រទេសក្រីក្រជាច្រើន ដែលខ្វះគ្រឿងបរិក្ខារពេទ្យទំនើបៗ កំពុងប្រឈមនឹង COVID-19 ហើយជំនួយមួយនេះ នឹងជួយប្រទេសក្រីក្រទាំងនោះ ក្នុងការប្រយុទ្ធប្រឆាំងជាមួយ COVID-19។
បើតាមការបញ្ជាក់របស់លោក David មូលនិធិ ១២ពាន់លានដុល្លារនេះ នឹងផ្តល់ជាសម្ភារពេទ្យ សេវាសុខាភិបាល ការផ្តល់យោបល់អំពីគោលនយោបាយ និងជំនាញលើវិស័យសុខាភិបាល ក្នុងការប្រយុទ្ធប្រឆាំងជាមួយជំងឺឆ្លង COVID-19 ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ ជំនួយមួយនេះ នឹងបញ្ចេញឲ្យបានលឿនជាទីបំផុត ដើម្បីជួយសង្គ្រោះមនុស្សជាច្រើននៅជុំវិញពិភពលោក។
ក្នុងចំណោមទឹកប្រាក់ ១២ពាន់លានដុល្លារនេះ ធនាគារពិភពលោក នឹងត្រៀមលុយចំនួន ៨ពាន់លានដុល្លារសម្រាប់ប្រទេសទាំងឡាយណា ដែលស្នើសុំ។ ប៉ុន្តែមកទល់ពេលនេះ គេមិនទាន់ដឹងនៅឡើយទេ ថាតើប្រទេសមួយណា នឹងទទួលបានជំនួយនេះមុនគេ។
សូមបញ្ជាក់ថា គិតត្រឹមព្រឹកថ្ងៃទី៤ ខែមីនា COVID-19 បានរីកសាយភាយទៅ ៧៧ប្រទេស។ ជាប្រភេទជំងឺឆ្លង មនុស្សជាង ៩២០០០នាក់ផ្ទុកជំងឺប្រភេទថ្មីនេះ និងមានមនុស្សលើសពី ៣ពាន់នាក់បានស្លាប់ នៅជុំវិញពិភពលោក៕
Tag:
ធនាគាពិភពលោក
COVID-19
© រក្សាសិទ្ធិដោយ thmeythmey.com