រដ្ឋមន្ត្រីសុខាភិបាល ប្រាប់វិធីដាក់ខ្លួនឯងនៅដោយឡែក ពីសមាជិកគ្រួសារ

ជាតិ

សង្គមជាតិ

រដ្ឋមន្ត្រីសុខាភិបាល ប្រាប់វិធីដាក់ខ្លួនឯងនៅដោយឡែក ពីសមាជិកគ្រួសារ

16, Mar 2020 , 9:19 pm

រូបភាព

លោក ម៉ម ប៊ុនហេង ចុះពិនិត្យម៉ាស៊ីនស្កែនកម្តៅនៅព្រលានយន្តហោះសៀមរាប នាពេលកន្លងមក

ដោយ: ថ្មីៗ

នៅថ្ងៃទី១៦ ខែមីនា ឆ្នាំ២០២០ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានចេញសេចក្តីណែនាំស្តីពីនីតិវិធីដាក់ខ្លួនឲ្យនៅដាច់ដោយឡែកនៅក្នុងផ្ទះ ដល់ប្រជាពលរដ្ឋរូបណា ដែលសង្ស័យខ្លួនឯង ពីការឆ្លងកូវីដ-១៩ ហើយតម្រូវឲ្យស្ថិតនៅក្នុងបន្ទប់ដាច់ដោយឡែកពីសមាជិកគ្រួសាររយៈពេល១៤ថ្ងៃ។

ដំបូន្មានដំបូង លោក ម៉ម ប៊ុនហេង ប្រាប់ថា បន្ទប់ ដែលបុគ្គលណាម្នាក់ ត្រូវនៅម្នាក់ឯងនិងដាច់ដោយឡែកពីសមាជិកគ្រួសារ គឺត្រូវមានខ្យល់ចេញចូលល្អ ហើយបើផ្ទះ មានបន្ទប់តែមួយ គឺត្រូវរក្សាចម្ងាយឲ្យបានប្រមាណ២ម៉ែត្រពីសមាជិកគ្រួសារ។

ជាមួយគ្នានេះ លោករដ្ឋមន្ត្រី ណែនាំឲ្យកាត់បន្ថយការប្រើកន្លែងទំនេរ និង កន្លែងរស់នៅរួមគ្នា ដូចជា ផ្ទះបាយ និង បន្ទប់ទឹក ជាដើម។ លោក បន្តថា ត្រូវសម្អាតបន្ទប់ស្នាក់នៅ និង បន្ទប់ទឹកជាប្រចាំ ហើយត្រូវបោកគក់សម្លៀកបំពាក់ ស្រោមពូក ខ្នើយ រួមទាំង គ្រឿងបរិក្ខារប្រើប្រាស់ផ្សេងៗ។

លើសពីនេះ រដ្ឋមន្ត្រីសុខាភិបាល រម្លឹកឲ្យឧស្សាហ៍លាងដៃ ហើយត្រូវខ្ទប់ច្រមុះ និង មាត់ ដោយប្រើកែងដៃ ឬក្រដាសអនាម័យ នៅពេលក្អក ឬកណ្តាស់ រួចបោះចោលក្រដាសអនាម័យនោះភ្លាមទៅក្នុងធុងសំរាម។

លោក បន្ថែមថា ក្នុងអំឡុងពេល១៤ថ្ងៃ នៃការដាក់ខ្លួនឯងឲ្យនៅដាច់ដោយឡែកពីសមាជិកគ្រួសារ បុគ្គលរូបនោះ ត្រូវតាមដានសុខភាពខ្លួនឯង និងរោគសញ្ញា រួមមាន កម្តៅ ក្អក ឈឺបំពង់ក ហត់ ពិបាកដកដង្ហើម ឬ រោគសញ្ញាផ្សេងៗទៀត។ បើមានរោគសញ្ញាទាំងនេះ ឬ បញ្ហាសុខភាពផ្សេងៗ ត្រូវរាយការណ៍ជាបន្ទាន់ទៅកាន់លេខ១១៥ ឬអ្នកពាក់ព័ន្ធដទៃ ដូចជា អភិបាលរាជធានី-ខេត្ត ប្រធានមន្ទីរសុខាភិបាល ប្រធានការិយាល័យសុខាភិបាលស្រុក ឬ ប្រធានមន្ទីរពេទ្យបង្អែក។

ទន្ទឹមនឹងនេះ លោករដ្ឋមន្ត្រី បានបង្គាប់អាជ្ញាធរមូលដ្ឋាននិងមន្ត្រីសុខាភិបាលមូលដ្ឋាន ឲ្យតាមដានមើលជានិច្ច ចំពោះបុគ្គល ដែលត្រូវដាក់ខ្លួនឯងឲ្យនៅដាច់ដោយឡែកពីសមាជិកគ្រួសាររយៈពេល១៤ថ្ងៃ នៅក្នុងផ្ទះ ដើម្បីដឹងប្រាកដថា ពួកគេ អនុវត្តបានត្រឹមត្រូវតាមសេចក្តីណែនាំនេះ។

សូមរម្លឹកថា កម្ពុជា បានរកមនុស្ស១២នាក់ហើយ ដែលមានកូវីដ-១៩។ ក្នុងចំណោមមនុស្សទាំង១២នាក់នោះ មានអ្នកខ្លះ ត្រូវបានអ្នកទៃ ធ្លាប់ប៉ះពាល់ដោយផ្ទាល់និងដោយប្រយោល។

ជាទូទៅ អ្នកដែលធ្លាប់ប៉ះពាល់ដោយផ្ទាល់ ត្រូវបានបញ្ជូនទៅធ្វើតេស្តរកវីរុសកូវីដ-១៩ នៅវិទ្យាស្ថានប៉ាស្ទ័រ ហើយទោះបីជាលទ្ធផលបង្ហាញថាអវិជ្ជមានក្តី ក៏ពួកគេ នៅតែត្រូវបានដាក់ឲ្យនៅដាច់ដោយឡែកពីគេ ក្នុងមន្ទីរពេទ្យរយៈពេល១៤ថ្ងៃដែរ ដើម្បីបន្តតាមដានសុខភាព។

ចំណែកអ្នកដែលធ្លាប់មានទំនាក់ទំនងឬប៉ះពាល់ដោយប្រយោលជាមួយអ្នកមានកូវីឌ-១៩ ត្រូវបានអនុញ្ញាតឲ្យទៅផ្ទះវិញ ក្រោយឆ្លងកាត់ការធ្វើតេស្តចេញលទ្ធផលថា មិនបានឆ្លង។ តែពួកគេ ត្រូវណែនាំឲ្យប្រុងប្រយ័ត្នខ្ពស់ ដោយមិនត្រូវធ្វើដំណើរទៅណាមកណាផ្តេសផ្តាសឡើយ បើមិនចាំបាច់។ លើសពីនេះ ពួកគេ ក៏ត្រូវដាក់ខ្លួនឯងឲ្យនៅដាច់ដោយឡែកពីសមាជិកគ្រួសាររយៈពេល១៤ថ្ងៃផងដែរ៕