COVID-19
ជាតិ
សម្តេច ហ៊ុន សែន ជាប្រធានដឹកនាំគណៈកម្មការជាតិប្រយុទ្ធនឹងកូវីដ១៩ ដោយផ្ទាល់
× ភ្នំពេញ៖ រដ្ឋាភិបាល បង្កើតគណៈកម្មការជាតិប្រយុទ្ធនឹងជំងឺកូវីដ-១៩ (Covid-19 ) ដោយមានសម្ដេចនាយករដ្ឋមន្ត្រី ហ៊ុន សែន ជាប្រធាន។ គណៈកម្មការជាតិប្រយុទ្ធនឹងជំងឺកូវីដ-១៩ អាចហៅរដ្ឋមន្រី្ត រដ្ឋលេខាធិការ ថ្នាក់ដឹកនាំ និងមន្ត្រីបច្ចេកទេសពាក់ព័ន្ធផ្សេងទៀត ចូលប្រជុំឬការណែនាំឲ្យអនុវត្តវិធានការបន្ទាន់នានា តាមការចាំបាច់។
សេចក្ដីសម្រេចរបស់រដ្ឋាភិបាល ដែលចុះហត្ថលេខាដោយសម្ដេច ហ៊ុន សែន នៅថ្ងៃទី១៨ ខែមីនា ឆ្នាំ២០២០ បានឲ្យដឹងថា គណៈកម្មការជាតិប្រយុទ្ធនឹងជំងឺកូវីដ-១៩ មានភារកិច្ចកំណត់គោលនយោបាយ យុទ្ធសាស្ត្រ និងដឹកនាំអនុវត្តផែនការពាក់ព័ន្ធនឹងជំងឺកូវីដ-១៩។ រដ្ឋាភិបាលបានសម្រេចតែងតាំង រដ្ឋមន្រី្តក្រសួងមហាផ្ទៃ រដ្ឋមន្ត្រីក្រសួងការពារជាតិ រដ្ឋមន្ត្រីទទួលបន្ទុកទីស្ដីការគណៈរដ្ឋមន្រី្ត រដ្ឋមន្រី្តក្រសួងសេដ្ឋកិច្ចនិងហិរញ្ញវត្ថុ និង រដ្ឋមន្រី្តក្រសួងសុខាភិបាល ជាអនុប្រធាននៃគណៈកម្មការនេះ ដោយមានរដ្ឋមន្ត្រីក្រសួងច្រើនទៀត ជាសមាជិក។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ទទួលបន្ទុកជាអនុប្រធានប្រចាំការ ហើយរដ្ឋន្ត្រី អគ្គមេបញ្ជាការកងទ័ព អគ្គស្នងការនគរបាលជាតិ មេបញ្ជាការកងទ័ពជើងគោក មេបញ្ជាការកងរាជអាវុធហត្ថ អភិបាលរាជធានី-ខេត្ត ជាសមាជិក ក្នុងនោះក៏មានវត្តមាន លោក ស្វាយ ស៊ីថា លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ច លោកស្រី យក់ សម្បត្តិ និងលោកស្រី ឱ វណ្ណឌីន រដ្ឋលេខាធិការក្រសួងសុខាភិបាលផងដែរ។
ទន្ទឹមនឹងនេះ គណៈកម្មការជាតិប្រយុទ្ធជំងឺកូវីដ-១៩ មានតួនាទីគ្រប់គ្រងផលប៉ះពាល់លើទិដ្ឋភាពនយោបាយ សេដ្ឋកិច្ច និងសង្គមទាំងកម្រិតជាតិ និងអន្តរជាតិ។ ជាមួយគ្នានេះដែរ គណៈកម្មការជាតិប្រយុទ្ធជំងឺកូវីដ-១៩ ត្រូវដឹកនាំ និងសម្របសម្រួលការអនុវត្តវិធានការជាអន្តរវិស័យ អន្តរស្ថាប័ន រួមទាំងរដ្ឋបាលថ្នាក់ជាតិនិងថ្នាក់ក្រោមជាតិ៕
© រក្សាសិទ្ធិដោយ thmeythmey.com