COVID-19
អន្តរជាតិ
លោក ស៊ី ប្រាប់លោក ពូទីនថា ចិនត្រៀមខ្លួនជាស្រេចដើម្បីរួមដៃគ្នាកំចាត់ COVID-19 រូបភាព Xinhua
× ប្រធានាធិបតីចិន ស៊ី ជិនភីង ប្រាប់សមភាគីរុស្ស៊ី វ៉ា្លឌីមៀ ពូទីនថា ចិនត្រៀមខ្លួនជាស្រេចដើម្បីធ្វើការជាមួយប្រទេសទាំងអស់ក្នុងការប្រយុទ្ធនឹងជំងឺCOVID-19។ លោក ស៊ី និងលោក ពូទីន បានជជែកគ្នាតាមទូរសព្ទពីបញ្ហា COVID-19 នេះ។ នេះបើតាមសារព័ត៍មានរដ្ឋចិនថ្ងៃសុក្រ ២០ មីនា។
ប្រធានាធិបតីចិន និងប្រធានាធិបតីរុស្ស៊ី បានជជែកគ្នាតាមទូរសព្ទនៅយប់ថ្ងៃទី១៩ ខែមីនា។ មេដឹកនាំចិន ស៊ី ជិនភីង បាននិយាយថា ប៉េកាំង មានឆន្ទៈក្នុងការធ្វើការរួមគ្នាជាមួយរុស្ស៊ី និងបណ្តាប្រទេសទាំងអស់ ដើម្បីការពារសុខភាពសាធារណៈសកល។ ទីភ្នាក់ងារព័ត៌មានរដ្ឋចិនXinhua ចុះផ្សាយពីការជជែកតាមទូរសព្ទដូចនេះ។
បើតាម Xinhua លោក ស៊ី ក៏ប្រាប់លោក ពូទីន ទៀតថា ចិនមានធនធាន សមត្ថភាព និងភាពច្បាស់លាស់ក្នុងការប្រយុទ្ធយកជ័យជំនះលើ COVID-19 ។ ជ័យជម្នះ បានលេចចេញជាបណ្ដើរៗហើយដែរ ព្រោះពីរថ្ងៃចុងក្រោយ ចិនមិនមានករណីឆ្លងក្នុងស្រុកឡើយ លើកលែងតែករណីឆ្លងពីខាងក្រៅដែលកើនឡើង។
មកដល់ពេលនេះ រុស្ស៊ីមានករណីឆ្លង COVID-19 មានចំនួន១៩៩ ករណី ខណៈកាលពីថ្ងៃទី ១៩ ខែមីនា មានករណីស្លាប់លើកដំបូង។ ចំណែកឯនៅប្រទេសចិនវិញស្ថានការណ៍មានសភាពធូរស្បើយខ្លាំងដោយសារលែងមែនករណីឆ្លងក្នុងស្រុកបន្ថែម ចាប់តាំពីការផ្ទុះឡើងនៃជំងឺក្នុងដើមឆ្នាំនេះ។
ពីដំបូងចិនរងការរិះគន់ខ្លាំង ព្រោះមិនមានចំណាត់ការទប់ស្កាត់វីរុសឲ្យបានលឿន។ ប្រធានាធិបតីអាមេរិក ដូណាល់ ត្រាំ នៅថ្ងៃទី១៩ ខែមីនា បានរិះគន់ចិនចំៗថា ពិភពលោកកំពុងរងគ្រោះព្រោះអ្វីដែលចិនបានធ្វើ។
យ៉ាងណាមិញ នៅពេលស្ថានភាពក្នុងស្រុកធូរស្រាលខ្លាំង ចិនក៏ចាប់ផ្ដើមបោះដៃផ្ដល់ជំនួយដល់ប្រទេសដែលត្រូវការខ្លាំងដូចជាការបញ្ជូនពេទ្យទៅអ៊ីតាលីដែលរងគ្រោះខ្លាំងនៅអឺរ៉ុប។ លើសពីនោះ ចិនក៏បានផ្ដល់ជំនួយជាសម្ភារចាំបាច់ដូចជាម៉ាស់ជាដើមទៅកាន់ប្រទេសមួយចំនួនទៀតផងដែរ៕
Tag:
COVID-19
ចិន
ស៊ី ជិនពីង
© រក្សាសិទ្ធិដោយ thmeythmey.com